ءۇش مارتە ەگىز تۋعان انا

باياعىدا اۋىلعا بارساڭ, ءۇي سايىن الدىڭنان التىن القا تاققان انالار شىعاتىن. ءبىر ءۇيدىڭ تورىندە 7-8 بالا قاتار اسىر سالىپ, ۇلكەنىنە سىيماي قالعان كاستومدى ورتانشىسى كيىپ, كەڭ شالباردىڭ بالاعىن قايىرىپ العان كەنجەسى اياعىنا ءىلىپ ەپتەسىپ-سەپتەسىپ ءوسۋشى ەدى. كوپبالالى وتباسى شەتىنەن ەڭبەكقور, پىسىق, قاناعاتشىل, نامىسشىل بوپ كەلەدى. قايتا ءبىر-ەكى بالامەن شەكتەلگەن جۇبايلارعا ەل ول كەزدە وسقىرىنا قارايتىن. «قۇداي بەرمەي جاتقان شىعار, ايتپەسە جاس قوي, ءتايىرى...» دەپ سىرتىنان مۇسىركەپ جاتاتىن. ءبىز اڭگىمە ەتكەلى وتىرعان رايكۇل اپاعا اللا تاعالام قۇرساعىنا بەرەكەسىن ەرەكشە دارىتىپ تۇرعان سول ءبىر جىلدارى بەس مارتە قۇرساق كوتەرىپتى. بەس بالانى ول جىلدارى كىم تاپپادى دەيتىن شىعارسىزدار. بىراق, رايكۇل اپانىڭ ءجونى بولەك. بەسەۋدىڭ ۇشەۋىندە ەگىز بالالاردى دۇنيەگە اكەلىپتى. تۇلا بويى تۇڭعىشى گۇلجانىن بوسانعاننان كەيىن اراعا ەكى جىل سالىپ, نۇرلانى ىڭگالادى. سوسىن ارالارىنا ەكى-ءۇش جىل سالىپ, ءۇش ەگىز بىرىنەن كەيىن ءبىرى جارىق دۇنيە ەسىگىن اشتى. الدىمەن اسان مەن ۇسەن, سوسىن ەرجان مەن نۇرجان, سوڭىنان ەلميرا مەن گۇلميرا... وكىنىشتىسى, گۇلميراسى 6 ايلىعىندا شەتىنەپ كەتتى. بۇگىندە تۇرسىنقۇل اعا مەن رايكۇل اپادان تاراعان پەرزەنتتەردىڭ ءبارى وتباسىلى, ۇلدارى ۇيلەنىپ, قىزدارى تۇرمىس قۇرىپ, ءبىر-ءبىر وتباسىنىڭ يەسى بولىپ وتىر. – اۋىلدا ۇلكەن بالام نۇرلاننىڭ قولىندا تۇرامىن, – دەيدى رايكۇل اپا اعىنان جارىلىپ. – اللاعا مىڭ مارتە شۇكىرشىلىك, 26 نەمەرەم, 2 شوبەرەم بار. شالىم بىلتىر قايتىس بولدى. ءومىر بويى كەڭشاردا شوپىر بولىپ جۇمىس ىستەپ ەدى. سەگىز بالا تۋدىم ەكەن دەپ جۇمىستان قول ۇزگەنىم جوق. ءوزىم وسى اۋىلداعى تاۋىق فەرماسىندا ەڭبەك ەتتىم. ەڭبەگىمىزدى ەلەگەنى بولار سول جىلدارى دەپۋتات تا بولىپ سايلاندىم. «ەڭبەك ارداگەرى» مەدالىمەن دە ماراپاتتالدىم. سول جۇمىسىمنان زەينەتكەرلىككە شىقتىم. ەلباسى نۇرسۇلتان نازارباەۆقا ايتار العىسىم زور. ەلىمىز امان, جۇرت تىنىش. وسىناۋ بەيبىت زاماندا ۇل-قىزدارىمنىڭ ءبارى ەڭبەك ەتىپ, نەسىبەسىن تەرىپ, ىنتىماعى جاراسقان وتباسى بولدى. ەلباسىنىڭ جارلىعى بويىنشا 2010 جىلى «التىن القاعا» يە بولدىم. بالا-شاعا, نەمەرە-شوبەرەلەر ءجيى كەپ, جاعدايىمدى سۇراپ تۇرادى. ءۇش نەمەرەم تۇرمىس قۇردى. نەمەرەلەرىمنىڭ ءبىرازى جوعارى وقۋ ورىندارىندا وقىپ جاتىر. كەلىندەرىمە «مەن وتىز جاسقا دەيىن بالا تۋدىم. سوسىن جۇمىس ىستەدىم. ەگەر قىرىق جاسقا دەيىن تۋعانىمدا بالا-شاعانىڭ كوپتىگىنەن بۇگىندە ميلارىڭ اشىپ كەتەر ەدى. ءار بالانىڭ ءوز نەسىبەسى بار. سوندىقتان بالا تۋ ماسەلەسىن شەكتەمەڭدەر, اينالايىندار» دەپ, ۇنەمى اقىلىمدى ايتىپ وتىرامىن. قازىر دە ەل ىشىندە «التىن القا» تاققان انالار از ەمەس قوي. حالىق سانى جىلدان-جىلعا ءوسىپ كەلەدى. ايتپاقشى, ەگىزدەردىڭ تۇقىم قۋالايتىنى راس ەكەن. ۇلكەن قىزىم گۇلجان دا ءبىر ۇل, ءبىر قىزدى ەگىز بوسانىپ, ەسىمدەرىن ارۋجان, باۋىرجان دەپ قويدى. قازىر ەكەۋى ەسەيىپ, الماتىدا بانك سالاسىندا قىزمەت ەتىپ ءجۇر. ءبىر قىزىعى, رايكۇل اپانىڭ بالالارى شەتىنەن «سولدات». ياعني, قازاقستان قارۋلى كۇشتەرىندە قىزمەت ەتەدى. نۇرلانى جۇبايىمەن تاراز قالاسىنداعى اسكەري بولىمشەدە جۇمىس ىستەيدى. ەرجانى دا اسكەردە تەحنيكا جاعىنان مامان. اسان مەن ۇسەننىڭ دە ۇستەرىندە اسكەري كيىم. ولار دا وسى سالانىڭ قىزمەتكەرلەرى. نۇرجانى دا كۇنى كەشەگە دەيىن اسكەري بولىمدە جۇمىس ىستەپ, سوڭعى كەزدەرى عانا باسقا سالاعا اۋىسىپتى. ال, ەلميرا بالاباقشادا تاربيەشى, گۇلجان ءۇي شارۋاسىندا. «بەس بالانىڭ اناسىن «جانىم» دەسەڭ بولماي ما, ون بالانىڭ اناسىن «حانىم» دەسەڭ بولماي ما؟» دەپ اقىن جىرلاعانداي, شىنىندا سەگىز بالانى دۇنيەگە اكەپ, جەتەۋىن ءوسىرىپ-تاربيەلەپ, جەتكىزگەن رايكۇلدەي انالار كەز كەلگەن قۇرمەتكە لايىق. پرەزيدەنتىمىز ن. نازارباەۆ «وتباسى – وتە ۇلى قۇندىلىق. مىڭجىلدىقتار مەن عاسىرلاردان بەرى وتباسى ءاربىر قوعامنىڭ ۇرپاقتان-ۇرپاققا جالعاسقان مورالدىق سالتتاردىڭ, ۇلتتىق داستۇرلەردىڭ ساقتاۋشىسى بولىپ تابىلادى» دەپ, شاعىن شاڭىراقتىڭ دا ەل بىرلىگىنە قوسار ۇلەسى زور ەكەنىن, اتا-انالاردىڭ جۇرگىزىپ جاتقان وتباسىلىق تاربيە مەن ءتالىمىنىڭ ءرولى ەرەكشە ەكەنىن باسا ايتتى. راسىندا وتباسى – تاربيە مەكتەبى. ۇرپاقتىڭ زيالى بولىپ وسۋىندە اتا مەن انانىڭ الاتىن ورنى ەرەكشە. اللاعا شۇكىرشىلىك, رايكۇل اپا بۇگىندە بەينەتىنىڭ زەينەتىن كورىپ, بالداي ءتاتتى نەمەرە-شوبەرەلەرىنە ءتالىمدى تاربيە بەرۋدەن جالىققان ەمەس. ورالحان ءداۋىت, «ەگەمەن قازاقستان». جامبىل وبلىسى, بايزاق اۋدانى, كوكتال اۋىلى.