الماتىدا جەڭىل ءجۇرىستى قىزدارعا 1 ميلليون تەڭگە ايىپپۇل سالىندى

الماتى. 15 مامىر. وسى اپتانىڭ العاشقى كۇنى الماتىدا باستالعان «قايىرشى» اكتسياسى مامىر ايىنىڭ 21-نە دەيىن جالعاسادى. شارا بارىسىندا جەڭىل ءجۇرىستى 100 قىز اكىمشىلىك جاۋاپكەرشىلىككە تارتىلدى. بۇل تۋرالى قازاقپارات حابارلادى. پوليتسيا قىزمەتكەرلەرى ءبىر اپتا ىشىندە قازاقستان رەسپۋبليكاسى اكىمشىلىك قۇقىق بۇزۋشىلىق تۋرالى كودەكسىنىڭ 449-بابىنا سايكەس بارلىعى 765 ادامدى جاۋاپكەرشىلىككە تارتتى. ءبىر عانا سەيفۋللين كوشەسى بويىنداعى قوعامدىق ورىنداردا تۇرعىندار مەن قالا قوناقتارىنىڭ مازاسىن العانى ءۇشىن 122 بويجەتكەن اكىمشىلىك جاۋاپكەرشىلىككە تارتىلدى. ولاردىڭ ىشىندەگى 101 جەڭىل ءجۇرىستى قىزعا جالپى سوماسى 1 ميلليون تەڭگە كولەمدە ايىپپۇل سالىندى. قۇقىق قورعاۋشىلاردىڭ جۇرگىزگەن پروفيلاكتيكاسى كەزىندە جۇرگىنشىلەرگە تاۋارىن تىقپالاعان ادامدار مەن قايىرشىلار دا جاۋاپكەرشىلىكتەن سىرت قالمادى. ايىپپۇل سالىنعاندار اراسىندا قىرعىزستاننان كەلگەن جەڭىل ءجۇرىستى كەلىنشەك تە بار. ول سوت شەشىمىمەن قازاقستان اۋماعىنان شىعارىلدى. تالعات ءسۇيىنباي. دەرەك, سۋرەت: قازاقپارات.