ەلباسى پاكستان پرەمەرىمەن كەڭەيتىلگەن قۇرامدا كەلىسسوزدەر وتكىزدى

استانا. 26 تامىز. پاكستان پرەمەر-ءمينيسترى ناۆاز ءشاريفتىڭ قازاقستانعا رەسمي ساپارى اياسىندا كەڭەيتىلگەن قۇرامدا كەلىسسوزدەر ءوتتى. بۇل تۋرالى akorda.kz حابارلادى. قازاقستان پرەزيدەنتى ءوز سوزىندە ن.ءشاريفتىڭ ساپارى ەكىجاقتى قارىم-قاتىناستى جانداندىرۋعا تىڭ سەرپىن بەرەتىنىنە سەنىم ءبىلدىردى. «قازاقستاندىقتار ەلىمىزدىڭ تاۋەلسىزدىگىن العاشقىلاردىڭ ءبىرى بولىپ پاكستاننىڭ تانىعانىن ەشقاشان ۇمىتپايدى. حالىقارالىق كۇن تارتىبىنە قاتىستى ۇستانىمدارىمىزدىڭ ۇقساستىعى, سان عاسىرلىق دوستىق جانە مادەني بايلانىستار ءبىزدى جاقىن ءارى باۋىرلاس ەلدەرگە اينالدىرادى. بۇگىنگى احۋال جاعدايىندا قارىم-قاتىناستارىمىزدىڭ جاڭا كەزەڭىن باستاۋ ءۇشىن بارلىق مۇمكىندىكتى پايدالاناتىن ۋاقىت جەتتى. ءسىزدىڭ ساپارىڭىز ءدال وسى ماقساتقا ساي كەلەتىنىنە سەنىمدىمىن», – دەدى مەملەكەت باسشىسى. پاكستان پرەمەر-ءمينيسترى ءبىزدىڭ ەلگە دەگەن ايرىقشا كوڭىلى مەن نۇرسۇلتان نازارباەۆپەن اراداعى جىلى قارىم-قاتىناسى تۋرالى ايتتى. «مەن قازاقستاندى ءوزىمنىڭ ەكىنشى مەكەنىم سانايمىن, سوندىقتان ءسىزدىڭ ەلگە كوپ جىلدان كەيىنگى ساپارىم ايرىقشا اسەرگە بولەدى. وسى مۇمكىندىكتى پايدالانا وتىرىپ, ءسىزدى وزىڭىزگە قولايلى ۋاقىتتا پاكستانعا كەلۋگە شاقىرامىن. بۇل – مەنىڭ استاناعا ءبىرىنشى كەلۋىم. بۇل قالا ءسىزدىڭ كورەگەندىگىڭىزدىڭ سيمۆولى دەپ سانايمىن. ءسىزدىڭ باسشىلىعىڭىزبەن قازاقستان زور الەۋمەتتىك-ەكونوميكالىق جەتىستىكتەرگە جەتتى», – دەدى ن.شاريف. ول سونداي-اق پاكستاننىڭ قازاقستانمەن جانە ورتالىق ازيا ەلدەرىمەن ىنتىماقتاستىق اياسىن كەڭەيتكىسى كەلەتىنىن اتاپ كورسەتتى. «ءبىز ەنەرگەتيكا, ساۋدا جانە ەكونوميكا, كولىك سالالارىن قوسا قامتيتىن كوپتەگەن سالالاردا قارىم-قاتىناستى دامىتقىمىز كەلەدى. وسىعان بايلانىستى قازاقستاندى قىتاي-پاكستان كولىك جۇيەسىنىڭ جۇمىسىنا اتسالىسۋعا شاقىرامىز. بۇل ءسىزدىڭ ەل جانە وسى وڭىردەگى باسقا دا مەملەكەتتەر ءۇشىن پارسى شىعاناعىنا شىعۋعا جول اشادى», – دەدى پاكستان پرەمەرى. سونىمەن قاتار ن.شاريف نۇرسۇلتان نازارباەۆتى, سونداي-اق بۇكىل قازاقستان حالقىن قازاق حاندىعىنىڭ 550 جىلدىعىمەن جانە ەل كونستيتۋتسياسىنىڭ 20 جىلدىعىمەن قۇتتىقتادى. ايدار ورىسباەۆ. دەرەك, سۋرەت: akorda.kz.