مەملەكەت باسشىسىنىڭ ەكونوميكانى قارجىلاندىرۋدى كوبەيتۋ تۋرالى تاپسىرمالارىن ورىنداۋ اياسىندا ديرەكتورلار كەڭەسى حولدينگتىڭ رەسۋرستىق بازاسىن كەڭەيتۋگە ءارى باسىم سالالاردى قولداۋدى ارتتىرۋعا باعىتتالعان بىرقاتار شەشىم قابىلدادى.
وتاندىق ەكسپورتتاۋشىلاردى قولداۋ ماسەلەسىنە ەرەكشە نازار اۋدارىلدى. ديرەكتورلار كەڭەسى «قازاقستاننىڭ ەكسپورتتىق-كرەديتتىك اگەنتتىگىنە» مەملەكەت كەپىلدىگىمەن 250 ملرد تەڭگە تارتۋعا رۇقسات بەردى. كەپىلدىك 10 جىل مەرزىمگە بەرىلەدى. بۇل قاراجات اگەنتتىكتىڭ ەكسپورتتاۋشىلارعا ساقتاندىرۋ مەن كەپىلدىك بەرۋ مۇمكىندىگىن كەڭەيتىپ, شيكىزاتتىق ەمەس ءونىم وندىرۋشىلەرگە قولداۋ كورسەتۋ كولەمىن كەڭەيتۋگە جول اشادى.
ناتيجەسىندە كاسىپكەرلەردىڭ ەكسپورتتىق قارجىلاندىرۋى جاقسارادى. بيىل اگەنتتىكتىڭ ساقتاندىرۋ مەن كەپىلدىك مىندەتتەمەلەرىنىڭ جالپى كولەمى 1,2 ترلن تەڭگەگە جەتەدى دەگەن ءۇمىت بار. سونداي-اق «بايتەرەك» حولدينگىنىڭ 2026–2028 جىلدارعا ارنالعان ورنىقتى دامۋ جوسپارى بەكىتىلدى. قۇجات ەكولوگيالىق تازا جوبالاردى قارجىلاندىرۋدى كوبەيتۋگە, كومىرتەگى شىعارىندىلارىن ازايتاتىن باستامالاردى قولداۋعا, كورپوراتيۆتىك باسقارۋدىڭ اشىقتىعىن ارتتىرۋعا ءارى تاۋەكەلدەردى ءتيىمدى باسقارۋعا باعىتتالعان. بۇدان بولەك, الەۋمەتتىك جوبالاردى ىسكە اسىرۋ, كادرلىق ساياساتتى جەتىلدىرۋ, حالىقارالىق ۇزدىك تاجىريبەلەردى ەنگىزۋ دە نەگىزگى باسىمدىقتاردىڭ قاتارىنا ەنگىزىلدى.
قازىر حولدينگ بىرىككەن ۇلتتار ۇيىمىنىڭ تۇراقتى دامۋ ماقساتتارىنىڭ 17 باعىتىنىڭ 15-ءىن ءوز قىزمەتىندە ەسكەرىپ كەلەدى. بۇل باعىتتاعى جۇمىستىڭ ناتيجەسىندە 2025 جىلدىڭ قورىتىندىسىندا Sustainable Fitch حالىقارالىق رەيتينگ اگەنتتىگى حولدينگتىڭ ESG-رەيتينگىن «3» دەڭگەيدەن «2» دەڭگەيگە كوتەردى. وسى كورسەتكىش حولدينگتىڭ تۇراقتى دامۋ سالاسىنداعى حالىقارالىق تالاپتارعا سايكەستىگىن راستايدى. وتىرىس سوڭىندا تاۋەكەلدەرگە قاتىستى شوعىرلاندىرىلعان ەسەپ, ىشكى اۋديت قىزمەتىنىڭ ەسەبى, سىبايلاس جەمقورلىققا قارسى كومپلاەنس-قىزمەتتىڭ 2026 جىلدىڭ ءبىرىنشى توقسانىنداعى جۇمىسى تۋرالى ەسەپ بەكىتىلدى.
