فوتو: اقوردا
قاسىم-جومارت توقاەۆتىڭ ايتۋىنشا, بىلتىر وڭىرلىك جالپى ءونىم كولەمى 6,7 تريلليون تەڭگە بولىپ, 5,4 پايىزعا ءوستى. قاڭتار-ءساۋىر ايلارىنداعى قىسقا مەرزىمدى ەكونوميكالىق كورسەتكىش بويىنشا ايماق 5-ورىندا تۇر.
«ينۆەستيتسيا تارتۋ جۇمىسى بەلسەندى تۇردە جۇرگىزىلىپ جاتىر. جىل باسىنان بەرى وبلىس ەكونوميكاسىنا 266,2 ميلليارد تەڭگە ينۆەستيتسيا سالىندى», دەدى مەملەكەت باسشىسى.
پرەزيدەنتتىڭ سوزىنشە, ونەركاسىپ ءوندىرىسىنىڭ كولەمى شامامەن 900 ميلليارد تەڭگەگە جەتتى.
«بىراق اگرارلىق سەكتوردىڭ الەۋەتى ءالى دە تولىق يگەرىلمەي جاتىر. بيىلعى 4 ايدىڭ ناتيجەسى بويىنشا اۋىل, ورمان جانە بالىق شارۋاشىلىعىنىڭ ناقتى كولەم يندەكسى 101,2 پايىز بولدى», دەدى پرەزيدەنت.
سونداي-اق مەملەكەت باسشىسى قوناەۆ قالاسىنداعى ينفراقۇرىلىم قۇرىلىسى وتە باياۋ جۇرگىزىلىپ جاتقانىن ايتتى.
«الايدا, ءبىر ولقىلىققا نازار اۋدارعىم كەلەدى. قوناەۆ قالاسىنداعى ينفراقۇرىلىم قۇرىلىسى وتە باياۋ جۇرگىزىلىپ جاتىر. «باياعى جارتاس – سول جارتاس», قالانىڭ كەلبەتى – وزگەرىسسىز كۇيدە. بۇل قالادا شۇعىل تۇردە تەاتر, ستاديون, اكىمشىلىك عيماراتتارى مەن مەكتەپتەر سالۋ كەرەك. ونسىز الماتى وبلىسى ءوز اياعىنا تۇرىپ كەتە المايدى. وبلىس باسشىلىعى وسى وزەكتى ماسەلەلەرگە باسا نازار اۋدارۋى قاجەت», دەدى مەملەكەت باسشىسى.
ايتا كەتەيىك, بۇگىن مەملەكەت باسشىسى جۇمىس ساپارىمەن الماتى وبلىسىنا باردى.
