فوتو: استانا اكىمدىگى
جوبا ەلوردا پروكۋراتۋراسى مەن قالالىق مەكەمەلەردىڭ بىرلەسۋىمەن جۇزەگە اسىپ وتىر. ارنايى جابدىقتالعان كولىكتەر تىيىم سالىنعان جەرلەرگە قويىلعان اۆتوكولىكتەردى انىقتاپ, قۇقىقبۇزۋشىلىقتى بىردەن جۇيەگە ەنگىزەدى. سونىڭ نەگىزىندە ايىپپۇل راسىمدەلەدى.
مامانداردىڭ ايتۋىنشا, رەتسىز قويىلعان كولىكتەر جول قوزعالىسىنا ايتارلىقتاي قاۋىپ توندىرەدى. اسىرەسە, ولار جۇرگىزۋشىلەردىڭ كورۋ اۋماعىن شەكتەپ, بالالاردىڭ جولدى قاۋىپسىز كەسىپ وتۋىنە كەدەرگى كەلتىرەدى. سونداي-اق مۇنداي جاعدايلار جەدەل جاردەم مەن ءورت ءسوندىرۋ قىزمەتتەرىنىڭ قوزعالىسىن قيىنداتادى.
قالالىق جول قوزعالىسىن ۇيىمداستىرۋ ورتالىعىنىڭ مالىمەتىنشە, ءموبيلدى اپپاراتتىق-باعدارلامالىق كەشەندەر قالا كوشەلەرىندە تۇراقتى تۇردە جۇمىس ىستەيدى. جۇيە ارنايى مارشرۋتپەن قوزعالىپ, تىيىم سالىنعان ايماقتاردى ۇزدىكسىز باقىلايدى.
ورتالىق جۇرگىزۋشىسى زارحان ساپارقۇلدىڭ سوزىنشە, ءبىر ءموبيلدى كەشەن كۇنىنە ورتا ەسەپپەن 100-گە جۋىق قۇقىقبۇزۋشىلىقتى تىركەي الادى.
«ەگەر جۇرگىزۋشى ەرەجەنى بىرنەشە رەت بۇزسا, ايىپپۇل دا قايتا راسىمدەلەدى. سوندىقتان مۇنداي باقىلاۋ جۇيەسى جۇرگىزۋشىلەردى تارتىپكە بەيىمدەيدى», دەدى ول.
كەشەندەر ينتەرنەت قۇرىلعىسىمەن جابدىقتالعان. سونىڭ ارقاسىندا قۇقىقبۇزۋشىلىق تۋرالى اقپارات جۇيەگە بىردەن جىبەرىلىپ وتىرادى.
جوبا اياسىندا تەك باقىلاۋ جۇرگىزىلمەيدى. تۇرعىندارعا ءتۇسىندىرۋ جۇمىستارى ۇيىمداستىرىلىپ, جول قاۋىپسىزدىگىنە قاتىستى اقپاراتتىق بۋكلەتتەر تاراتىلادى. ۇيىمداستىرۋشىلاردىڭ ايتۋىنشا, باستاما اي سايىن 100 مىڭنان استام ادامدى قامتيدى.
استانا قالاسى پروكۋراتۋراسىنىڭ باسقارما پروكۋرورى اقجول ءساتىلدا زاڭسىز اۆتوتۇراقتىڭ سالدارى اۋىر بولۋى مۇمكىن ەكەنىن ايتتى.
«تىيىم سالىنعان جەرگە كولىك قويۋ جاياۋ جۇرگىنشىلەرگە, اسىرەسە بالالارعا قاۋىپ توندىرەدى. جول ەرەجەسىن ەلەمەۋ اۋىر زارداپتارعا اكەلۋى مۇمكىن. مۇنداي جۇيەلەر قۇقىقبۇزۋشىلىقتاردىڭ الدىن الىپ, جولداعى ءتارتىپتى كۇشەيتۋگە مۇمكىندىك بەرەدى», دەدى پروكۋرور.
