تەرگەۋ مالىمەتىنشە, ەر ادام 2024 جىلدىڭ قازان ايىنان 2025 جىلدىڭ تامىزىنا دەيىن ارقالىق كەن ورنىنداعى تەحنوگەندىك مينەرالدىق تۇزىلىمدەردى الىپ, ساقتاپ, وڭدەپ, كەيىن كوممەرتسيالىق كومپانيا ارقىلى ساتقان دەگەن كۇدىككە ىلىنگەن.
الايدا سوت بارىسىندا بۇل مينەرالدىق تۇزىلىمدەردىڭ ەشبىر ۇيىمنىڭ بالانسىندا بولماعانى جانە ەكونوميكالىق اينالىمدا پايدالانىلماعانى انىقتالدى. سوندىقتان ولاردى ۇرلىق نىسانى رەتىندە قاراستىرۋ مۇمكىن ەمەس دەگەن قورىتىندى جاسالدى.
سوت سونداي-اق جەر قويناۋىن پايدالانۋ ليتسەنزياسىنىڭ بولماۋى وزدىگىنەن زاڭسىز كاسىپكەرلىك قىلمىسىن قۇرامايتىنىن اتاپ ءوتتى. بۇدان بولەك, ايىپتاۋشى تاراپ كەلتىرگەن شىعىن كولەمىن ەسەپتەۋ ءادىسى دە سىنعا ۇشىرادى.
ناتيجەسىندە سوت ەر ادامدى بارلىق ايىپتار بويىنشا اقتاپ, وعان زاڭسىز قىلمىستىق قۋدالاۋ سالدارىنان كەلتىرىلگەن زياندى وتەۋ قۇقىعىن بەردى.
ۇكىم ازىرگە زاڭدى كۇشىنە ەنگەن جوق.
