فوتو: جي كومەگىمەن جاسالعان
ەڭ الدىمەن, ءموبيلدى اۋدارىمدارعا باقىلاۋ كۇشەيتىلەدى. سالىق ورگاندارى بانكتەردەن الىنعان مالىمەتتەردى تالداۋدى باستايدى. ەگەر ءۇش اي قاتارىنان 100 ءتۇرلى ادامنان اقشا ءتۇسىپ, جالپى سوماسى 1 ملن 20 مىڭ تەڭگەدەن اسسا, مۇنداي اۋدارىمدار تەكسەرىلەدى. العاشقى حابارلامالار مامىر ايىندا جىبەرىلەدى.
سونداي-اق رەسەي مەن بەلارۋستەن اكەلىنەتىن كولىكتەر ءۇشىن ۋتيل الىمى وسەدى. ال قازاقستاندا وندىرىلگەن نەمەسە باسقا ەلدەردەن يمپورتتالعان كولىكتەرگە قاتىستى تالاپ وزگەرىسسىز قالادى.
تسيفرلىق اكتيۆتەر سالاسىندا دا وزگەرىس بار. 1 مامىردان باستاپ ستەيبلكوينداردى شىعارۋ مەن اينالىمعا ەنگىزۋدىڭ بىرىڭعاي ەرەجەلەرى كۇشىنە ەنەدى. ەندى مۇنداي اكتيۆتەر تولىق قارجىلاي قامتاماسىز ەتىلۋى ءتيىس جانە ولاردى تەك جارعىلىق كاپيتالى كەمىندە 200 ملن تەڭگە بولاتىن زاڭدى تۇلعالار عانا شىعارا الادى.
مينيستر ۇبت-عا قاتىستى جاڭاشا وزگەرىستەردىڭ قانداي بولاتىنىن جاريالادى
مامىر-قازان ايلارى ارالىعىندا ەلىمىزدە اسكەري جيىندار وتكىزىلەدى. وعان شامامەن 3 مىڭعا جۋىق اسكەري مىندەتتى ازامات شاقىرىلادى.
4 مامىردان باستاپ KEDEN اقپاراتتىق جۇيەسى ەنگىزىلىپ, كەدەندىك تولەمدەردى تولەۋ ءتارتىبى وزگەرەدى. كەيبىر تولەمدەردىڭ بيۋدجەتتىك جىكتەۋ كودتارى جاڭارتىلادى.
ەنەرگەتيكا سالاسىندا دا وزگەرىس بار: رەسەي 1 مامىردان باستاپ قازاقستان مۇنايىن گەرمانياعا «درۋجبا» قۇبىرى ارقىلى جەتكىزۋدى توقتاتپاق. وسىعان بايلانىستى 260 مىڭ توننا مۇناي بالاما باعىتتار ارقىلى تاسىمالدانادى.
ءدىني سالادا Imam AI اتتى جاڭا تسيفرلىق سەرۆيس پيلوتتىق رەجيمدە ىسكە قوسىلادى. ول ءدىني سۇراقتارعا جەدەل جاۋاپ بەرۋگە ارنالعان.
سونىمەن قاتار قارا جانە ءتۇستى مەتالل سىنىقتارىن ەلدەن شىعارۋعا قويىلعان تىيىم تاعى التى ايعا ۇزارتىلادى.
ءبىلىم بەرۋ سالاسىندا 27 مامىردان باستاپ 1-سىنىپقا قۇجات قابىلداۋ باستالىپ, 31 تامىزعا دەيىن جالعاسادى. ال نەگىزگى ۇبت 10 مامىر مەن 10 شىلدە ارالىعىندا وتەدى. تالاپكەرلەر تەستىلەۋدى ەكى رەت تاپسىرىپ, ەڭ ۇزدىك ناتيجەسىمەن گرانت كونكۋرسىنا قاتىسا الادى.
ۇبت فورماتى وزگەرەدى: ەندى تالاپكەرلەر ءبىر-اق رەت تەست تاپسىرادى
اۋە قاتىناسى دا كەڭەيەدى. الماتى مەن پۋسان اراسىندا تىكەلەي رەيس اشىلادى. سونىمەن قاتار Asiana Airlines اۋە كومپانياسى سەۋل – الماتى باعىتىنداعى رەيستەر سانىن ارتتىرادى.
مامىر ايىندا قاجىلىق ماۋسىمى دا باستالادى. ول 15 مامىر مەن 5 ماۋسىم ارالىعىندا وتەدى. قاجىلار ءۇشىن الماتى, استانا جانە شىمكەنت قالالارىنان تىكەلەي رەيستەر ۇيىمداستىرىلادى.
