باتىس قازاقستاندا پوليتسيا قىزمەتكەرى ادام ءولتىردى

ورال. 6 ناۋرىز. باتىس قازاقستان وبلىسىندا پولتسيا قىزمەتكەرى ادام ءولتىرىپ, التى جىلعا سوتتالدى. بۇل تۋرالى egemen.kz ءتىلشىسى حابارلادى. باتىس قازاقستان وبلىستىق سوتىنىڭ ءباسپاسوز قىزمەتىنىڭ مالىمەتىنە سۇيەنسەك, وقيعا جەلىسى بىلاي وربىگەن. پريۋرال پوليتسيا ءبولىمى ۋچاستكەلىك ينپەكتورىنىڭ كومەكشىسى ە.عابباسوۆ يانۆارتسەۆ اۋىلىندا تۇراتىن جۇمىس ىستەمەيتىن ازاماتتى ءوزىنىڭ ۇيىنە قىزمەتشى ەتىپ العان. العاشقىدا ءبارى جاقسى بولعانىمەن كۇندەر وتە كەلە ول ونى «وتىرسا وپاق, تۇرسا سوپاق» جاساپ, ەكى اياعىن ءبىر ەتىككە تىققانداي كۇي كەشتىرەدى. قىزمەتشى دە ءتىرى جان ەمەس پە؟! ءبىر دە ول ءتارتىپ ساقشىسىنىڭ مازاعى مەن قورلىعىنا شىداي الماي ءوز نامىسىن قورعاي وتىرىپ قاتقىلداۋ سوزدەر ايتىپ قالادى. وسى كەزدە كوپ سوزگە كەلمەگەن پوليتسيا وكىلى وعان كوپتەگەن دەنە جاراقاتتارىن سالادى. مۇنىمەن دە تىنباي جابىرلەنۋشىنىڭ باس تۇسىنا اۋىر سوققىلار جاسايدى. سونىڭ سالدارىنان جابىرلەنۋشى ءولىپ كەتكەن. زەلەنوۆ اۋداندىق سوتىنىڭ ۇكىمىمەن ە.عابباسوۆ ابايسىزدا جابىرلەنۋشىنىڭ ولىمىنە سوقتىرعان قاساقانا اۋىر دەنە جاراقاتىن سالعانى ءۇشىن قر قىلمىستىق كودەكسىنىڭ ءتيىستى بابى بويىنشا التى جىلعا سوتتالدى. ول جازاسىن جالپى تارتىپتەگى تۇزەۋ كولونياسىندا وتەيدى. ۇكىم ءالى زاڭدى كۇشىنە ەنگەن جوق. تەمىر قۇسايىن. دەرەك: egemen.kz. سۋرەت: sud.gov.kz.