قوستاناي وبلىسى اكىمىنىڭ ءبىرىنشى ورىنباسارى بولىپ عاۋەز نۇرمۇحامبەتوۆ تاعايىندالدى

قوستاناي. 21 مامىر. عاۋەز نۇرمۇحامبەتوۆ قوستاناي وبلىسى اكىمىنىڭ ءبىرىنشى ورىنباسارى بولدى. بۇل تۋرالى egemen.kz ءتىلشىسى حابارلادى. جاڭا ورىنباساردى وبلىس اكىمى نۇرالى سادۋاقاسوۆ وبلىس اكىمدىگىنىڭ كەڭەيتىلگەن ماجىلىسىندە تانىستىردى. عاۋەز تورسان ۇلى قازاقستان رەسپۋبليكاسى پرەزيدەنتى اكىمشىلىگىنىڭ ينسپەكتورى قىزمەتىنەن كەلدى. عاۋەز نۇرمۇحامبەتوۆ پرەزيدەنت اكىمشىلىگىنىڭ ينسپەكتورلىعىنا وتكەن جىلدىڭ ماۋسىم ايىندا كەتكەن بولاتىن. وعان دەيىن قوستاناي قالاسىنىڭ اكىمى بولعان ەدى. ءبىرىنشى ورىنباسارىن تانىستىرعان وبلىس اكىمى نۇرالى سادۋاقاسوۆ عاۋەز نۇرمۇحامبەتوۆتىڭ بۇل سالاداعى تاجىريبەسىنە باعا جەتپەيتىندىگىن ايتتى. ونىڭ ەڭبەك جولى تەك قوستاناي وبلىسىمەن بايلانىستى ءورىلىپ كەلەدى. تاران, اۋليەكول, قارابالىق اۋداندارىن باسقاردى, قوستاناي قالاسىنا ەكى رەت اكىم بولدى. وبلىس اكىمى نۇرالى سادۋاقاسوۆ: «ەكونوميكا, كوممۋنالدىق تۇرعىن ءۇي شارۋاشىلىعى, قۇرىلىس عاۋەز تورسان ۇلىنا تانىس قىزمەتتەر. بارلىق كۇش-جىگەرىن ءوڭىردىڭ گۇلدەنۋىنە جۇمسايدى دەپ سەنەمىز», دەدى. وبلىس اكىمىنىڭ بۇرىنعى ءبىرىنشى ورىنباسارى ەۆگەني امان زەينەتكەرلىك دەمالىسقا شىقتى. ءنازيرا جارىمبەتوۆا. دەرەك, سۋرەت: egemen.kz