اتىراۋ. 14 مامىر. جايىق وزەنىنە قۇياتىن ارنالاردا بالىقتاردىڭ قىرىلعانى انىقتالدى. بۇل تۋرالى egemen.kz ءتىلشىسى حابارلادى.
«اقجايىق» مەملەكەتتىك تابيعي رەزەرۆاتىنىڭ ءبولىم باسشىسى الەكساندر يۆاسەنكونىڭ ءمالىم ەتۋىنشە, بالىقتاردىڭ قىرىلعانى تۋرالى دەرەك 12 مامىردا بەلگىلى بولعان. الايدا, اتىراۋداعى تولاسسىز نوسەر سالدارىنان سول كۇنى وقيعا ورنىنا بارۋ مۇمكىن بولماعان. ال كەشە رەزەرۆات ماماندارى مەن ينسپەكتورلارى اققايراڭ, موڭكە جانە قاراكوز بالىقتارىنىڭ قىرىلۋىنا نە سەبەپ بولعانىن انىقتاۋعا كىرىستى.
«بالىقتار جايىق وزەنىنە قۇياتىن جىڭىشكە ارنالاردا قىرىلعان. ولار نوسەردەن كەيىن كوتەرىلگەن سۋمەن وسى ارنالارعا ءوتىپ كەتكەن. وتتەگىنىڭ جەتىسپەۋىنەن قىرىلۋى مۇمكىن», – دەيدى الەكساندر يۆاسەنكو.
مامانداردىڭ پايىمداۋىنشا, 2 تونناعا جۋىق قارا بالىق قىرىلعان. ولگەن بالىقتاردان جانە سۋدان سىنامالار الىندى. ولەكسەلەردى كومۋ ارقىلى جويۋ جۇزەگە اسىرىلدى.
جولداسبەك شوپەعۇل.
دەرەك: egemen.kz.
سۋرەت: راحىم قويلىباەۆ.
