ەلشىلىك وكىلىنىڭ قىزىعۋشىلىعى

قازاقستان رەسپۋبليكاسى ورتالىق سايلاۋ كوميسسياسىنىڭ مۇشەسى مارات سارسەمباەۆتىڭ ۇلىبريتانيا مەن سولتۇستىك يرلانديا كورولدىگىنىڭ  قازاقستان رەسپۋبليكاسىنداعى ەلشىسىنىڭ ورىنباسارى سارا پيككەرينگپەن كەزدەسۋى بولدى. ورتسايلاۋكوم مۇشەسى پيككەرينگ حانىمدى ورتالىق سايلاۋ كوميسسياسىنىڭ قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا دايىندىق جونىندەگى قىزمەتى, سونداي-اق, ەل وڭىرلەرىندەگى سايلاۋ كوميسسيالارىنىڭ جۇمىسى تۋرالى اقپاراتتاندىردى. م. سارسەمباەۆ: «قازاقستان وسك سايلاۋ پروتسەسىنە قاتىستى حالىقارالىق فورۋمداردىڭ جۇمىسىنا, حالىقارالىق ۇيىمداردىڭ قىزمەتىنە بەلسەندى قاتىسا وتىرىپ, شەت مەملەكەتتەردىڭ حالىقارالىق ۇيىمدارىمەن جانە سايلاۋ ورگاندارىمەن ىنتىماقتاستىقتى دامىتۋ بويىنشا جۇمىستى جالعاستىرۋدا. سايلاۋدى بايقاۋ جونىندەگى ءتۇرلى ۇيىمدارمەن جانە بىرلەستىكتەرمەن ىنتىماقتاستىق – ورتسايلاۋكومنىڭ تۇراقتى تاجىريبەسى. حالىقارالىق بايقاۋ ينستيتۋتىنا قاتىستى ايتاتىن بولساق, ول قازاقستان رەسپۋبليكاسىندا  1994 جىلدان باستاپ جۇمىس جاسايدى. بايقاۋ ينستيتۋتى اعىمداعى سايلاۋ ناۋقانى شەڭبەرىندە دە اشىلدى. وسى ساتكە ورتسايلاۋكوم اككرەديتتەگەن ءۇش حالىقارالىق ۇيىمنىڭ ميسسيالارى (ەقىۇ/دياقب, تمد جانە شىۇ) مەن 19 شەت مەملەكەتتىڭ 236 بايقاۋشىسىنان باسقا 19 مەملەكەتتەن شەتەلدىك باق-تاردىڭ ەلىمىز سىرتقى ىستەر مينيسترلىگى اككرەديتتەگەن 98 وكىلى بايقاۋدى جۇزەگە اسىرا الادى. ءبىز حالىقارالىق بايقاۋ ينستيتۋتى دەموكراتيانى دامىتۋدىڭ قاجەتتى جانە مىندەتتى شارتى رەتىندە  دەموكراتيالىق سايلاۋدىڭ وتكىزىلۋىن, سونداي-اق, ازاماتتاردىڭ سايلاۋ قۇقىقتارىنىڭ ساقتالۋىن قامتاماسىز ەتۋدەگى ماڭىزدى ەلەمەنت دەپ ەسەپتەيمىز», دەپ اتاپ ءوتتى وسك وكىلى. پيككەرينگ حانىم اڭگىمە بارىسىندا قازاقستاندىق سايلاۋ جۇيەسىنىڭ ەرەكشەلىكتەرىنە, كانديداتتاردىڭ سايلاۋالدى ۇگىتىن قارجىلاندىرۋ تۇرلەرىنە, داۋىس بەرۋ كۇنى سايلاۋشىلاردىڭ بولجامدى كەلۋىنە جانە باسقا دا سايلاۋ راسىمدەرىنە قاتىستى وزەكتى ماسەلەلەرگە قىزىعۋشىلىق تانىتتى. سونىمەن قاتار, پيككەرينگ حانىم الداعى سايلاۋدى بايقاۋ پروتسەسىنە ەلشىلىك قىزمەتكەرلەرىنىڭ قاتىسۋى تۋرالى تىلەگىن ءبىلدىردى. كەزدەسۋ سوڭىندا م. سارسەمباەۆ ەكى ەلدەگى ەلەكتوراتتىق پروتسەستەردى دامىتۋ تۋرالى تاجىريبە مەن اقپارات الماسۋ ماقساتىندا ودان ارعى ىنتىماقتاستىققا دەگەن سەنىمىن ءبىلدىردى. ءلايلا ەدىلقىزى, «ەگەمەن قازاقستان». استانا.