جەتىنشى تۋردا بليتستەن الەم بىرىنشىلىگىنىڭ قولا جۇلدەگەرى, قىتايلىق چجۋ تسزينەردەن باسىم تۇسكەن ءبيبىسارا كەلەسى كەزەڭدە ءۇندى ەلىنىڭ وكىلى ديۆيا دەشمۋكحپەن شەبەرلىك بايقاستى. بۇل باسەكەدە دە قازاق شاحماتشىسى جەڭىسكە جەتىپ, جارىس كەستەسىندە وزگە قارسىلاستارىنان ەداۋىر وزىپ كەتتى. ونىڭ قورجىنىندا قازىر 15,5 ۇپاي بار. ەكىنشى ورىنداعى ۋكراينالىق اننا مۋزىچۋكتىڭ اساۋباەۆادان 4,5 ۇپايى كەم. ءۇشىنشى, ءتورتىنشى ورىندى ديۆيا دەشمۋكح پەن چجۋ تسزينەر ءوزارا ءبولىسىپ تۇر. ولاردىڭ ارقايسىسىندا 10 ۇپايدان بار. ودان كەيىنگى ساتىلارعا تسزيۋي ۆەنتسزيۋن (9 ۇپاي) مەن حامپي كونەرۋ (8 ۇپاي) جايعاستى. توعىزىنشى تۋردا جەرلەسىمىز مۋزىچۋكقا قارسى وينايدى. وسى باسەكەدە باس جۇلدەنىڭ تاعدىرى شەشىلەدى.
سكانديناۆيا تۇبەگىندەگى تۋرنير ءوتىپ جاتقان تۇستا فيدە رەيتينگى قايتا جاڭارتىلعانى جايىندا دا ايتا كەتەيىك. الەمنىڭ ەڭ ۇزدىك شاحماتشىلارى تىزىمىندە ب.اساۋباەۆا (2537 ۇپاي) ءتورتىنشى ورىنعا كوتەرىلدى. ونىڭ الدىندا قىتايدىڭ ءۇش مىقتىسى – حوۋ يفان (2596), لەي تينتسزە (2566), تسزيۋي ۆەنتسزيۋن (2560). بۇرىن-سوڭدى ەلىمىزدىڭ بىردە-ءبىر شاحماتشىسى مۇنداي دەڭگەيگە جەتكەن ەمەس. سول سەبەپتى دە بۇنى تاريحي وقيعا دەپ باعالاعان ءجون. ال ءبىز ءبيبىسارادان بۇدان دا زور ناتيجە كۇتەمىز. سونداي-اق الەمدىك رەيتينگتەگى توپ-10 ويىنشىنىڭ قاتارىنا ۋكراينالىق الەكساندرا گورياچكينا (2536), قىتايلىق چجۋ تسزينەر (2535) مەن تان چجۋني (2517), ۇندىستاندىق حامپي كونەرۋ (2529), ۋكراينالىق اننا مۋزىچۋك (2523), رەسەيلىك كاتەرينا لاگنو (2506) سىندى گروسسمەيستەرلەر ەندى.
