ەلىمىزدىڭ جەڭىل اتلەتتەرى ءتۇرلى حالىقارالىق تۋرنيرلەردە ءۇش مەدال جەڭىپ الدى. كيپردىڭ ليماسولىندا بيىكتىككە سەكىرۋشى ەليزاۆەتا ماتۆەەۆا كۇمىس السا, پولشانىڭ بەلوستوگىندا كريستينا وۆچيننيكوۆا قولا مەدال ەنشىلەدى. سىرىقپەن سەكىرۋشى پولينا يۆانوۆا وڭتۇستىك كورەيانىڭ پۋسانىندا ەكىنشى ورىنعا تابان تىرەدى.
شايبالى حوككەيدەن 2026 جىلى گەرمانيادا وتەتىن الەم چەمپيوناتىنىڭ ەليتالىق ديۆيزيونىندا ەلىمىزدىڭ ۇلتتىق قۇراماسى ۆ توبىندا ونەر كورسەتەدى. قارسىلاستارىمىز – كانادا, اقش, چەحيا, گەرمانيا, دانيا, نورۆەگيا, يتاليا. ا توبىندا شۆەيتساريا, فينليانديا, شۆەتسيا, سلوۆاكيا, لاتۆيا, اۋستريا, سلوۆەنيا, ۋكراينا سايىسقا تۇسەدى.
رەسەي پرەمەر-ليگاسىندا گروزنىيدىڭ «احماد» كلۋبىنىڭ ساپىندا وينايتىن ەلىمىزدىڭ فۋتبولشىسى ماكسيم سامورودوۆقا بىرقاتار كوماندانىڭ كوزى ءتۇسىپ ءجۇر. ولاردىڭ قاتارىندا ماسكەۋدىڭ «سپارتاگى» مەن «لوكوموتيۆى», «كراسنودار» بار. وتكەن ماۋسىمدا 34 رەت جاسىل الاڭعا شىققان 23 جاستاعى شابۋىلشى بەس رەت مەرگەندىك تانىتىپ, 10 مارتە ناتيجەلى پاس بەردى.
اۋىر اتلەتيكادان ەلىمىزدىڭ ۇلتتىق قۇراماسىنىڭ باس باپكەرى داۋرەن بەكمۇحانبەتوۆ الداعى جوسپارلارىمەن ءبولىستى. بۇگىندە وتاندىق زىلتەمىرشىلەر وزبەكستاندا وقۋ-جاتتىعۋ جيىنىن وتكىزىپ ءجۇر. جيىن اياقتالعان سوڭ, 12 ماۋسىمدا سپورتشىلارىمىز تۇركياعا اتتانادى. انادولى ەلىندە بيىل كۇزدە جاپونيادا الاۋى تۇتاناتىن ازيا ويىندارىنا قاتىساتىندار انىقتالادى. ودان كەيىن ليتسەنزيالىق الەم چەمپيوناتى بار. وعان دا ەلىمىزدىڭ ەڭ مىقتى اتلەتتەرى قاتىسادى. سونداي-اق ولار جىل سوڭىندا وليمپيا ويىندارىنىڭ جولدامالارى ساراپقا سالىناتىن تاعى ءبىر جارىستا كۇش سىناسۋدى جوسپارلاپ وتىر.
«Forbes» جۋرنالى ەڭ باي فۋتبول كلۋبتارىنىڭ رەيتينگىن جاريالادى. بۇل تىزىمدە ءمادريدتىڭ «رەالى» جەكە-دارا كوش باستاپ تۇر. قازىرگى كەزدە كورولدىك كلۋب 9,5 ملرد اقش دوللارىنا باعالانىپ وتىر. ەكىنشى, ءۇشىنشى ورىنداردا يسپانيانىڭ «بارسەلوناسى» (7,5 ملرد) مەن انگليانىڭ «مانچەستەر يۋنايتەدى» (7,2). سونداي-اق توپ-10-دىقتىڭ قاتارىندا ليۆەرپۋل» (6,2), پسج (5,8), «باۆاريا» (5,7), «مانچەستەر سيتي» (5,5), «ارسەنال» (5,4), «چەلسي» (4,2), «توتتەنحەم» (3 ملرد) سەكىلدى الپاۋىتتار بار.
دايىنداعان –
عالىم سۇلەيمەن,
«Egemen Qazaqstan»
