قالانىڭ باتىس اۋدانىندا بوي كوتەرگەن «شابىت» بالالار-جاسوسپىرىمدەر شىعارماشىلىق ورتالىعى جەزقازعان جاستارىنىڭ قوسىمشا ءبىلىم الىپ, جان-جاقتى دامۋىنا, بوس ۋاقىتىن ءتيىمدى وتكىزۋىنە ارنالعان ماڭىزدى ورتالىقتاردىڭ بىرىنە اينالماق. وندىرىستىك تاريحى باي قالا ءۇشىن بۇل جوبانىڭ ماڭىزى ەرەكشە. سەبەبى بالالاردىڭ شىعارماشىلىق, زياتكەرلىك دامۋىنا ارنالعان مۇنداي زاماناۋي نىسان جەزقازعاندا كەيىنگى 70 جىلدان استام ۋاقىت ىشىندە العاش رەت سالىنىپ وتىر. ماڭىزدى نىساننىڭ اشىلۋ سالتاناتىنا ۇلىتاۋ وبلىسى مەن جەزقازعان قالاسىنىڭ باسشىلىعى, بولات وتەمۇراتوۆ قورى مەن «ۆەرنىي كاپيتال» كومپانيالار توبىنىڭ وكىلدەرى, وقۋ-اعارتۋ مينيسترلىگىنىڭ وكىلدەرى, دەپۋتاتتار, بۇقارالىق اقپارات قۇرالدارىنىڭ وكىلدەرى جانە قوعام بەلسەندىلەرى قاتىستى.
قۇنى 4 ميلليارد تەڭگەنى قۇرايتىن جوبانى بولات وتەمۇراتوۆ قورى جۇزەگە اسىرىپ, ونى جەزقازعان قالاسىنا تارتۋ رەتىندە تابىستادى. سالتاناتتى راسىمدە ءسوز سويلەگەن ۇلىتاۋ وبلىسىنىڭ اكىمى داستان رىسپەكوۆ:
«جەزقازعان قالاسىنداعى جاڭا «شابىت» بالالار-جاسوسپىرىمدەر شىعارماشىلىق ورتالىعى – جاي عانا زاماناۋي عيمارات ەمەس, بالالاردىڭ ءبىلىم الىپ, ءوز قابىلەتتەرىن دامىتىپ, تەحنولوگيا, شىعارماشىلىق جانە سپورتپەن لايىقتى جاعدايدا اينالىسۋىنا مۇمكىندىك بەرەدى. مەملەكەت باسشىسى قاسىم-جومارت توقاەۆ بىرنەشە مارتە اتاپ وتكەندەي, ءاربىر بالانىڭ الەۋەتىن دامىتۋ – ەلدىڭ ستراتەگيالىق باسىمدىعى», دەپ قورعا العىس ءبىلدىرىپ, جاڭا نىساننىڭ قالا ءۇشىن ايرىقشا ماڭىزعا يە ەكەنىن اتاپ ءوتتى.
جالپى اۋماعى 2 600 شارشى مەتردەن اساتىن كەشەندە ارت-ستۋديا, كۇيدىرۋ بولمەسى بار قىش شەبەرحاناسى, ەرتە دامىتۋ ورتالىعى, جەكپە-جەك جانە حورەوگرافيا زالدارى, فيزيكا, ماتەماتيكا, جاراتىلىستانۋ جانە روبوتتەحنيكا كابينەتتەرى ورنالاسقان STEM-ايماق, تسيفرلىق ونەر مەن گرافيكالىق ديزاين ستۋدياسى, فوتوستۋديا, مۋزىكا سىنىپتارى, شاحمات كابينەتى جانە كەڭ اكت زالى قاراستىرىلعان. «شابىت» بالالار-جاسوسپىرىمدەر شىعارماشىلىق ورتالىعىندا بارلىعى 14 وقۋ كابينەتى, قىزمەتكەرلەرگە ارنالعان جەكە ايماقتار, مەديتسينالىق كابينەت پەن كوۆوركينگ بار. عيمارات ءبىر ۋاقىتتا 250 بالاعا دەيىن قابىلداۋعا لايىقتالعان. ۇيىرمەلەردەگى ساباقتار تەگىن ءارى بىرنەشە اۋىسىممەن وتكىزىلەتىندىكتەن, ورتالىق كۇنىنە 600-گە دەيىن بالانى قامتي الادى.
اۋماعى 1,6 گەكتاردى قۇرايتىن كەشەندە سپورت جانە ويىن الاڭدارى بار, اينالاسى اباتتاندىرىلعان. عيماراتتى جوبالاۋ بارىسىندا ينكليۋزيۆتى ورتا قالىپتاستىرۋعا ەرەكشە كوڭىل ءبولىندى. مۇندا ەرەكشە ءبىلىم قاجەتتىلىگى بار بالالاردىڭ كەدەرگىسىز كەلۋىنە بارلىق جاعداي جاسالعان. سونداي-اق سەنسورلىق بولمە ولاردىڭ دامۋى مەن بەيىمدەلۋىنە ىقپال ەتەتىن ماڭىزدى ورتالىقتاردىڭ بىرىنە اينالماق.
ء«بىلىم سالاسىن قولداۋ جانە بالالار مەن جاستاردىڭ جان-جاقتى دامۋىنا ارنالعان زاماناۋي ينفراقۇرىلىم قالىپتاستىرۋ – قور قىزمەتىنىڭ نەگىزگى باعىتىنىڭ ءبىرى. ءبىز مۇنداي جوبالاردى ەلدىڭ ادام كاپيتالىنا سالىنعان ۇزاقمەرزىمدى ينۆەستيتسيا دەپ بىلەمىز. جەزقازعانداعى جاڭا «شابىت» بالالار-جاسوسپىرىمدەر شىعارماشىلىق ورتالىعى ءوڭىر بالالارىنىڭ ساپالى قوسىمشا ءبىلىم الىپ, شىعارماشىلىق ءارى كاسىبي تۇرعىدان دامۋىنا تىڭ سەرپىن بەرەدى دەپ سەنەمىن», دەدى بولات وتەمۇراتوۆ قورى قامقورشىلار كەڭەسىنىڭ توراعاسى الماز شارمان.
«جوبانى جۇزەگە اسىرۋ بارىسىندا قۇرىلىس ساپاسىنا, زاماناۋي شەشىمدەردى ەنگىزۋگە جانە بالالار ءۇشىن جايلى ءارى قاۋىپسىز ورتا قالىپتاستىرۋعا ەرەكشە ءمان بەرىلدى. ءبىز ءۇشىن بيزنەستىڭ تابىسى ەكونوميكالىق كورسەتكىشتەرمەن عانا ەمەس, قوعامعا تيگىزگەن ناقتى پايداسىمەن دە ولشەنەدى. سوندىقتان ءبىلىم مەن وسكەلەڭ ۇرپاقتىڭ دامۋىنا باعىتتالعان باستامالاردى قولداۋ – ءبىزدىڭ باستى قۇندىلىقتارىمىزدىڭ ءبىرى. جاڭا «شابىت» بالالار-جاسوسپىرىمدەر شىعارماشىلىق ورتالىعى بالالاردىڭ ءبىلىم الىپ, شىعارماشىلىعىن شىڭداپ, دوستىق قارىم-قاتىناس ورناتاتىن ءارى جاڭا مۇمكىندىكتەرگە جول اشاتىن ماڭىزدى ورتالىققا اينالادى دەپ سەنەمىن», دەدى «ۆەرنىي كاپيتال» كومپانيالار توبىنىڭ باس ديرەكتورى ايدان اقانوۆ.
بولات وتەمۇراتوۆ قورى 12 جىل ىشىندە ەلىمىزدىڭ ءار وڭىرىندە ماڭىزدى نىسانداردىڭ سالىنۋىنا ۇيىتقى بولدى. ولاردىڭ قاتارىندا ەسىك پەن قوسشى قالالارىنداعى مەكتەپتەر, قىزىلورداداعى جاڭا اۋەجاي, قوسشىداعى كوميۋنيتي-ورتالىق بار. بۇل جوبالاردىڭ بارلىعىن بىرىكتىرەتىن ورتاق ماقسات – حالىقتىڭ ءومىر ساپاسىن جاقسارتىپ, وڭىرلەردىڭ تۇراقتى دامۋىنا ۇلەس قوسۋ.
ۇلىتاۋ وبلىسى
