بالا تۋعان كەزدە بىرجولعى مەملەكەتتىك جاردەماقى تولەنەدى. ونىڭ مولشەرى ءبىرىنشى, ەكىنشى جانە ءۇشىنشى بالاعا – 164 350 تەڭگە, ال ءتورتىنشى جانە ودان كەيىنگى بالالارعا – 272 475 تەڭگە.
جۇمىس ىستەيتىن ايەلدەر ءۇشىن جۇكتىلىك پەن بوسانۋعا, سونداي-اق جاڭا تۋعان بالانى اسىراپ الۋعا بايلانىستى تابىسىنان ايىرىلعان جاعدايدا الەۋمەتتىك تولەم قاراستىرىلعان. ونىڭ كولەمى سوڭعى 12 ايداعى ورتاشا تابىسقا بايلانىستى ەسەپتەلەدى. 2026 جىلعى 1 مامىرداعى مالىمەت بويىنشا بۇل تولەمنىڭ ورتاشا مولشەرى 1,2 ميلليون تەڭگەنى قۇرادى.
سونىمەن قاتار جۇمىس ىستەيتىن انالارعا بالا 1,5 جاسقا تولعانعا دەيىن كۇتىم جاساۋ كەزەڭىندە الەۋمەتتىك تولەم تولەنەدى. ونىڭ مولشەرى سوڭعى ەكى جىلداعى ورتاشا تابىستىڭ 40 پايىزىنا تەڭ. مامىر ايىنىڭ باسىنداعى دەرەك بويىنشا ورتاشا تولەم كولەمى 86 062 تەڭگەنى قۇراعان.
مۇمكىندىگى شەكتەۋلى بالا تاربيەلەپ وتىرعان وتباسىلارعا اي سايىن 81 871 تەڭگە كولەمىندە جاردەماقى بەرىلەدى.
كوپبالالى وتباسىلارعا ەرەكشە قولداۋ كورسەتىلەدى. تابىس دەڭگەيىنە قاراماستان اي سايىنعى جاردەماقى مىناداي مولشەردە تولەنەدى:
- 4 بالاسى بار وتباسىلارعا – 69 330 تەڭگە;
- 5 بالاسى بار وتباسىلارعا – 86 673 تەڭگە;
- 6 بالاسى بار وتباسىلارعا – 104 017 تەڭگە;
- 7 بالاسى بار وتباسىلارعا – 121 360 تەڭگە.
بۇدان بولەك, «التىن القا» جانە «كۇمىس القا» القالارىمەن ماراپاتتالعان انالارعا دا مەملەكەتتىك قولداۋ شارالارى قاراستىرىلعان.
بۇگىندە ەلىمىز بويىنشا 630 مىڭنان استام كوپبالالى وتباسى ءتۇرلى جاردەماقىلارمەن قامتىلىپ وتىر. بۇل الەۋمەتتىك قولداۋ شاراسى حالىقتى قولداۋعا باعىتتالعان ەڭ ءىرى مەملەكەتتىك باعدارلامالاردىڭ ءبىرى سانالادى.
