اتىراۋدا ەكسپورتتالعان مۇنايدان 4 ايدا 130 ملرد. تەڭگە تابىس ءتۇستى

اتىراۋ. 14 مامىر. اتىراۋ وبلىسىنان 4 ايدا مۇنايدى سىرتقى نارىققا ەكسپورتتاۋدان مەملەكەت بيۋدجەتىنە 130 ملرد. تەڭگە كولەمىندە كىرىس ءتۇستى. بۇل تۋرالى وبلىستىق مەملەكەتتىك كىرىس دەپارتامەنتىنە قاراستى ەنەرگەتيكالىق كەدەن بەكەتىنىڭ باسشىسى ەرلان امەنوۆ ءمالىم ەتتى. «2015 جىلدىڭ 4 ايىندا اتىراۋ وبلىسىنان شيكى مۇنايدى سىرتقا شىعارۋدان مەملەكەت بيۋدجەتىنە 130 ملرد. تەڭگە كولەمىندە كىرىس ءتۇستى. بۇل كورسەتكىش وتكەن جىلدىڭ ءدال وسىنداي كەزەڭىمەن سالىستىرعاندا 35 پايىزعا ارتتى. «قارا التىننىڭ» ەكسپورتتاعى ۇلەسى 99,6 پايىزعا دەيىن ۇلعايدى. اتىراۋ وڭىرىنەن وندىرىلەتىن شيكى مۇنايدى ءىرى كولەمدە ساتىپ الۋشىلار قاتارىندا يتاليا, نيدەرلاندى, فرانتسيا, جانە تۇركيا بار. مۇناي ەكسپورتى قۇبىر جانە تەمىرجول كولىگى ارقىلى نوۆوروسسيسك, تامان, ۋست-لۋگا جانە پريمورسك پورتتارىنا جەتكىزىلىپ, ءارى قاراي سۋ كولىگىمەن ساتىپ الۋشى ەلدەرگە تاسىمالدانادى», – دەدى ەنەرگەتيكالىق كەدەن بەكەتىنىڭ باسشىسى. قازىرگى ۋاقىتتا اتالعان كەدەن بەكەتىندە مەملەكەتتىك بيۋدجەتكە اسا كوپ كولەمدە كىرىس تۇسىرەتىن «تەڭىزشەۆرويل», «اناكو», «ماتەن پەترولەۋم» سەرىكتەستىكتەرى مەن «كاسپينەفت» اكتسيونەرلىك قوعامى سەكىلدى 40-قا جۋىق كاسىپورىن راسىمدەلگەن. جولداسبەك شوپەعۇل. دەرەك:egemen.kz. سۋرەت: راحىم قويلىباەۆ.