فوتو: pexels
قارجى ساراپشىسى ايبار ولجاەۆتىڭ ايتۋىنشا, ەندى 2 ميلليون تەڭگەدەن اساتىن اقشا اۋدارىمدارى كەزىندە مىندەتتى بيومەتريالىق سايكەستەندىرۋ جۇرگىزىلەدى. ونىڭ پىكىرىنشە, بۇل ادال مامىلە جاسايتىن ازاماتتارعا قيىندىق تۋدىرمايدى جانە الاياقتىقتىڭ الدىن الۋعا كومەكتەسەدى.
ساراپشىنىڭ سوزىنشە, سوڭعى جىلدارى زەينەتكەرلەر مەن ازاماتتاردىڭ ءىرى كولەمدەگى قاراجاتىن الەۋمەتتىك ينجەنەريا مەن پسيحولوگيالىق ىقپال ارقىلى يەمدەنۋ جاعدايلارى كوبەيگەن. سوندىقتان قوسىمشا تەكسەرۋ جۇيەسى قاجەت.
سونىمەن قاتار بيومەتريا قارجىلىق وپەراتسيالاردىڭ اشىقتىعىن ارتتىرادى. زاڭدى مامىلە جاساعان ازاماتتار كەيىن سالىق ورگاندارى نەمەسە باسقا مەملەكەتتىك مەكەمەلەر تاراپىنان ارتىق سۇراقتارعا تاپ بولمايدى.
ايبار ولجاەۆ الاياقتار تالاپتاردى اينالىپ ءوتۋ ءۇشىن سومالاردى ءبولىپ اۋدارۋى مۇمكىن ەكەنىن, بىراق بۇل جاعدايدا جابىرلەنۋشىنىڭ جاعدايدى ءتۇسىنىپ, الدانعانىن اڭعارۋعا ۋاقىتى بولاتىنىن اتاپ ءوتتى.
دەگەنمەن جاڭا تالاپتار بانك جۇيەسىنە ايتارلىقتاي تەحنيكالىق جۇكتەمە تۇسىرەدى. ەندى قارجى ۇيىمدارى بيومەتريالىق سايكەستەندىرۋ كەزىندە جينالعان فوتو جانە ۆيدەو ماتەريالداردى بەس جىل بويى ساقتاۋعا مىندەتتەلەدى.
ساراپشى مۇنداي كولەمدەگى دەرەكتەردى ساقتاۋ ءىرى ينفراقۇرىلىمدىق شەشىمدەردى قاجەت ەتەتىنىن ايتادى. سەبەبى قازاقستاننىڭ قارجى جۇيەسىندە 9 ميلليوننان استام ادام تىركەلگەن, ال جينالاتىن اقپارات كولەمى وتە ۇلكەن بولادى.
ايتا كەتەيىك, باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى ينتەرنەت-الاياقتاردىڭ Apple مەن PayPal اتىن پايدالانىپ, جالعان حابارلامالار تاراتىپ جاتقانىن مالىمدەدى.
ەلىمىزدە الاياقتاردىڭ قوڭىراۋىن سەكۋند ىشىندە بۇعاتتاپ, توقتاتاتىن جۇيە ەنگىزىلەدى.
