فورۋمعا 4 مىڭنان استام كاسىپكەر مەن 200-دەن اسا جەتەكشى كومپانيا وكىلدەرى قاتىسادى دەپ جوسپارلانىپ وتىر. ءىس-شارا بارىسىندا تەحنولوگيا, مەنەدجمەنت, گەوساياسات جانە بيزنەستى دامىتۋ ماسەلەلەرى تالقىلانادى.
باعدارلاماعا الەمدىك دەڭگەيدەگى ساراپشىلار شاقىرىلعان. ولاردىڭ قاتارىندا ەۋروپالىق كوميسسيانىڭ بۇرىنعى توراعاسى جوزە مانۋەل بارروزۋ, تسيفرلىق ەكونوميكا ساراپشىسى دون تەپسكوت, Siri جۇيەسىنىڭ نەگىزىن قالاۋشىلاردىڭ ءبىرى ليۋك دجۋليا, تانىمال جازۋشى دجون گرەي جانە Glovo كومپانياسىنىڭ نەگىزىن قالاۋشى ساشا ميشو بار.
فورۋمنىڭ نەگىزگى ماقساتى – كاسىپكەرلەرگە تاجىريبە الماسىپ, جاڭا سەرىكتەستەر تابۋعا مۇمكىندىك بەرەتىن اشىق ديالوگ الاڭىن قالىپتاستىرۋ. ءىس-شاراعا قازاقستاننىڭ ءىرى بيزنەس وكىلدەرى دە قاتىسادى. ولاردىڭ اراسىندا ايدىن راحىمباەۆ, ەلدار ابدىرازاقوۆ جانە ارمانجان بايتاسوۆ بار.
«فورۋمدا الەمدىك دەڭگەيدەگى ساراپشىلار مەن ەلىمىزدىڭ مىقتى كوشباسشىلارى وي بولىسەدى. اسىرەسە, جوزە مانۋەل بارروزۋدىڭ قاتىسۋى ءبىز ءۇشىن ەرەكشە ماڭىزدى. ول – ون جىل بويى ەۋروپالىق كوميسسيانى باسقارعان جانە پورتۋگاليانىڭ پرەمەر-ءمينيسترى بولعان الەمدىك دەڭگەيدەگى ساياساتكەر. مۇنداي ساراپشىلارمەن ديالوگ قۇرۋ جاھاندىق گەوساياسي جاعدايدى تالداۋعا جانە وتاندىق بيزنەستىڭ الەمدىك ەكونوميكادان ءوز ورنىن تابۋىنا مۇمكىندىك بەرەدى. ونىڭ حالىقارالىق ينستيتۋتتاردى باسقارۋداعى تاجىريبەسى ءبىزدىڭ جوبالاردى قازاقستان شەكاراسىنان تىس جەرلەرگە شىعارۋ ءۇشىن جول اشادى», دەيدى فورۋم نەگىزىن قالاۋشى ءارى باس ديرەكتور ماقسات قۇربەنوۆ.
ۇيىمداستىرۋشىلاردىڭ ايتۋىنشا, فورۋمدا كومپانيالاردى حالىقارالىق نارىققا شىعارۋ, بيزنەستى ماسشتابتاۋ جانە جاھاندىق ەكونوميكالىق وزگەرىستەرگە بەيىمدەلۋ جولدارى قاراستىرىلادى.
«الەم تەز وزگەرىپ جاتىر, سوندىقتان وتاندىق بيزنەس حالىقارالىق ارەنادا باتىل ارەكەت ەتۋگە ءتيىس. ءبىزدىڭ كاسىپكەرلەردىڭ جاھاندىق دەڭگەيدەگى كومپانيالار قۇرۋ ءۇشىن الەۋەتى دە, جىگەرى دە جەتەدى دەپ سەنەمىن. ءبىز New Vision Forum-دى ءاربىر كاسىپكەر ۇيرەنشىكتى شەڭبەردەن شىعىپ, ءوز ىسىنە جاڭا قىرىنان قاراي الاتىن ەركىن كەڭىستىك رەتىندە قالىپتاستىردىق», دەپ اتاپ ءوتتى Kusto Group قوسالقى قۇرىلتايشىسى, فورۋم توراعاسى قانات كوپباەۆ.
بيىلعى فورۋمعا 5 مىڭنان استام ادام قاتىسادى دەپ كۇتىلەدى. قاتىسۋشىلار ءۇشىن بيزنەس-كەيستەر, نەتۆوركينگ الاڭدارى, تەحنولوگيالىق كورمەلەر مەن جابىق سەسسيالار ۇيىمداستىرىلادى. ءىس-شارانى Nobel Fest ۇيىمداستىرىپ وتىر. فورۋم الماتى قالاسىنىڭ اكىمدىگى قولداۋىمەن وتەدى.
