فوتو: قورعانىس مينيسترلىگى
قورعانىس مينيسترلىگىنىڭ مالىمەتىنشە, 2014 جىلدان بەرى 900-دەن استام وتاندىق اسكەري قىزمەتشى بىرىككەن ۇلتتار ۇيىمىنىڭ ءتۇرلى بىتىمگەرلىك ميسسيالارىنا قاتىسقان. قازىرگى ۋاقىتتا 154 اسكەري قىزمەتشى تاياۋ شىعىس پەن افريكاداعى بۇۇ-نىڭ 11 ميسسياسىنىڭ 7-ۋىندە قىزمەت اتقارىپ ءجۇر.
وتاندىق بىتىمگەرلەر باتىس ساحارادا, ورتالىق افريكا رەسپۋبليكاسىندا, كونگو دەموكراتيالىق رەسپۋبليكاسىندا, ليۆان مەن وڭتۇستىك سۋداندا اسكەري باقىلاۋشى جانە شتاب وفيتسەرى رەتىندە مىندەت اتقارادى.
مەملەكەت باسشىسىنىڭ تاپسىرماسىنا سايكەس, قورعانىس مينيسترلىگى وتاندىق بىتىمگەرلەردىڭ حالىقارالىق ميسسيالارعا قاتىسۋ شەڭبەرىن كەڭەيتۋ باعىتىنداعى جۇمىستى جالعاستىرىپ كەلەدى. وسىعان وراي 2024 جىلدان باستاپ ۇلتتىق كونتينگەنت گولان جوتالارىنداعى بۇۇ ميسسياسىنا قاتىسا باستادى.
كونتينگەنتتى شەتەلدىك ميسسياعا جىبەرەر الدىندا اسكەري قىزمەتشىلەر بۇۇ تالاپتارىنا ساي كەشەندى دايىندىقتان ءوتتى. ولارعا قاجەتتى تەحنيكا, زاماناۋي قارۋ-جاراق پەن ارنايى جابدىقتار تولىق قامتاماسىز ەتىلگەن.
بىتىمگەرلەردى دايارلاۋ قورعانىس مينيسترلىگىنىڭ بىتىمگەرلىك وپەراتسيالار ورتالىعىندا جۇرگىزىلەدى. مۇندا اسكەري قىزمەتشىلەر حالىقارالىق گۋمانيتارلىق قۇقىقتى, اعىلشىن ءتىلىن, اسكەري مەديتسينانى, ميناسىزداندىرۋ تاسىلدەرىن مەڭگەرىپ, پاترۋلدەۋ مەن باقىلاۋ بەكەتتەرىندە قىزمەت ەتۋ ماشىعىن شىڭدايدى.
قازاقستان – بۇۇ-دان بىتىمگەرلىك ميسسياعا قاتىسۋعا دەربەس ماندات العان پوستكەڭەستىك كەڭىستىكتەگى العاشقى ءارى جالعىز مەملەكەت. گولان جوتالارىندا ۇلتتىق كونتينگەنتتىڭ ورنالاستىرىلۋى وتاندىق ارميانىڭ كاسىبي دايارلىعى مەن جاۋىنگەرلىك قابىلەتىنىڭ حالىقارالىق دەڭگەيدە مويىندالعانىن كورسەتتى.
بۇۇ ميسسياسىنىڭ قولباسشىلىعى دا وتاندىق اسكەري قىزمەتشىلەردىڭ جوعارى كاسىبيلىگىنە وڭ باعا بەرىپ, ولاردىڭ بىتىمگەرلىك قىزمەتكە قوسقان ۇلەسىن ەرەكشە اتاپ ءوتتى.
بۇعان دەيىن, بىتىمگەرلەردىڭ بۇۇ ميسسياسىنا دايىندىعى تەكسەرىلگەنى حابارلاعان ەدىك.
