باتىس قازاقستاندا كەن ورنى اۋماعىنان ەكى اۋىل كوشىرىلمەك

ورال. 14 مامىر. باتىس قازاقستان وبلىسىندا قاراشىعاناق كەن ورنى ماڭايىنداعى بەرەزوۆكا جانە بەستاۋ اۋىلدارى وزگە جاققا كوشىرىلمەك. اتالعان باستاما قازاقستان ۇكىمەتى قاراشىعاناق كەن ورنىنىڭ سانيتارلىق قورعاۋ اۋماعى راديۋسىن بەلگىلەۋ جونىندەگى جاڭا جوبانى بەكىتكەن كەزدە جۇزەگە اسادى. بۇل تۋرالى egemen.kz ءتىلشىسى حابارلادى. قولعا الىنعان الەۋمەتتىك ماڭىزى وتە جوعارى ماسەلەگە بايلانىستى قاراشىعاناق كەنىشىندەگى كپو ب.ۆ. كونسورتسيۋمى سانيتارلىق قورعاۋ ايماعى راديۋسىن ۇلعايتۋ جونىندەگى جوبانى جاساقتادى. ونى ەلىمىزدىڭ دەنساۋلىق ساقتاۋ مينيسترلىگى تۇتىنۋشىلاردىڭ قۇقىن قورعاۋ جونىندەگى كوميتەتكە تاپسىردى. جەر قويناۋىن پايدالانۋشىلاردىڭ ومىرشەڭ كوزقاراسىنان تۋىنداعان تىڭ جوبا كەن ورنىنىڭ وڭتۇستىك بولىگىندەگى نىسانداردىڭ جابدىقتارىن جاڭعىرتۋمەن بايلانىستى بولىپ وتىر. سوعان سايكەس سانيتارلىق قورعاۋ ايماعىنىڭ ءىس-ارەكەت اۋماعىنا بەرەزوۆكا جانە بەستاۋ اۋىلدارى ىلىنگەن. اتالعان ەلدى مەكەندەردىڭ تۇرعىندارىنا كوشۋ ءۇشىن ءبورلى, ارالتال اۋىلدارى مەن اقساي قالاسى ۇسىنىلعان. باتىس قازاقستان وبلىستىق اكىمدىگىنەن الىنعان اقپاراتتا اقساي قالاسىنا ادامداردى كوشىرۋ بيىلعى جىلدىڭ ءۇشىنشى توقسانىنا بەلگىلەنگەنى كورسەتىلگەن. كەلەسى كەزەكتەگى ءبورلى مەن ارالتال اۋىلدارىنا تۇرعىندار تيىسىنشە 2016 جانە 2017 جىلدارى كوشىرىلمەك. «كوشۋ مەرزىمىنىڭ بۇلاي بولۋ سەبەبى, جەر تەلىمدەرىن بەرۋ مەن ءۇي قۇرىلىستارىن جۇرگىزۋگە بايلانىستى», – دەيدى باتىس قازاقستان وبلىسى اكىمىنىڭ ءباسپاسوز حاتشىسى قايرات ابۋوۆ. تەمىر قۇسايىن. دەرەك: egemen.kz. سۋرەت: uralskweek.kz.