اپاتقا ۇشىراعان «پروتون» زىمىرانىنا قاتىستى كومميسيا ىسكە كىرىستى

الماتى. 18 مامىر. «پروتون-م» زىمىران تاسىعىشىنىڭ اپاتقا ۇشىراۋىنا بايلانىستى مەملەكەتتىك كومميسسيا ىسكە كىرىستى. كومميسسيانى «روسكوموس» مەكەمەسىنىڭ ءبىرىنشى باسشىسى يگور كوماروۆتىڭ ءوزى باسقارادى. بۇل تۋرالى ريا "نوۆوستي" حابارلادى. اپاتتىڭ ماڭىزدىلىعىنا وراي كومميسسيانىڭ قۇرامىنا رەسەي فەدەراتسياسى ۇكىمەتىنىڭ جانىنداعى اسكەري-ونەركاسىپ مەكەمەسىنىڭ, زىمىران-عارىشتىق بىرلەستىگىنىڭ, سونداي-اق, زىمىران عارىشتىق كاسىپورىندار مەن ينستيتۋتتاردىڭ وكىلدەرى كىردى. مەكسيكالىق MexSat-1 جەر سەرىگى تىركەلگەن «پروتون-م» زىمىران تاسىعىشى 16 مامىر كۇنى تاڭەرتەڭ «بايقوڭىر» عارىش ايلاعىنان ۇشىرىلعان. رەسمي مالىمەتتەرگە قاراعاندا, ۇشۋ بارىسىنىڭ 497 سەكۋندىندا بايلانىس ۇزىلگەن. بۇل مەزەتتە زىمىران-تاسىعىشتىڭ ءۇشىنشى ساتىسىنىڭ اجىراۋىنا, ياعني زىمىراننىڭ عارىش كەڭىستىگىنە شىعۋىنا 1 مينۋت ۋاقىت قالعان. ءبىر مالىمەتتەر بويىنشا زىمىران ۇشۋ تراەكتورياسىندا تولىقتاي كۇلگە اينالعان, ەندى ءبىر مالىمەتتەر بويىنشا زىمىراننىڭ كەسەك-كەسەك قالدىقتارى بايكال كولىنىڭ ماڭىنا قۇلاۋى مۇمكىن. «روسكوسموستىڭ» ءباسپاسوز قىزمەتى ءبىرىنشى مالىمدەمەسىندە مەكسيكالىق جەر سەرىگى مەن ۇشۋ باعدارلاماسى الدىن-الا ساقتاندىرىلعانىن حابارلاپ ۇلگەردى. اپاتقا ءۇشىنشى ساتىداعى قوزعاۋشى اپپاراتتتىڭ زاقىمدانۋى سەبەپ بولعان دەگەن بولجامدارعا قاراماستان, مەملەكەتتىك كومميسسيا ازىرگە بۇل تۋرالى ەشقانداي دا مالىمەت تاراتقان جوق. تالعات ءسۇيىنباي. دەرەك, سۋرەت: ريا "نوۆوستي".