اقتوبەدە 6 كۇندە 52 قىلمىس ءىزى سۋىماي اشىلدى

اقتوبە. 14 مامىر. اقتوبەدە مەرەكە كۇندەرى, ياعني, 6-12 مامىر ارالىعىندا قۇقىق بۇزۋشىلىقتىڭ الدىن الۋ, قوعامدىق قاۋىپسىزدىكتى قامتاماسىز ەتۋ جانە قىلمىسپەن كۇرەستى كۇشەيتۋ ماقساتىندا ىشكى ىستەر ورگاندارىنىڭ جەكە قۇرامى كۇشەيتىلگەن رەجيمدە جۇمىس ىستەدى. ناتيجەسىندە وسى كۇندەر ارالىعىندا 52 قىلمىس ءىزى اشىلدى. بۇل تۋرالى egemen.kz ءتىلشىسى حابارلادى. قوعامدىق ءتارتىپتى ساقتاۋعا جانە ازاماتتاردىڭ قاۋىپسىزدىگىن قامتامسىز ەتۋگە 1 500-دەن استام قىزمەتكەر جۇمىلدىرىلدى. ونىڭ ىشىندە №6655 اسكەري ءبولىمى, اقتوبە وبلىستىق قىلمىستىق-اتقارۋ جۇيەسى دەپارتامەنتى جانە توتەنشە جاعدايلار دەپارتامەنتىنىڭ قىزمەتكەرلەرى بولدى. 52 قىلمىستان بولەك, بۇرىن جاسالعان 14 قىلمىس, ونىڭ ىشىندە وتكەن جىلى جاسالعان 3 قىلمىس اشىلدى. بۇدان باسقا, 6 كۇن ىشىندە «مۇلدەم توزبەۋشىلىك» تارتىبىمەن 3 441 اكىمشىلىك قۇقىق بۇزۋشىلىق انىقتالدى. ونىڭ ىشىندە جول قاۋىپسىزدىگى بويىنشا – 2 551 جانە كولىكتى ماس كۇيىندە جۇرگىزگەن 46 دەرەك تىركەلدى. پوليتسيا قىزمەتكەرلەرىنىڭ قىراعى اركەتىنىڭ ناتيجەسىندە مەرەكەلىك ءىس-شارالار وتكىزىلگەن جەرلەردە جانە قوعامدىق ورىنداردا ءتارتىپ بۇزۋ, سونداي-اق, اسا اۋىر قىلمىستار بولعان جوق. ساتىبالدى ءساۋىرباي. دەرەك: egemen.kz. سۋرەت: lada.kz.