«بارىس» «اۆانگاردپەن» بەسىنشى ويىندا ەسە جىبەردى

استانا. 6 ناۋرىز. قۇرلىقتىق حوككەي ليگاسىنىڭ پلەي-وفف ساتىسىندا باق سىنايتىن «بارىس» ومبىنىڭ «اۆانگاردىمەن» بولعان بەسىنشى ويىندا 0:2 ەسەبىمەن جەڭىلدى. بۇل تۋرالى egemen.kz حابارلادى. ومبىدا وتكەن ويىن بىردەن ايدىن يەلەرىنىڭ شابۋىلىمەن باستالدى. تارتىستىڭ باستالعانىنا نەبارى 34 سەكۋند ۋاقىت وتكەندە ەسەپ اشىلدى. الەكساندر پوپوۆتان پاس العان چەد كولاريك «بارىس» قاقپاسىنان ساڭىلاۋ تاپتى. ەكىنشى كەزەڭ تەڭ جاعدايدا ءوربىدى. استانالىقتار ەسەپتى تەڭەستىرەتىن بىرنەشە مۇمكىندىككە يە بولعانىمەن, «اۆانگارد» قاقپاشىسى دەنيس كوستيننىڭ وسال تۇسىن تابا المادى. ويىن بارىسىندا 32 سوققىنى قايتارعان كوستين پلەي-وفف كەزەڭىندە العاش رەت قاقپاسىنا گول جىبەرگەن جوق. ويىننىڭ 31-مينۋتىندا الەكساندر پەرەجوگين مەرگەندىگىمەن كوزگە ءتۇسىپ, ايدىن يەلەرى ەسەپتى 2:0-گە جەتكىزدى. شەشۋشى كەزەڭدە اندرەي نازاروۆتىڭ شاكىرتتەرى «اۆانگاردقا» قارسى ەشقانداي شارا قولدانا المادى. ءتىپتى وسى كەزەڭدە ەكى مارتە ويىنشى باسىمدىعىنا يە بولعانىنا قاراماستان, تابلوداعى ەسەپ وزگەرىسسىز قالدى. بۇل جەڭىسىنەن كەيىن قوس كوماندا اراسىنداعى ايقاستىڭ جالپىەسەبى ومبى كومانداسىنىڭ پايداسىنا 3:2-گە جەتتى. ايقاستىڭ كەلەسى «سەرياسى» 8 ناۋرىزدا استانادا وتەدى. سول ويىندا «بارىسقا» تەك جەڭىسكە جەتۋ كەرەك. جەڭىلگەن جاعدايدا جارىستى «اۆانگارد» جالعاستىرادى. ەگەر جەڭىس ءبىزدىڭ كوماندانىڭ ەنشىسىندە كەتسە, قارسىلاستار شەشۋشى جەتىنشى ويىنعا جۇگىنەدى. ەلامان قوڭىر. دەرەك: egemen.kz. سۋرەت: hawk.ru.