ەلباسى پرەمەر-مينيستر كارىم ءماسىموۆتى قابىلدادى

استانا. 14 مامىر. مەملەكەت باسشىسى پرەمەر-مينيستر كارىم ءماسىموۆتى قابىلدادى. بۇل تۋرالى akorda.kz  حابارلادى. كەزدەسۋ بارىسىندا كارىم ءماسىموۆ قازاقستان پرەزيدەنتىنە نەگىزگى الەۋمەتتىك-ەكونوميكالىق كورسەتكىشتەر, ماڭىزدى مەملەكەتتىك باعدارلامالاردىڭ جۇزەگە اسىرىلۋى, سونداي-اق, جاڭعىرتۋ جونىندەگى ۇلتتىق كوميسسيانىڭ قازىرگى قىزمەتى تۋرالى باياندادى. نۇرسۇلتان نازارباەۆ كوميسسيانىڭ بەلسەندى ءارى ءتيىمدى جۇمىس ىستەگەنى ماڭىزدى ەكەنىن اتاپ ءوتتى. «كوميسسيا وزىنە تاپسىرىلعان مىندەتتەردى تەزىرەك ورىنداۋعا كىرىسكەنى ءجون. زاڭنامالىق وزگەرىستەر جوباسىنىڭ ءبىر بولىگىن پارلامەنتتىڭ قىركۇيەكتەگى سەسسياسىنا دەيىن ازىرلەۋ كەرەك, بۇل العا قويىلعان مىندەتتەردى ۋاقىتىندا جۇزەگە اسىرۋعا وڭ ىقپال ەتەدى», – دەدى مەملەكەت باسشىسى. قازاقستان پرەزيدەنتى كوكتەمگى ەگىس جۇمىستارىن ساپالى اتقارۋ ىسىنە اتسالىسۋ, ەلدىڭ ءارى قاراي يندۋستريالىق-يننوۆاتسيالىق دامۋىن, سونداي-اق, ونىڭ نەگىزگى ەكونوميكالىق كورسەتكىشتەرىنىڭ ورنىقتىلىعىن قامتاماسىز ەتۋ قاجەتتىگىنە نازار اۋداردى. كەزدەسۋ قورىتىندىسى بويىنشا مەملەكەت باسشىسى بىرقاتار ناقتى تاپسىرما بەردى. ەلامان قوڭىر. دەرەك, سۋرەت: akorda.kz.