پەرزەنتحانا – ەل ەرتەڭىنىڭ باستاۋى, ۇلت ءوسىمىنىڭ ءورىسى. ىڭگالاعان تالاي ءسابي جارىق دۇنيە ەسىگىن اشار تابالدىرىعى. باستاۋى ءبۇتىن, تابالدىرىعى بەرىك, ءورىسى كەڭ ەلدىڭ بولاشاعى دا باياندى. تاۋەلسىزدىك بەسىگى – ەلوردادا ءۇش پەريناتالدىق ورتالىق بار ەكەن. سونىڭ ءبىرى دە بىرەگەيى – استانا قالاسىنىڭ №3 پەريناتالدىق ورتالىعى بولىپ تابىلادى. دەنساۋلىق ساقتاۋدى دامىتۋ جونىندەگى رەسپۋبليكالىق ورتالىقتىڭ ءداستۇرلى رەيتينگى بويىنشا 2013-2014 جىلداردىڭ قورىتىندىسىندا №3 پەريناتالدىق ورتالىق ستاتسيونارلىق پەرزەنتحانالار اراسىندا رەسپۋبليكا بويىنشا ۇزدىكتەر قاتارىنان تانىلىپتى.
«جاقسىنى كورمەك ءۇشىن» دەگەن ۇلاعاتتى ۇكىلەپ, ەلوردالىق №3 پەريناتالدىق ورتالىقتىڭ تابالدىرىعىن اتتادىق. ورتالىقتى مەديتسينا عىلىمدارىنىڭ كانديداتى, جوعارى دارەجەلى دارىگەر زايتۋنا حاميدۋللينا باسقارادى ەكەن. جۇزىنەن جىلىلىق نۇرى ەسكەن باس دارىگەر ناعىز اق حالاتتى ابزال جاندارعا ءتان ىزگىلىكپەن باۋراپ الدى.
– ءبىزدىڭ پەرزەنتحانا استانا قالاسىنداعى ەڭ ساليقالى ەمدەۋ ورتالىقتارىنىڭ بىرىنەن سانالادى. ونىڭ ىرگەتاسى 1964 جىلى قالانعان. سودان بەرى كۇن سايىن ونداعان نارەستە دۇنيە ەسىگىن اشىپ, ەلىمىزدىڭ ەركىن ۇلاندارىنىڭ قاتارىنا قوسىلادى. 2014 جىلدان باستاپ ءبىزدىڭ پەرزەنتحانانىڭ دارەجەسى جوعارىلاتىلىپ, پەريناتالدىق ورتالىق رەتىندە قۇرىلدى. ياعني ءبىزدىڭ ورتالىقتا بۇگىنگى زاماناۋي تەحنولوگياعا نەگىزدەلگەن قۇرال-جابدىقتارمەن تولىققان قابىلداۋ – دياگنوستيكالىق, جاڭا تۋعان سابيلەردى جەتىلدىرۋ, شالا تۋعان نارەستەلەردى وڭالتۋ, بالالار رەانيماتسياسى سياقتى بولىمدەر اشىلدى, – دەيدى ز.عاديلقىزى.
پەريناتالدىق ورتالىقتا گەنيكولوگيالىق سىرقاتتاردى ساۋىقتىرۋدىڭ كەشەندى قىزمەتى كورسەتىلەدى. بەدەۋلىككە قارسى, جاتىر ىسىكتەرىن جويۋ جانە باسقا كۇردەلى وتالار جاسالادى. سونىمەن بىرگە, ورتالىق بازاسىندا ءبىر اۋىسىمدا 500 ادام قابىلدايتىن ايەلدەر ەمحاناسى جۇمىس ىستەيدى. ەمحانادا جۇكتى ايەلدەرگە جان-جاقتى اقىل-كەڭەس بەرىلۋىمەن قاتار, اۋرۋدىڭ بارلىق تۇرلەرى بويىنشا مەديتسينالىق كومەك كورسەتىلەدى.
باس دارىگەر زايتۋنا حاميدۋللينانىڭ ايتۋىنشا, استانا قالالىق №3 پەريناتالدىق ورتالىعىندا اياعى اۋىر انالاردىڭ بالا كوتەرۋ كەزەڭدەرىندەگى اۋىتقۋشىلىق ۇردىستەرىنىڭ بارلىق تۇرلەرى بويىنشا شيپالى ەم جاسالىناتىن كورىنەدى. ءتىپتى, مۇندا مەديتسينالىق زەرتتەۋلەر بويىنشا بالا كوتەرۋگە بولمايتىن ايەلدەردى ەمدەپ, انا بولۋ باقىتىن كورۋگە جاعداي تۋعىزادى ەكەن. ورتالىقتىڭ وتا جاسايتىن بولىمشەسى وسى ساناتتاعى اۋرۋحانالاردىڭ ىشىندەگى وزىق جابدىقتالعان بولىمشەلەردىڭ قاتارىنان سانالادى. ورتاشا العاندا مۇندا كۇنىنە وزدىگىنەن بوسانا المايتىن ايەلدەرگە 6-7 وتا جاسالاتىن كورىنەدى. وتكەن جىلى №3 پەريناتالدىق ورتالىقتا 1200 اناعا وتا جاسالىپ, وسىنشاما سابيگە جارىق دۇنيەگە جولداما بەرىلىپتى.
استانا قالالىق №3 پەريناتالدىق ورتالىقتا زامان تالابىنا قاراي عىلىمي ىزدەنىستەرگە كەڭ جول اشىلعان. ورتالىق بازاسىندا استانا مەديتسينالىق اكادەمياسىنىڭ گينەكولوگيا جانە اكۋشەرلىك كافەدرالارى جۇمىس ىستەيدى. بۇل ەكى كافەدرادا بىلىكتى عالىم, پروفەسسور گالينا احمەديانوۆانىڭ جەتەكشىلىگىمەن جاس مامانداردىڭ عىلىم جولىنداعى ىزدەنىستەرى شىڭدالادى. مىنە, وسىنداي جان-جاقتى ىزدەنىستەردىڭ ءناتيجەسىندە بۇل ورتالىقتا ايەلدەرگە لاپاروسكوپيالىق وتا جاساۋ ءادىسى كەڭىنەن قولعا الىنعان. ماسەلەن, بۇرىن جاتىر ىسىگىن الىپ تاستاۋ ءۇشىن, بۇكىل قارىندى تىلگىلەپ, ءىشتى اقتارۋعا تۋرا كەلەتىن. ەندى, لاپاروسكوپيالىق ءادىس بويىنشا قارىنعا كىشكەنە عانا تەسىك جاساپ, لازەر ارقىلى جاتىر ىسىگىن جويىپ جىبەرۋگە مۇمكىندىك جاسالادى.
ورتالىقتا مامانداردىڭ كاسىبي بىلىكتىلىگىن ارتتىرۋعا بارىنشا كوڭىل بولىنەدى ەكەن. وتكەن جىلى №3 پەريناتالدىق ورتالىقتىڭ بىرقاتار دارىگەرلەرى فرانتسيا, قىتاي, رەسەي, بالتىق جاعالاۋى ەلدەرى سياقتى, شەت مەملەكەتتەردە بولىپ, كاسىبي بىلىكتىلىگىن شىڭداعان. جاقىندا بالتىق جاعالاۋى ەلدەرىنەن وسىندا ءبىر توپ عالىم ماماندار كەلىپ, ورتالىقتىڭ اكۋشەر-گينەكولوگتارى اراسىندا شەبەرلىك كلاسستارىن وتكىزىپتى.
– №3 پەريناتالدىق ورتالىققا دەنساۋلىق ساقتاۋ مينيسترلىگى مەن قالالىق دەنساۋلىق ساقتاۋ باسقارماسى تاراپىنان شىنايى قامقورلىق جاسالىپ كەلەدى. وتكەن جىلى استانا قالالىق اكىمدىگى مەن قالالىق دەنساۋلىق ساقتاۋ باسقارماسىنىڭ تىكەلەي كومەگىنىڭ ارقاسىندا جاڭا تۋعان سابيلەردى جەتىلدىرۋ جانە جاڭا تۋعان شاقالاقتاردى ادام قاتارىنا قوسۋعا ارنالعان بۇگىنگى عىلىمي تەحنولوگيانىڭ جوعارعى جەتىستىكتەرىنە نەگىزدەلگەن ەكستروكلاستى مەديتسينالىق جابدىقتار الدىق. ورتالىقتىڭ مەديتسينالىق قۇرالدارمەن جابدىقتالۋى تالاپقا ساي. مامان كادرلارىمىزدىڭ بىلىكتىلىگى دە جوعارى. سوندىقتان, ءبىز سىرقاتى اسقىنعان ايەلدەردى دە, سوڭعى كەزدە تولعاعى اۋىر انالاردى دا قابىلداپ قاتارعا قوسىپ كەلەمىز. بۇل ءبىزدىڭ ەلىمىزدەگى مەديتسيناعا دەگەن مەملەكەت باسشىسىنىڭ شىنايى جاناشىرلىعىنىڭ جەمىسى, – دەيدى ورتالىقتىڭ بىلىكتى باسشىسى زايتۋنا حاميدۋللينا.
جوعارىدا ايتىپ وتكەنىمىزدەي, دەنساۋلىق ساقتاۋدى دامىتۋ جونىندەگى رەسپۋبليكالىق ورتالىقتىڭ رەيتينگى بويىنشا, №3 پەريناتالدىق ورتالىقتا انا مەن بالانىڭ شەتىنەۋ وقيعاسى بولماعان. جاڭا تۋعان بالالاردى جەتىلدىرۋ, انالاردى ساۋىقتىرۋ ساپاسى ەلىمىز بويىنشا ەڭ جوعارعى كورسەتكىش دارەجەسىنە جەتكەن.
كادرلاردىڭ بىلىكتىلىگى جوعارى بولسا, ورتاق ءىستىڭ جەمىسى دە ماۋەلى بولماق. №3 پەريناتالدىق ورتالىقتاعى اكۋشەر-گينەكولوگتاردىڭ 60-70 پايىزى ءبىر ورتالىقتا ۇزاق ۋاقىت قىزمەت اتقارىپ, تاجىريبە جيناقتاعان ساليقالى ماماندار كورىنەدى. ارينە, وقۋ ورىندارىندا العان بىلىمدەرىن تاجىريبەمەن ۇشتاستىرۋعا ۇمتىلعان جاستار دا بارشىلىق. دەگەنمەن, ورتالىقتاعى انا مەن بالانىڭ دەنساۋلىعىن ساقتاۋ جولىنداعى جوعارى ساپاعا قول جەتكىزۋدە ءوز ىسىنە شىنايى بەرىلگەن, ۇزاق ۋاقىت وسى ورايدا ىزدەنىستى جۇمىس اتقارعان تاجىريبەلى مامانداردىڭ ۇلەسى زور ەكەندىگى داۋسىز. وسى رەتتە ايگۇل دۇيسەمباەۆا, حاليدا ءشارىپوۆا, ەلەنا تيحوميروۆا, ەكاتەرينا كونكوۆا, قارلىعاش اعىباەۆا, باقىت اناپينا, ءاسيا سماعۇلوۆا سياقتى تاجىريبەلى دارىگەرلەردىڭ, جانار شىنداليەۆا, گالينا ترۋشەۆنا, ناتاليا احريمەنكو سياقتى ورتا بۋىن اكۋشەرلەردىڭ ەسىمىن ەرەكشە اتاپ وتكەن ورىندى. بۇگىنگى كوكتەم مەرەكەسى, 8 ناۋرىز – حالىقارالىق ايەلدەر كۇنى قارساڭىندا ومىرگە ادام اكەلەتىن بۇل ابزال جانداردىڭ ەڭبەگى ودان ءارى جانا بەرسىن.
«№3 پەريناتالدىق ورتالىق ورنالاسقان عيماراتتىڭ سالىنعانىنا ەلۋ جىلعا جۋىقتاپتى. وسى رەتتە جاڭا عيماراتقا كوشۋ ويلارىڭىزدا جوق پا؟», – دەگەن سۇراعىمىزعا دا باس دارىگەردىڭ جاۋابى تياناقتى بولدى.
– مەديتسينالىق مەكەمەلەردىڭ ماتەريالدىق بازاسىن نىعايتۋ دەگەنىمىز, ەسكىنىڭ ءبارىن سىرىپ تاستاۋ ەمەس قوي. مىنە, وزدەرىڭىز كوردىڭىزدەر, ءبىزدىڭ ورتالىقتىڭ بارلىق بولىمشەلەرى كىرسە شىققىسىز, سىڭعىرلاپ تۇر. بولمەلەر تازا, جارىق ءارى جىلى. مۇنىڭ ءبارى 2013 جىلى قالالىق اكىمدىكتىڭ كومەگىمەن جاسالعان كۇردەلى ەۋروپالىق جوندەۋدىڭ ناتيجەسى. بولىمدەردەگى ينجەنەرلىك كوممۋنالدىق قىزمەتتىڭ جۇمىسى دا كىدىرىسسىز. شارۋاشىلىق جونىندەگى ورىنباسارىم گۇلنار بەلگىباەۆانىڭ تىنىمسىز قاراكەتىنىڭ ارقاسىندا ءبىز كوممۋنالدىق جۇيەلەردىڭ توقىراۋىن سەزىپ كورگەنىمىز جوق, دەدى باس دارىگەر.
– ءبىزدىڭ 500-گە جۋىق ادام ەڭبەك ەتەتىن ۇجىمىمىز ىسكەرلىك پەن ۇجىمشىلدىقتى ۇشتاستىرا وتىرىپ, سوڭعى جىلدارى مەديتسينالىق قىزمەت كورسەتۋدىڭ جوعارى ساپالىق دەڭگەيىنە شىقتى. بۇل, ەڭ الدىمەن, ۇجىمعا باسشىلىققا كەلگەن زايتۋنا حاميدۋللينانىڭ تاجىريبەسى مەن ىسكەرلىگىنىڭ ارقاسى, – دەيدى وسى ساتتە اڭگىمەگە ارالاسقان باس دارىگەردىڭ ەمدەۋ شارالارى جونىندەگى ورىنباسارى ايگۇل دۇيسەمباەۆا.
استانالىق اياعى اۋىر انالار اراسىندا نارەستەمدى №3 پەريناتالدىق ورتالىقتا ومىرگە اكەلسەم دەگەن استارلى ارمان بار ەكەن. بۇل – وسى ورتالىقتاعى انا مەن بالا ءومىرىنىڭ اراشاشىسىنا اينالعان تاجىريبەلى اكۋشەر-گينەكولوگتار ەڭبەگىنە دەگەن باعا, شىن مانىندەگى اق حالاتتى ابزال جاندارعا دەگەن شىنايى سەنىم. وتكەن جىلى وسى ورتالىقتا دۇنيەگە كەلگەن 7 مىڭ ءسابي سول اقيقاتتىڭ ايناسى بولسا كەرەك.
جىلقىباي جاعىپار ۇلى,
«ەگەمەن قازاقستان».
سۋرەتتەردە №3 پەريناتالدىق ورتالىقتىڭ باس دارىگەرى ز.حاميدۋللينا جانە ورتالىقتان كورىنىس.
