ورالدا كوپقاباتتى ءۇيدىڭ ەكى پاتەردى ءبولىپ تۇرعان قابىرعاسى قۇلاپ قالدى

ورال. 15 مامىر. باتىس قازاقستان وبلىسىنىڭ ورتالىعى – ورالدا مەملەكەتتىك باعدارلاما بويىنشا سالىنعان كوپ قاباتتى ۇيدە ەكى پاتەردىڭ اراسىن ءبولىپ تۇرعان قابىرعا قۇلاپ قالدى. سالدارىنان ايەل ادام مەن ونىڭ ءسابيى زارداپ شەكتى. بۇل تۋرالى uralskweek.kz سايتىنا سىلتەمە جاساپ, egemen.kz ءتىلشىسى حابارلادى. وقيعا كەشە كەشكىسىن جامبىل كوشەسىندەگى 10 قاباتتى ۇيدە بولعان. قابىرعاسى قۇلاعان پاتەرلەر 8-قاباتتا ورنالاسقان. زارداپ شەككەن وتباسى تىلشىلەرمەن كەزدەسۋدەن باس تارتتى. سونداي-اق, ءۇيدى تەكسەرۋگە كەلگەن تۇرعىن ءۇي قۇرىلىس جيناق بانكىنىڭ قىزمەتكەرلەرى دە باق وكىلدەرىنە تۇسىنىكتەمە بەرگەن جوق. ولار بۇل ءۇيدىڭ اتالعان بانك ارقىلى بەرىلگەنىن عانا ايتتى. قازىرگى تاڭدا اپاتتىڭ نەدەن بولعانى بەلگىسىز. كورشىلەرىنىڭ ايتۋىنشا, قاتتى داۋىس ەستىلگەن. ال قابىرعانىڭ قۇلاعانىن ولار كەيىن بىلگەن. توتەنشە جاعدايلار دەپارتامەنتى وقيعانىڭ انىق-قانىعىنا كوز جەتكىزگەن سوڭ ناقتى مالىمەتتەر بەرەتىندەرىن ايتتى. ازىرگە كەلەڭسىز جايت بولعان پاتەردە قايتا جوسپارلاۋ جۇمىستارى جۇرگىزىلگەندىگى تۋرالى اقپارات جوق. تەمىر قۇسايىن. دەرەك: egemen.kz. سۋرەت: mgorod.kz.