فوتو: اشىق دەرەككوز
«سىزدەردى حالىقارالىق مۋزەيلەر كۇنىمەن شىن جۇرەكتەن قۇتتىقتايمىن! مۋزەي – وتكەندى بۇگىنمەن جالعايتىن, تاريح تاعىلىمى وسكەلەڭ ۇرپاقتىڭ تانىمىنا جول اشاتىن كيەلى كەڭىستىك. مۋزەيدە وتكەن تاريحتى جاقىننان تانىپ, حالقىمىزدىڭ مادەنيەتى مەن رۋحاني مۇراسىن تەرەڭىرەك سەزىنۋگە بولادى. ءاربىر تۇپنۇسقا جادىگەر, قۇندى قۇجات, ونەر تۋىندىسى مەن ارحەولوگيالىق ولجا – ەل تاريحىنىڭ, ادام تاعدىرىنىڭ, ۇرپاقتار ساباقتاستىعىنىڭ ءبىر بولشەگى. وسى قۇندىلىقتار ارقىلى ۇلتتىق مۇرا كەلەر ۇرپاققا امانات بولىپ جەتەدى. بۇگىندە قازاقستاننىڭ مۋزەي سالاسى – اۋقىمدى ءارى قارقىندى دامىپ كەلە جاتقان جۇيە», دەيدى ايدا بالاەۆا.
ءمينيستردىڭ ايتۋىنشا, ەلىمىزدە 286 مۋزەي جۇمىس ىستەيدى. ولاردىڭ قورىندا 4,5 ميلليوننان استام جادىگەر ساقتالعان, ال مۋزەيلەرگە جىل سايىن 6,5 ميلليوننان استام ادام كەلەدى.
«بۇل سانداردىڭ ارتىندا كورمەلەرگە دەگەن قىزىعۋشىلىق قانا ەمەس, قوعامنىڭ ءوز تاريحىن تانىپ-بىلۋگە, مادەني ساباقتاستىقتى ساقتاۋعا دەگەن تەرەڭ سۇرانىسى تۇر. مەملەكەت باسشىسىنىڭ باستاماسىمەن تاريحي سانانى جاڭعىرتۋعا, مادەني مۇرانى ساقتاۋعا جانە ونى بولاشاق ۇرپاققا جەتكىزۋگە ايرىقشا كوڭىل ءبولىنىپ كەلەدى. جاڭا كونستيتۋتسيامىزدىڭ قۇندىلىقتار جۇيەسىندە مادەنيەت, ءبىلىم, عىلىم جانە يننوۆاتسيا ادام كاپيتالىن دامىتۋ مەن جاسامپاز قوعام قالىپتاستىرۋدىڭ ماڭىزدى نەگىزدەرى رەتىندە ەرەكشە مانگە يە بولدى. سوندىقتان قازىرگى مۋزەي – مۇرانى ساقتايتىن ورىن عانا ەمەس, تاربيە, اعارتۋ جانە ۇلتتىق بولمىستى نىعايتۋ ءىسىنىڭ ماڭىزدى ارقاۋى», دەدى مينيستر.
بىلتىر رەسپۋبليكالىق مۋزەيلەر 1,5 مىڭنان استام ءىس-شارا ۇيىمداستىرعان. ونىڭ ىشىندە 187 كورمە ءوتىپ, ولاردى 800 مىڭعا جۋىق ادام تاماشالاعان.
«الماتىداعى ۇلتتىق ورتالىق مۋزەيدە «التىن وردا» زالى اشىلىپ, «قازاقستاننىڭ تاۋەلسىزدىگى» زالىنىڭ رەەكسپوزيتسياسى جۇرگىزىلدى. مۇنداي جوبالار قازاقستان تاريحىنىڭ ماڭىزدى كەزەڭدەرىن جاڭاشا تانىتىپ, ونىڭ مازمۇنىن تەرەڭىرەك اشۋعا مۇمكىندىك بەرەدى», دەيدى بالاەۆا.
مينيستر مۋزەي سالاسىن تسيفرلاندىرۋدىڭ ماڭىزى ەرەكشە ەكەنىن اتاپ ءوتتى. بۇل جۇمىس مۋزەيلەرمەن قاتار مۋزەي-قورىقتاردا دا جۇيەلى تۇردە جۇزەگە اسىپ جاتىر. قازىر مۇراجايعا كەلۋشىلەرگە ىڭعايلى ءارى زاماناۋي قىزمەت كورسەتۋگە مۇمكىندىك بەرەتىن ەلەكتروندى كىرۋ جۇيەسى ەنگىزىلگەن.
«E-museum بىرىڭعاي تسيفرلىق كەڭىستىگى دامىپ كەلەدى. بۇل جۇيەگە ەلىمىزدىڭ بارلىق 20 وڭىرىنەن 284 مۋزەي قوسىلدى. تسيفرلىق كاتالوگقا مۋزەي قورىنىڭ 66 مىڭنان استام بىرلىگى ەنگىزىلىپ, 750 ۇشولشەمدى مودەل جاسالدى, 15 ۆيرتۋالدى تۋر قولجەتىمدى بولدى», دەدى مينيستر.
ايتا كەتەيىك, بۇگىن كەشكە ەلىمىزدىڭ بارلىق وڭىرىندە ءداستۇرلى «مۋزەيلەر ءتۇنى» اكتسياسى وتەدى.
«قازاقستاننىڭ مۋزەيلەرى مەن مۋزەي-قورىقتارى كەلۋشىلەرگە ەسىگىن ەرەكشە فورماتتا اشىپ, كەشكى ەكسكۋرسيالار, كورمەلەر, ينتەراكتيۆتى باعدارلامالار, شىعارماشىلىق كەزدەسۋلەر مەن مادەني-اعارتۋشىلىق ءىس-شارالار ۇسىنادى. بارشا مۋزەي قىزمەتكەرلەرىنە كاسىبىنە ادالدىعى, ۇلتتىق مۇراعا دەگەن جاناشىرلىعى جانە قوعامنىڭ رۋحاني وركەندەۋىنە قوسىپ كەلە جاتقان زور ۇلەسى ءۇشىن شىنايى العىسىمدى بىلدىرەمىن», دەدى ايدا بالاەۆا.
