داعدارىستان دامۋعا جول تابايىق

نۇربەك ايىمبەتوۆ, «ارال سەرۆيس دايىنداۋ ورتالىعى» جشس باس ديرەكتورى. ەلباسى نۇرسۇلتان نازارباەۆ وسىدان ءبىراز بۇرىن ەلدە الدە­قانداي ەكونوميكالىق قيىندىق ورناي قالسا, ونى حالىققا تۋرا ايتاتىنىن مالىمدەگەن ەدى. قازاق­ستان جاڭا ەكونوميكالىق ساياساتقا كوشكەنىن بىلەمىز. وسىعان وراي مەم­لەكەت باسشىسى ۇكىمەت مۇشە­­لەرىمەن جانە ەلىمىزدەگى ءىرى كاسىپ­كەرلەرمەن كەزدەستى. كەزدەسۋ بارىسىندا قازىرگى ەكونوميكالىق جاعدايعا بايلا­نىس­تى قاداۋ-قاداۋ ماسەلەلەر ايتىلدى. ەڭ الدىمەن مۇنداي جاعداي­عا ماجبۇرلىكتەن بارىپ وتىر­عا­نى­مىزدى ايتۋ كەرەك. ويتكەنى, الەم­دىك ەكونوميكالىق داعدارىس قان­شا باعىنبايمىن دەسەڭ دە ءوز دە­گەنىن جاسايدى. سوندىقتان, قازاق­ستاننىڭ الدىندا ءۇش تاڭداۋ تۇردى. ءبىرىنشى, ەشتەڭە ىستەمەي, تەڭگە باعامىن ۇستاپ تۇرۋ جانە جاعدايدىڭ جاقسارعانىن كۇتۋ. بىراق, مۇنداي ساياساتتىڭ وتەمى دە وڭاي ەمەس ەدى. ويتكەنى, ونىڭ سوڭى ءوندىرىستى قىسقارتىپ, جۇمىس ورىندارىنان ايىرىلۋعا جانە التىن-ۆاليۋتا قورىن تۇگەسۋگە اكەپ سوعاتىن. ەكىنشى, تەڭگە باعامىن بىرتىندەپ السىرەتۋ. سىرتقى نارىقتارداعى احۋال ناشار ءارى بەلگىسىز بولىپ تۇرعاندا مۇنداي جول دا التىن-ۆاليۋتا قورىن كوپ شىعىندايدى. سوندىقتان, قولدا بار مۇمكىندىكتەردىڭ ءبارىن ەسەپتەي كەلە, مەيلىنشە دۇرىسى تەڭگەنىڭ ەركىن ايىرباس باعامىن ەنگىزۋ جانە ينفلياتسيالىق تارگەتتەۋگە كوشۋ دۇرىس دەپ تانىلعان. «بۇگىنگى تاڭدا بىزدە بۇدان باسقا بالاما بولعان جوق. ءبىز بارلىق باعدارلامالارىمىزدى باسقاشا جوسپارلاعانىمىزدى بىلەسىزدەر. الايدا, داعدارىس ارقاشان ءوز تۇزەتۋىن ەنگىزەدى. دەگەنمەن, ءبىز جاعدايدىڭ بۇلايشا وربۋىنە دە دايىندالدىق. يندۋستريالىق-يننوۆاتسيالىق باعدارلاما جانە وڭدەۋشى ونەركاسىپتى كەڭەيتۋ, ۇلت­تىق قور قۇرۋ – وسىنىڭ ءبارى وسىن­داي احۋالعا كۇنى بۇرىن جاسال­­عان دايىندىق», – دەدى ەلباسى. قازاقستان تاۋەلسىزدىك العاننان بەرى بۇدان دا زور داعدارىستاردان امان شىققان. سول سەبەپتى بۇگىنگى جاعدايدان اسا ءبىر قورقىنىش تۋماسا كەرەك. ەڭ باستىسى, ەلدىڭ تىنىشتىعى مەن بەيبىتشىلىگى. ويتكەنى, داعدارىس كەلەدى, كەتەدى. ال مەملەكەت – ماڭگىلىك. قىزىلوردا وبلىسى.