جىلىجايدا ءونىم ءوسىرۋدى قولعا العانداردىڭ ءبىرى – ءزۇلفيا قازيموۆا. بۇرىن بۇل ىسپەن اينالىسىپ كورگەن ەمەس. بۇدان ءۇش جىل ماسكەۋگە بارىپ, جىلىجاي شارۋاشىلىعىنىڭ قىر-سىرىن ابدەن مەڭگەرىپ كەلدى. ەلگە ورالعان سوڭ, اۆتوماتتاندىرىلعان سۋارۋ جۇيەسى بار جىلىجايدا جاسىل جاپىراقتى وسكىن ءوسىرۋدى قولعا الدى. بۇل – ءتۇرلى سالاتقا قولدانىلاتىن جاپىراق. بيىل ونىڭ ءتورت مىڭ كوشەتىن ەكتى.
«سالات جاپىراعىن ءوسىرۋ وڭاي ءىس ەمەس. بۇل ءىستى قولعا العان كەزدە سۋ ساپاسىنا بايلانىستى قيىندىققا تاپ بولدىق. ويتكەنى سۋداعى حلوريد مولشەرى جوعارى بولعاندىقتان, ءونىم كولەمى ازايدى. سول سەبەپتەن سۋدى تازارتاتىن جاڭا قۇرىلعىلار ساتىپ الدىق. قازىر جىلىجايدا زياندى قوسپالاردى سۇزگىدەن وتكىزەتىن «وسموس» جۇيەسى ورناتىلدى. گيدروپونيكا ءادىسىن قولدانامىز. ءار جەلىنىڭ استىندا قورەكتىك ەرىتىندى قۇيىلعان ارنايى ىدىس بار. سول ىدىستاعى ەرىتىندىنى ساعات سايىن جاڭارتىپ وتىرامىز. تۇقىم كۇن سايىن ەگىلەدى. ءونىمدى 29–30 كۇننەن كەيىن الامىز», دەيدى ز.قازيموۆا.
ونىڭ ايتۋىنشا, جىلىجايدا سالات جاپىراعىنىڭ بەس ءتۇرى وسىرىلەدى. كۇن سايىن 500-گە جۋىق قاپتاماعا جاپىراق سالىنادى. ال اي سايىن 1 توننا ءونىم دايىندالادى. بيىل ءبىر قاپتاماداعى جاپىراق باعاسى – 1000 تەڭگە.
«ازىرگە ءوندىرىس كولەمى شاعىنداۋ بولىپ تۇر. ەندى الداعى ۋاقىتتا «دامۋ» قورىنىڭ كومەگىمەن جىلىجاي اۋماعىن 350 شارشى مەترگە جەتكىزۋدى جوسپارلاپ وتىرمىز. سول كەزدە سەگىز قاباتتى جۇيە بولادى. بۇل اتىراۋ قالاسى تۇرعىندارىنىڭ سۇرانىسىن تولىق قامتاماسىز ەتۋگە قول جەتكىزەمىز», دەيدى اتالعان جوبانىڭ سەرىكتەسى ەربول بەردىباەۆ.
اتالعان جىلىجايدى ىسكە قوسقان ءزۇلفيا قازيموۆانىڭ ايتۋىنشا, قازىر مۇندا التى ادام جۇمىس ىستەيدى. ولار دايىنداعان سالات جاپىراعى 20 ساۋدا ورنىنا جەتكىزىلەدى.
ال «ورلەۋ» جەكە كاسىپكەرلىگىنىڭ يەسى قۋانىش ياكۋديننىڭ ايتۋىنا قاراعاندا, جەرگىلىكتى كليماتقا بەيىمدەلىپ, وسىرىلگەن جەمىس تۇرلەرىنە سۇرانىس ارتىپ وتىر. سول سەبەپتەن اگروكەشەندەگى جىلىجايدا قۇلپىناي وسىرىلە باستادى. بيىل مۇندا قۇلپىنايدىڭ ۇزدىكسىز ءونىم بەرەتىن «البيون», «مۋرانو», «كابريللو» تۇرلەرىنىڭ 2000 ءتۇبى ەگىلگەن.
«بۇل جوبانى «اۋىل اماناتى» باعدارلاماسى اياسىندا ىسكە قوستىق. باستاپقىدا جىلىجايدا تاجىريبە جيناۋ ماقساتىندا 200 ءتۇپ قۇلپىناي ەككەن ەدىك. كەيىن كوبەيتە باستادىق. الداعى جوسپارىمىز – جىلىجايدىڭ اۋماعىن كەڭەيتىپ, كوشەت سانىن 4000 تۇپكە جەتكىزۋ. دايىن ءونىمدى الەۋمەتتىك جەلىدەگى پاراقشامىز ارقىلى تۇراقتى تاپسىرىس بەرۋشىلەرگە ۇسىنىپ كەلەمىز», دەيدى ق.ياكۋدين.
اتىراۋ وبلىسى
