تىگىن كەشەنىنىڭ ىشكى تىنىسى, جۇمىسشىلارعا جاسالعان جاعداي مەن ەكسپورتتىق باعىتتاردى بىلمەككە ءوندىرىس الاڭىن ارالاپ, ماماندارمەن اڭگىمە قۇردىق. اۋەلى دايىن ءونىم شىعاراتىن نەگىزگى بولىمدەردىڭ بىرىنە باس سۇقتىق. مۇنداعى تىنىس-تىرشىلىكتى وندىرىستىك تسەح شەبەرى نۇراي جانپەيىس تاپتىشتەپ ايتىپ بەردى.
ء«بىزدىڭ تسەحتا 75–80 ادام ەڭبەك ەتەدى. نەگىزگى باعىتىمىز – كلاسسيكالىق ۇلگىدەگى فورمالىق پيدجاك پەن شالبار تۇرلەرىن دايىنداۋ. جۇمىس تاڭعى ساعات 8-دەن كەشكى 17-گە دەيىن سوزىلادى. وسى 8 ساعاتتىق اۋىسىمدا شەبەرحانادان 350 شاقتى دايىن ءونىم شىعارىلادى», دەدى ول.
كاسىپورىندا قىزمەتكەرلەردىڭ قالادان قاتىناۋى تولىق شەشىلگەن, اۆتوبۋس قاراستىرىلعان. ۇجىمعا كومپانيا ەسەبىنەن ىستىق اس بەرىلەدى. تىگىنشىلەردىڭ تابىسى اتقارعان ىسىنە قاراي تولەنەدى, باستاپقى ەڭبەكاقى 200–250 مىڭ تەڭگە كولەمىندە.
«بۇعان قوسا توقسان سايىن بەرىلەتىن سىياقى جۇيەسى بار, ناتيجەلى ەڭبەك كورسەتكەندەر جاقسى بونۋس الادى. مەن بۇل جەردە 7 جىلدان بەرى ەڭبەك ەتىپ كەلەمىن. تىگىنشى بولىپ باستاپ, تاجىريبە جيناقتاپ, شەبەر لاۋازىمىنا دەيىن كوتەرىلدىم. دەمەك, مۇندا جاس مامانداردىڭ وسۋىنە زور قولداۋ كورسەتىلەدى», دەيدى شەبەر.
مۇنداعى ءونىم تەك ەلوردا نارىعىمەن شەكتەلمەيدى, رەسەيگە, تاعى باسقا ەلدەرگە ەكسپورتقا جونەلتىلەدى. شيكىزاتتى تاپسىرىس سيپاتىنا قاراي وتاندىق وندىرۋشىلەردەن جانە كەدەن وداعىنا كىرەتىن كورشى ەلدەردەن دە الادى.
ۇزدىكسىز جۇمىس ىستەپ تۇرعان ماشينالاردىڭ اراسىنان وتىزگۇل قانايقىزى ەسىمدى كوپبالالى انانى اڭگىمەگە تارتتىق. ول ءوزىنىڭ ماماندىعى باسقا بولسا دا, وسى جەرگە كەلىپ, ۇلكەن ونەردى يگەرگەنىن ماقتانىشپەن جەتكىزدى.
ء«بىرىنشى تسەحتا 7 جىلعا جۋىق ۋاقىتتان بەرى تىگىنشى بولىپ جۇمىس ىستەپ كەلەمىن. بۇل سالادان حابارىم از بولسا دا, جانىم قالاعان ءىس ەكەنىن بىلگەندە قىسقا ۋاقىتتا تىگۋدىڭ قىر-سىرىن ۇيرەنىپ كەتتىم. مۇندا بارلىق جاعداي جاسالعان, وزىمە وتە ۇنايدى», دەيدى تىگىنشى.
فابريكادا مىندەتتى مەديتسينالىق ساقتاندىرۋ پاكەتى قاراستىرىلعان. بەلگىلەنگەن ۋاقىتتان ارتىق ساعات جۇمىس ىستەگەن كۇندەرى دەنساۋلىققا قولداۋ رەتىندە ايران-ءسۇت بەرىلەدى ەكەن. تىگىن ماشينالارى زاماناۋي, ىڭعايلى, جۇمىس ىستەۋگە ەش قيىندىق تۋدىرمايدى.
ء«تورت بالانىڭ اناسى, 10 نەمەرەنىڭ اجەسىمىن, وسى ەڭبەگىممەن وتباسىمدى اسىراپ وتىرمىن. ايلىق تابىسىمىز تۇراقتى, جاقسى جۇمىس ىستەپ, ونىمدىلىكتى ارتتىرعان كەزدە 300 مىڭ تەڭگەگە جۋىق تابىس تابۋعا مۇمكىندىك بار», دەدى و.قانايقىزى.
كاسىپورىننىڭ جالپى وندىرىستىك قۋاتى, جابدىقتالۋى, جاڭا تەحنولوگيالاردى يگەرۋ بارىسى مەن كادر دايارلاۋ ماسەلەسى اۋقىمدى مىندەت جۇكتەپ تۇر. فابريكانىڭ تىنىسىن كەڭىنەن اشۋ ماقساتىندا ءوندىرىس باسشىسى ءدىنايشا بەكتىبايمەن تىلدەستىك.
«قازىر رەسەيلىك كومپانيانىڭ ۇلكەن تاپسىرىسىن ورىنداپ جاتىرمىز. ولارعا ارناپ كلاسسيكالىق ۇلگىدەگى فورمالىق ءارى قىسقى ماۋسىمدىق كيىم تىگۋ قولعا الىندى. كەلىسىمشارتتا ناقتى مەرزىم كورسەتىلگەندىكتەن, ارنايى جوسپار قۇرىپ, ءونىمدى ۋاقىتىندا جونەلتىپ وتىرامىز», دەدى ءوندىرىس باسشىسى.
وندىرىستە زاماناۋي تەحنيكاعا, جاڭا تەحنولوگيالارعا باسا ءمان بەرىلگەن. 2023–2024 جىلدارى زاماناۋي اۆتوماتتاندىرىلعان قوندىرعىلار نەگىزىندە شابلوندىق تسەح جۇمىس ىستەيدى ەكەن. بۇل جابدىقتار تىگىس ساپاسىنىڭ 99 پايىز جوعارى بولۋىن جانە ەڭبەك ونىمدىلىگىنىڭ ارتۋىن قامتاماسىز ەتەتىن كورىنەدى.
«مامانداردى دايارلاۋ ىسىنە كەلسەك, ارنايى كوللەدجدەرمەن دۋالدى وقىتۋ جۇيەسىمەن تىعىز بايلانىس ورناتقانبىز. ستۋدەنتتەر وقۋ بارىسىندا بىزدە تاجىريبەدەن ءوتىپ, كەيىن تۇراقتى جۇمىسقا قالادى. ال بۇل سالاعا مۇلدەم قاتىسى جوق, بىراق تىگىن ونەرىن ۇيرەنگىسى كەلەتىن ازاماتتار ءۇشىن ارنايى وقۋ تسەحى اشىلعان. وندا 3–5 كۇن ىشىندە ماشينامەن جۇمىس ىستەۋدى, تىگىس تۇرلەرىن ۇيرەتىپ, نەگىزگى تسەحتارعا جىبەرەمىز», دەدى د.بەكتىباي.
ونىڭ ايتۋىنشا, جۇمىسشىلاردىڭ الەۋمەتتىك جاعدايى نازاردان تىس قالماعان, تۇسكى اس پەن ءتۇس اۋا بەستىڭ شايى كومپانيا ەسەبىنەن تەگىن بەرىلەدى. جىل سوڭىندا نەمەسە ءار 90 كۇن سايىن ناتيجەلى جۇمىس ءۇشىن سىياقى تولەنەدى. ەگەر قىزمەتكەر وتباسى قيىن جاعدايعا تاپ بولسا, كومپانيا تاراپىنان ماتەريالدىق كومەك, ارنايى جاردەماقى ەسەپتەلىپ بەرىلەدى.
«بىلىكتىلىكتى ارتتىرۋ ماقساتىندا شەبەرلەرىمىزدى قىتايعا, رەسەيگە وقۋعا جىبەرىپ تۇرامىز. ەل ىشىندە دە شىمكەنت قالاسىنداعى ارىپتەستەرمەن تۇراقتى تۇردە تاجىريبە الماسۋ جولعا قويىلعان», دەيدى ءوندىرىس باسشىسى.
تىگىن شەبەرحاناسىمەن تانىسۋ بارىسىندا ەلوردالىق ونىمدەردىڭ باسەكەگە قابىلەتتى ەكەنىنە كوز جەتكىزدىك. ىشكى نارىقتى قامتاماسىز ەتىپ, سىرتقى ەلدەرگە دە ءونىم شىعارىپ وتىرعان كاسىپورىننىڭ جۇمىسى – وتاندىق جەڭىل ونەركاسىپتىڭ ىلگەرى باسقانىنىڭ ايقىن كورىنىسى.
