كوللاجدى جاساعان – قونىسباي شەجىمباي, «EQ»
ۇكىمەتتىڭ ءباسپاسوز قىزمەتىنىڭ مالىمدەۋىنشە, كەشەندى جوسپار حالىق دەنساۋلىعىن جانۋارلار مەن ادامعا ورتاق اۋرۋلاردان قورعاۋعا, سونداي-اق جانۋارلاردى اۋرۋلاردان ساقتاۋ مەن ۆەتەريناريالىق-سانيتاريالىق قاۋىپسىزدىكتى نىعايتۋعا باعىتتالعان.
«جۇيەلى شارالاردىڭ ناتيجەسىندە قازاقستاندا بۇگىندە اۋسىل, افريكالىق جىلقى وباسى, افريكالىق جانە كلاسسيكالىق شوشقا وباسى سەكىلدى جانۋارلاردىڭ بىرقاتار اسا قاۋىپتى اۋرۋلارى بويىنشا تۇراقتى ەپيزووتيالىق احۋال قالىپتاسىپ وتىر. بۇل ءوز كەزەگىندە وتاندىق مال شارۋاشىلىعى ونىمدەرىنىڭ ەكسپورتتىق الەۋەتىن كەڭەيتۋگە مۇمكىندىك بەردى», دەدى اۋىل شارۋاشىلىعى ۆيتسە-ءمينيسترى امانعالي بەردالين.
جوسپاردىڭ نەگىزگى باسىمدىقتارى رەتىندە جانۋارلاردىڭ اسا قاۋىپتى اۋرۋلارىنا قارسى كۇرەس, ۆەتەريناريا ماماندارىنىڭ جالاقىسىن كوتەرۋ, ۆەتەريناريالىق ۇيىمداردىڭ ماتەريالدىق-تەحنيكالىق بازاسىن جاقسارتۋ, ەكسپورتتىق جەتكىزىلىمدەردى كەڭەيتۋ جانە ىشكى نارىقتى قورعاۋ, زەرتحانالىق باقىلاۋدى كۇشەيتۋ, ءونىمنىڭ ومىرلىك تسيكلىنىڭ بارلىق كەزەڭىندە (تۋعان ساتىنەن باستاپ ءونىمدى وتكىزۋگە دەيىن) قاداعالاۋ, ۆەتەريناريا سالاسىن تسيفرلاندىرۋدى كەڭەيتۋ جانە ۆەتەريناريالىق فارماتسەۆتيكا تەحنولوگيالارىن دامىتۋ ماسەلەلەرى ايقىندالدى. قازىرگى تاڭدا ەلىمىزدە ۆەتەريناريالىق پرەپاراتتار وندىرەتىن 21 زاۋىت جۇمىس ىستەيدى.
قازاقستان اۋماعىن جانۋارلاردىڭ اسا قاۋىپتى اۋرۋلارىنان قورعاۋ, ەلىمىزدىڭ ەپيزووتيالىق تۇراقتىلىعىن ساقتاۋ جانە تەحنيكالىق رەگلامەنتتەرىنە سايكەس كەلمەيتىن ونىمدەردىڭ ىشكى نارىققا ەنۋىنە جول بەرمەۋ ءۇشىن شەكارا ماڭىنداعى اۋماقتاردا ۆەتەريناريالىق 67 باقىلاۋ بەكەتى جۇمىس ىستەيدى.
2025 جىلى قازاقستان شەكاراسى ارقىلى يمپورتتىق, ەكسپورتتىق جانە ترانزيتتىك وپەراتسيالار بارىسىندا مەملەكەتتىك ۆەتەريناريالىق-سانيتاريالىق ينسپەكتورلار 700 مىڭ توننادان استام مال شارۋاشىلىعى ءونىمىن تاسىمالداعان 60 مىڭعا جۋىق اۆتوكولىكتى تەكسەرۋدەن وتكىزگەن.
«ۇدەرىستەردى تسيفرلاندىرۋ, سونداي-اق دەرەكتەردى جيناۋ مەن بەرۋدى اۆتوماتتاندىرۋ شەڭبەرىندە «اۋىل شارۋاشىلىعى جانۋارلارىن سايكەستەندىرۋ» اقپاراتتىق جۇيەسىنە باستاپقى جانە ناقتى دەرەكتەردى اقپاراتتىق جۇيەلەرگە اۆتوماتتى تۇردە تىكەلەي جولداۋعا مۇمكىندىك بەرەتىن جاڭا فۋنكتسيونالدار ازىرلەنىپ, قولدانىسقا ەنگىزىلدى. ولاردىڭ قاتارىندا ISZH-MOBILE, TortTulik جۇيەلەرى بار. مال شارۋاشىلىعى ونىمدەرىن قاداعالاۋدى «فەرمادان ۇستەلگە دەيىن» قاعيداتى بويىنشا قامتاماسىز ەتۋ شەڭبەرىندە «ۆەتەريناريالىق-سانيتاريالىق ساراپتاما» ءمودۋلى جۇزەگە اسىرىلىپ وتىر. اتالعان جۇيەگە ىشكى ساۋدا, زەرتحانا, سويۋ نىساندارى قوسىلعان. سونىمەن قاتار قوعامدىق تاماقتانۋ وبەكتىلەرىن مودۋلگە كەزەڭ-كەزەڭىمەن قوسۋ بويىنشا جۇمىستار جۇرگىزىلىپ جاتىر», دەلىنگەن ۇكىمەتتىڭ حابارلاماسىندا.
بۇدان بولەك, 2030 جىلعا قاراي اۋىل شارۋاشىلىعى مينيسترلىگىنىڭ اۋماقتىق بولىمشەلەرى مەن ۆەدومستۆولىق ۇيىمدارىنىڭ ماتەريالدىق-تەحنيكالىق جاراقتاندىرىلۋىن 80%-عا دەيىن جاڭارتۋ جانە تولىقتىرۋ جوسپارلانىپ وتىر. سونداي-اق جەرگىلىكتى اتقارۋشى ورگاندارعا قاتىستى ۆەتەريناريالىق ۇيىمدار قىزمەتكەرلەرىنىڭ ەڭبەكاقى تولەۋ قورى 1,5-2,5 ەسەگە دەيىن ارتادى.
بىلتىرعى جىلدىڭ سوڭىندا سەناتتا وتكەن ۇكىمەت ساعاتىندا ۆەتەريناريا سالاسى اقساپ تۇرعانى ايتىلعان.
