استراحاندا «كاسپي – دوستىق تەڭىزى» اتتى ادەبي فورۋم وتەدى

الماتى. 14 مامىر. وسى جىلدىڭ 19-20 مامىر كۇندەرى رەسەيدىڭ استراحان قالاسىندا كاسپي تەڭىزىن جاعالاي قونىس تەپكەن مەملەكەتتەردىڭ ادەبيەت مايتالماندارى باس قوسادى. وعان قازاقستان مەن ءازىربايجاننىڭ, يران مەن تۇركمەنستاننىڭ جانە رەسەيدىڭ – چەشەن-ينعۇش, تاتار-باشقۇرت, قالماق جانە داعىستان حالقىنىڭ اقىن-جازۋشىلارى قاتىسادى. بۇل تۋرالى edil-zhaiyk.kz حابارلادى. «ليتەراتۋرنايا گازەتا» مەن «درۋجبا نارودوۆ, «حۋدوجەستۆەننايا ليتەراتۋرا» سەكىلدى رەسەيلىك اتاقتى باسىلىمداردىڭ ۇيىمداستىرۋمەن وتكىزىلىپ جاتقان جيىندا بىرقاتار قالامگەرلەرگە ۆاسيلي كيريللوۆيچ ترەدياكوۆسكي اتىنداعى حالىقارالىق سىيلىق تابىس ەتىلەدى. ادەبي جيىن قراساڭىندا 100-دەن استام ۇمىتكەر ءازىربايجاننىڭ سامەد ۆۋرگۋن مەن قازاقتىڭ ابايىنىڭ, تاتار ۇلتىنىڭ عابدوللا توقاي مەن اۆار حالقىنىڭ ماگومەد احمەدتى سەكىلدى اقىن-جازۋشىلارىنىڭ شىعارمالارىن ءتارجىمالاۋ ىسىمەن اينالىسقان. ايتا كەتەيىك, فورۋم بارىسىندا ۇمىتكەرلەردىڭ ەڭبەكتەرى باعالانىپ, ۇزدىك شىققاندارعا ارنايى سىيلىق بەرىلەدى. ال فورۋم جۇمىسى «كوركەم اۋدارما – ۇلتارالىق قاتىناستاردى نىعايتۋ قۇرالى» اتتى عىلىمي-شىعارماشىلىق كونفەرەنتسيامەن قورتىندىلانادى. تالعات ءسۇيىنباي. دەرەك: edil-zhaiyk.kz. سۋرەت: berlek-nkp.com.