سامات سماقوۆ: مەركەل ۇلتتىق قۇرامانىڭ ويىنىنا تىڭ سەرپىن بەرەدى

استانا. 4 ناۋرىز. جاقىندا عانا قازاقستان فۋتبول فەدەراتسياسى نەمىس فۋتبولشىسى الەكساندر مەركەلدىڭ ۇلتتىق قۇراماعا قوسىلعانىن مالىمدەدى. وسى تۋرالى ەلىمىزدەگى ەڭ تانىمال فۋتبولشىلاردىڭ ءبىرى, ۇلتتىق قۇرامانىڭ كاپيتانى سامات سماقوۆ ءوز ويىمەن ءبولىستى. بۇل تۋرالى kff.kz حابارلادى. – مەنىڭشە, يتاليانىڭ «ا» سەرياسىندا كەز كەلگەن ادام وينامايدى. ونىڭ ۇستىنە, «ميلاننىڭ» نەگىزگى قۇرامىنا ىلىگۋ ناعىز شەبەرلىكتى تالاپ ەتەدى. ال الەكساندر وسىنىڭ بارىنەن وتكەن فۋتبولشى. سوندىقتان ول ءبىزدىڭ ۇلتتىق قۇرامانىڭ ويىنىنا تىڭ سەرپىن بەرەرى ءسوزسىز, – دەيدى تاجىريبەلى فۋتبولشى. سونىمەن قاتار, سامات سماقوۆ نەمىس فۋتبولشىسى تۋارلى بىلەتىن دەرەكتەرىمەن ءبولىستى. «جالپى, الەكساندرمەن جەكە تانىس ەمەسپىن. سول سەبەپتى, ول تۋرالى جانكۇيەرلەر مەن ءبىزدىڭ باسقا فۋتبولشىلارعا بەلگىلى دەرەكتەردى عانا بىلەمىن. ياعني, ونىڭ الماتىدا دۇنيەگە كەلگەنىن, كەيىن اتا-اناسىمەن گەرمانياعا كوشىپ كەتكەنى جايلى حاباردارمىن. سونداي-اق, «شتۋتگارتتىڭ» جاستار كومانداسىندا شەبەرلىگىمەن كوزگە ءتۇسىپ, سونىڭ ناتيجەسىندە, «ميلانعا» اۋىسقان. قازىر ول يتاليانىڭ «ۋدينەزە» كومانداسىنا تيەسىلى فۋتبولشى. ايتسە دە, شۆەيتساريانىڭ «گراسسحوپپەر» كومانداسىنا جالعا بەرىلگەن ەكەن. فۋتبولشىنىڭ ويىنىن ءالى كورىپ ۇلگەرمەدىم», – دەگەن سامات مامانداردىڭ مەركەلدىڭ ويىنىنا وڭ باعا بەرىپ جاتقانى كوڭىل قۋانتاتىنىن ايتتى. «سونداي-اق, الەكساندر گەرمانيا قۇراماسىنىڭ جاسوسپىرىمدەر مەن جاستار كوماندالارىندا ويناعان فۋتبولشى. بۇل مول تاجىريبە. سول تاجىريبەنىڭ قازاقستان ۇلتتىق قۇراماسىنداعى ويىنىنا پايداسى تيەرىنە سەنىمدىمىن. گەرمانيا ءوز ۇلتتىق قۇراماسى ءۇشىن فۋتبولشى دايىنداۋدا الەمدە الدىڭعى قاتاردا. ءتىپتى بۇل ماسەلە ول جاقتا بەلگىلى ءبىر جۇيەگە قويىلىپ, جەمىستى جۇمىس ىستەۋدە. ونى ءبىلۋ ءۇشىن بىلىكتى فۋتبول مامانى بولۋدىڭ دا قاجەتى شامالى. ءتىپتى بۇگىندە بۋندەستيم تۋرالى, نەمىس فۋتبولىنىڭ قارقىنى جايىندا بىرەۋگە ءتۇسىندىرىپ جاتۋدىڭ ءوزى ارتىق. ول ءۇشىن فيفا-نىڭ قازىرگى رەيتينگىنە نازار اۋدارسا جەتكىلىكتى. ال ول جەردە گەرمانيا كوش باستاپ تۇر. سوندىقتان الەكساندردىڭ گەرمانيا قۇراماسىنىڭ جاستار كومانداسىندا ويناۋى ونىڭ بىلىكتى فۋتبولشى رەتىندە وسۋىنە مۇمكىندىك بەردى. سونداي-اق, «ميلان» ساپىندا ءجۇرىپ جوعارى دەڭگەيلى فۋتبولشىلارمەن ءبىر كوماندادا ويناۋدىڭ ءوزى مەركەلگە ومىرلىك تاجىريبە بولعانى انىق. ودان بولەك, الەكساندر ورىس تىلىندە ەركىن سويلەيدى. كومانداعا ءسىڭىسىپ, تەز ءتىل تابىسىپ كەتۋ ءۇشىن ءتىلدىڭ كومەگى زور. ەڭ ماڭىزدىسى, قۇراماداعى وزگە ارىپتەستەرىمەن جانە باس جاتتىقتىرۋشى يۋري اناتولەۆيچپەن وڭاي ءتىل تابىساتىن بولادى», – دەپ ۇلتتىق قۇرامانى كاپيتانى سۋ جاڭا ارىپتەسىنە ساتتىلىك تىلەدى. ەلامان قوڭىر. دەرەك, سۋرەت: kff.kz.