ەلىمىز ەكونوميكاسىنىڭ تۇتقاسىن ۇستاۋشى جاس مامانداردى وتانسۇيگىشتىككە, پاتريوتتىق رۋحتا, جوعارى ازاماتتىق قاسيەتتەرگە تاربيەلەۋ ماقساتىنداعى ىستەردى دايەكتى جۇرگىزۋىمەن تانىمال قاراعاندى مەملەكەتتىك تەحنيكالىق ۋنيۆەرسيتەتىندە تاعىلىمدى مادەني شارا بولدى. « ۇلى وتان سوعىسى. ءححى عاسىر جاستارى كوزىمەن» اتتى تاقىرىپتا وتكەن بۇل V رەسپۋبليكالىق ستۋدەنتتىك عىلىمي-تاجىريبەلىك كونفەرەنتسيا قاتىسۋشىلارعا ۇمىتىلماستاي اسەر ەتۋىمەن ەستە قالدى. وندا سوعىس جانە تىل ارداگەرلەرى ەل باسىنا تۇسكەن سىن كەزەڭدەگى ەرلىكتەرى مەن ەرەن ەڭبەكتەرى تۋرالى ەستەلىكتەر ايتىپ, سان الۋان سۇراقتارعا قايتارىلعان جاۋاپتار ەركىن اڭگىمەگە جالعاستى. «ءبىز جاستارىمىزدىڭ اعا بۋىننىڭ قايسارلىق پەن جالىندى جىگەرىن قاستەر تۇتۋىنا سۇيسىنەمىز. بۇگىندە كوركەيۋدەگى ەلىمىزدى ودان ءارى دامىتۋعا دەگەن ىنتا-ىقىلاستارىڭىز كوڭىل قۋانتادى. ۇرپاقتان-ۇرپاققا ۇلاسقان ءۇردىس-ۇلگىسى جارقىراي بەرۋىن تىلەيمىز», دەدى كومىر ءوندىرىسىنىڭ ءىرى ۇيىمداستىرۋشىسى بولعان نيكولاي دريدج اقساقال.
بۇدان سوڭ سەكتسيالىق ماجىلىستەردە ۋنيۆەرسيتەت وقىتۋشىلارى مەن ستۋدەنتتەرى جەڭىسكە قاراعاندىلىقتاردىڭ قوسقان ۇلەستەرى جايلى تىڭ دەرەكتەرگە نەگىزدەلگەن باياندامالارىن تىڭداۋشىلار نازارىنا ۇسىندى. سونداي-اق, كونفەرەنتسياعا قاتىسۋشىلار جىل سايىن وتەتىن ءداستۇرلى ونەر بايقاۋىنا شاقىرىلىپ, بەيبىتشىلىك بەسىگىندە تەربەلگەن ءبىلىم مەن ونەردىڭ قوسا ءورىلۋىن تاماشالادى. ارداگەرلەر جاستاردىڭ جان-جاقتى رۋحاني وسۋىنە ءسۇيسىنىس ءبىلدىردى.
ايقىن نەسىپباي, «ەگەمەن قازاقستان».
قاراعاندى.
