بيىل كىتاپحانانىڭ قۇرىلعانىنا 65 جىل تولىپ وتىر. مەرەيتوي قارساڭىندا جاڭا عيماراتتىڭ اشىلۋىن جەرگىلىكتى جۇرت وبلىس رۋحانياتى ءۇشىن ماڭىزدى وقيعا رەتىندە باعالادى. اشىلۋ سالتاناتىندا وبلىس اكىمى نۇرالحان كوشەروۆ كىتاپحانانىڭ قوعام ءۇشىن ماڭىزىنا توقتالدى. «كىتاپحانا – تەك كىتاپ ساقتالاتىن ورىن ەمەس. بۇل – ۇلتتىڭ رۋحاني قازىناسى ءارى تاربيەنىڭ التىن بەسىگى. مەملەكەت باسشىسى قاسىم-جومارت توقاەۆ ۇلتتىق قۇرىلتاي وتىرىسىندا: «تەك كىتاپ وقيتىن ۇلت قانا شىن مانىندە ينتەلەكتۋالدى قوعام قۇرا الادى. بۇل – ەلدىڭ رۋحاني دامۋىنىڭ نەگىزى» دەپ, كىتاپحانا سالاسىنىڭ قوعام ومىرىندەگى ماڭىزىن ايشىقتاپ بەرگەن بولاتىن. اسىرەسە جاستاردىڭ كىتاپقا دەگەن قىزىعۋشىلىعىن وياتىپ, دۇرىس باعىتتا تاربيەلەۋ – بولاشاققا جاسالعان ماڭىزدى ينۆەستيتسيا بولىپ سانالادى. بۇگىنگى ءىس-شارا – وسى باعىتتاعى جۇمىستاردىڭ العىشارتى رەتىندە جۇزەگە اسۋدا. وسىدان ءبىراز ۋاقىت بۇرىن كىتاپحانانىڭ ەسكى عيماراتىنىڭ جاي-كۇيىن كورىپ, ونى زامان تالابىنا ساي جاڭارتىپ, بالالار ءۇشىن زاماناۋي ينتەللەكتۋالدى ورتالىققا اينالدىرۋ تۋرالى ارنايى باستاما كوتەرگەن ەدىم. وسى يدەيانى ءبىراۋىزدان قولداپ, بالالارىمىزعا عاجايىپ ءبىلىم ورداسىن سىيلاۋعا مۇمكىندىك تۋعىزعان وبلىستىق ءماسليحات دەپۋتاتتارى مەن باسقا دا ازاماتتارعا شىنايى ريزاشىلىعىمدى بىلدىرەمىن», دەدى نۇرالحان كوشەروۆ.
جاڭا عيماراتتا بالالاردىڭ ءبىلىمىن شىڭداپ, بوس ۋاقىتىن ءتيىمدى وتكىزۋىنە بارلىق جاعداي جاسالعان. كىتاپحانا قورىندا 226 403 كىتاپ ساقتالعان, الەمدىك كلاسسيكا, زاماناۋي بالالار ادەبيەتى جانە ەلەكتروندى رەسۋرستاردىڭ بارلىق مۇمكىندىكتەرى قامتىلعان. جوبانىڭ جالپى قۇنى – 481,336 ملن تەڭگە. عيماراتتىڭ جالپى اۋماعى – 1065,3 شارشى مەتر. كىتاپحانا ءبىر مەزەتتە 100 وقىرمانعا قىزمەت كورسەتۋگە قاۋقارلى. مۇندا 50-دەن استام مامان ەڭبەك ەتەدى.
ايتا كەتەلىك, بۇگىندە تۇركىستان وبلىسىندا جالپى كىتاپ قورى 6 ميلليوننان اساتىن 390 كىتاپحانا حالىققا قىزمەت كورسەتەدى. وتكەن جىلى وبلىستا كىتاپحانالارمەن قاتار 6 مادەنيەت ءۇيى پايدالانۋعا بەرىلسە, بيىل تاعى 10 مادەني نىساننىڭ قۇرىلىس جۇمىستارى قارقىندى ءجۇرىپ جاتىر. اتالعان نىساندار جىل سوڭىنا دەيىن ەل يگىلىگىنە بەرىلەدى.
تۇركىستان
