باتىس قازاقستاندا جىل باسىنان بەرى اۆتوكولىك سانى كۇرت كوبەيدى

ورال. 14 مامىر. باتىس قازاقستان وبلىسىندا 2015 جىلدىڭ ءبىرىنشى توقسانىندا 192 650 اۆتوموبيل تىركەلگەن. وبلىستا كولىكتىڭ كۇرت كوبەيۋىن جول ساقشىلارى رەسەي ءرۋبلى باعامىنىڭ تومەندەۋىمەن جانە ءبىزدىڭ ازاماتتاردىڭ ساتىپ الۋ قابىلەتىنىڭ وسۋىمەن بايلانىستىرىپ وتىر. بۇل تۋرالى باتىس قازاقستان وبلىسىنىڭ ىشكى ىستەر دەپارتامەنتىنە سىلتەمە جاساپ, egemen.kz ءتىلشىسى حابارلادى. «تەك سوڭعى ءۇش جىلدا ورال وڭىرىندەگى اۆتوموبيلدەردىڭ سانى 50 مىڭعا ارتتى. مىسالى, 2014 جىلى وبلىستا 185 مىڭ اۆتوكولىك تىركەلسە, تەك 2015 جىلدىڭ I توقسانىنىڭ وزىندە ونىڭ سانى 192 مىڭنان اسىپ ءتۇستى», – دەپ مالىمدەدى باتىس قازاقستان وبلىسى ىشكى ىستەر دەپارتامەنتى باستىعىنىڭ ورىنباسارى ساعات ماديەۆ. سونىمەن بىرگە ول كەدەندىك وداق قىزمەتىنىڭ جاڭا دەڭگەيگە كوتەرىلۋىنە وراي ترانزيتتىك كولىكتەر شوعىرى دا ارتا تۇسكەنىن ايتتى. ماسەلەن, 2014 جىلدىڭ ءۇش ايىندا اقجايىق ايماعى ارقىلى 248 مىڭ اۆتوموبيل وتكىزىلسە, 2015 جىلى ونىڭ سانى 280 مىڭعا جەتكەن. «رەسپۋبليكالىق ماڭىزى بار جولداردا اۆتوكولىك تاسقىنىنىڭ كوبەيۋى جول-كولىك وقيعاسىنىڭ جيىلەۋىنە اسەر ەتپەي قويمايدى», – دەيدى ساعات ماديەۆ. تەمىر قۇسايىن. دەرەك: egemen.kz. سۋرەت: kapital.kz.