«سارىارقا» «براتينا كۋبوگىنىڭ» شيرەك فينالىنا شىقتى

استانا. 6 ناۋرىز. جوعارى حوككەي ليگاسىندا (جحل) وينايتىن قاراعاندىنىڭ «سارىارقاسى» جارىستىڭ شيرەك فينالىنا شىقتى. بۇل تۋرالى egemen.kz حابارلادى. پلەي-وفف كەزەڭىنىڭ العاشقى ساتىسىندا «سارىارقا» چەليابينسكىنىڭ «چەلمەتىمەن» تالاسقا ءتۇستى. العاشقى ءۇش ويىندا جەڭىسكە جەتكەن قاراعاندىلىقتار ءتورتىنشى جانە بەسىنشى كەزدەسۋلەردە جەڭىلۋگە ءماجبۇر بولدى. ال بۇگىن چەليابينسكىدە بولعان التىنشى ويىندا ءبىزدىڭ كوماندا قارسىلاستارىن جۇندەي ءتۇتتى. ءبىرىنشى جانە ەكىنشى كەزەڭدەردە التى شايبا سوعىپ ۇلگەرگەن «سارىارقا» ويىننىڭ سوڭعى بولىگىندە تاعى ءبىر مارتە ناتيجەلى سوققى جاسادى. ايدىن يەلەرى «سارىارقانىڭ» جەتى شايباسىنا ەكىنشى كەزەڭدە سوققان جالعىز گولمەن عانا جاۋاپ بەردى. ويىن بارىسىندا «سارىارقا» ساپىنان ەۆگەني رىمارەۆ حەت-تريك اتانسا, سەرگەي وگورودنيكوۆ ەكى رەت مەرگەندىگىمەن كوزگە ءتۇستى. ودان بولەك, ەۆگەني بەلۋحين مەن ميحايل پانشين ەنشىلەرىنە ءبىر شايبادان جازدى. ايتا كەتەيىك, «سارىارقا» بيىل جحل-دىڭ تۇراقتى ليگاسىن جەڭىپ الدى. 52 ويىننان 110 ۇپاي جيعان كوماندا ەكىنشى ورىن العان يجەۆسكىنىڭ «يجستالىنەن» 15 ۇپاي وزىپ كەتتى. سونداي-اق, «براتينا كۋبوگىنىڭ» قازىرگى يەگەرلەرى دە وسى قاراعاندىلىق حوككەيشىلەر ەكەنى بەلگىلى. «سارىارقامەن» قاتار, سايىستىڭ بۇل كەزەڭىندە تاعى ءبىر قازاقستاننىڭ كومانداسى ونەر كورسەتتى. ول – وسكەمەننىڭ «قازتسينك-تورپەدوسى». وكىنىشكە قاراي, اتالعان كوماندا 1/8 فينالدان اسا المادى. وسكەمەندىكتەر ءتورت ويىننان تۇرعان تارتىستا «يجستالعا» ەسە جىبەردى. ەلامان قوڭىر. دەرەك: egemen.kz. سۋرەت: vhlru.ru.