ماڭعىستاۋ وڭىرىندە قىزىل كىتاپقا ەنگەن قۇستار قىرىلۋدا

استانا. 14 مامىر. ەلىمىزدەگى ەلەكتر باعاندارىنىڭ باسىم بولىگى قۇستاردى قورعاۋ قوندىرعىلارىمەن جابدىقتالماعان. سونىڭ سالدارىنان قاراسى سيرەپ كەتكەن قۇستاردىڭ جويىلۋ قاۋپى ءتونىپ تۇر. بۇل تۋرالى 24.kz حابارلادى. ماڭعىستاۋ دالاسىنا زەرتتەۋ جۇرگىزگەن قازاقستاندىق جانە رەسەيلىك عالىمدار قىزىل كىتاپقا ەنگەن قۇستاردىڭ جويىلىپ ءبىتۋ قاۋپى ءتونىپ تۇر دەپ دابىل قاعۋدا. اجال قۇشقان قۇستاردان تابيعاتقا 18 ميلليون تەڭگەگە جۋىق شىعىن كەلگەن. ماڭعىستاۋ جازىعىن دالا بۇركىتى, قاراقۇس, يتەلگى, لاشىن, ۇكى سەكىلدى سيرەك كەزدەسەتىن قۇستار مەكەندەيدى. ولاردىڭ باسىم بولىگى قىزىل كىتاپقا ەنگىزىلگەن. الايدا سوڭعى جىلدارى وسى باعالى قۇستار ەلەكتر جەلىلەرىنە ءتۇسىپ, جاپپاي قىرىلۋدا. بۇعان ارنايى زەرتتەۋ جۇرگىزگەن قازاقستان مەن رەسەي عالىمدارى كوز جەتكىزىپ وتىر. زەرتتەۋشىلەر جازىق دالانى ارالاۋ بارىسىندا باعانالاردىڭ تۇبىندە جاتقان 123 قۇستىڭ ولەكسەسىن تاپقان. تابيعاتقا كەلگەن شىعىن 17 ميلليون تەڭگەدەن اسىپ جىعىلادى. ورنيتولوگ مارك پەستوۆ: «ءبىز قىزىل كىتاپقا ەنگەن ۇكىنىڭ ولەكسەسىن تاپتىق. قۇس ەلەكتر باعانىنا قونعان كەزدە قىسقا تۇيىقتالۋ بولىپ, بىردەن جەرگە قۇلاعان. قازاقستاننىڭ زاڭى بويىنشا ۇكىنى اۋلاعاندارعا 200 ايلىق ەسەپتىك كورسەتكىش كولەمىندە ايىپپۇل سالىنادى. ال ءبىز مۇنداي باعالى قۇستاردى ءار شاقىرىم سايىن كەزدەستىرىپ وتىرمىز. سونىڭ ىشىندە, توققا تۇسكەن ۇلكەن جىرتقىش قۇستاردىڭ ءولى دەنەسى كوپ تابىلدى» –.دەيدى. ايتا كەتەيىك, ەكولوگتار ەلەكتر تاراتۋ مەكەمەلەرىنىڭ باسشىلىعىمەن اتالعان ماسەلەنى بىرىگىپ شەشۋگە نيەتتى. ولاردىڭ پايىمداۋىنشا جەلىلەر تالاپقا ساي جابدىقتالماسا, قىزىل كىتاپقا ەنگەن قۇستار اڭشىلاردىڭ قولىنان ەمەس, ەلەكتر باعاندارىنىڭ توعىنا ءتۇسىپ اجال قۇشا بەرمەك. تالعات رايىمبەك. دەرەك, سۋرەت: 24.kz.