فوتو: اشىق دەرەككوز
بۇل جاعدايعا قاتىستى 24.kz تىلشىسىنە پىكىر بىلدىرگەن حالىق ءارتىسى مەرۋەرت وتەكەشوۆا جاڭالىقتى ءوزى دە الەۋمەتتىك جەلىدەن ەستىپ, تاڭعالعانىن جەتكىزدى. ونىڭ ايتۋىنشا, بايان الاگوزوۆامەن جەكە تانىس ەمەس, ولار بۇعان دەيىن بەتپە-بەت كەزدەسپەگەن.
اكتريسا پروديۋسەردىڭ ەڭبەگىن سىرتتاي باقىلاپ, ونى تالانتتى مامان رەتىندە قۇرمەتتەيتىنىن اتاپ ءوتتى.
«بۇل جاڭالىق مەن ءۇشىن وتە كۇتپەگەن جەردەن بولدى. بايانمەن ومىردە كەزدەسپەگەن ەكەنبىز, جەكە تانىستىعىمىز جوق. بىراق ونىڭ جۇمىستارىن سىرتتاي باقىلاپ, تالانتتى پروديۋسەر رەتىندە قۇرمەتتەيمىن», دەدى مەرۋەرت وتەكەشەۆا.
سونىمەن قاتار اكتريسا كوپشىلىكتىڭ نازارىن اۋدارتقان «قىز جىبەك» فيلمىندەگى كامزول ماسەلەسىنە دە توقتالدى. ونىڭ ايتۋىنشا, تۇسىرىلىمنەن كەيىن ول كيىمنىڭ ناقتى قايدا ساقتالعانى بەلگىسىز بولعان, كينوستۋديا جابىلعان كەزەڭدە جەكە ادامداردىڭ قولىندا قالىپ قويۋى مۇمكىن.
مەرۋەرت وتەكەشوۆا بۇل جادىگەردىڭ بۇگىنگە دەيىن ساقتالىپ كەلگەنىنە ريزاشىلىعىن ءبىلدىرىپ, ونى مادەني قۇندىلىق رەتىندە باعالادى. سونداي-اق كامزولدىڭ كەيىن مۇراجايعا تاپسىرىلاتىنىنا وڭ كوزقاراس تانىتتى.
اكتريسا بايان الاگوزوۆانىڭ بۇل باستاماسىن ونەرگە دەگەن قۇرمەت دەپ قابىلدايتىنىن جەتكىزدى. دەگەنمەن, سىيلىقتى قابىلداۋ نەمەسە قابىلداماۋ ماسەلەسى بويىنشا ناقتى شەشىم ءالى قابىلدانباعان, سەبەبى تاراپتار ءالى جۇزبە-ءجۇز كەزدەسىپ سويلەسپەگەن.
«قۇمان ەكەۋىمىز ءومىر بويى حالىق ءۇشىن ەڭبەك ەتتىك. بىزدە بيزنەس بولعان جوق, ءبىر جالاقىعا قاراپ جۇمىس ىستەدىك. سوندىقتان بايان ءبىزدىڭ جاعدايىمىزدى ءتۇسىنىپ, وسىنداي ىزگى نيەت تانىتىپ وتىر دەپ ويلايمىن», دەدى اكتريسا.
قازىرگى تاڭدا بۇل وقيعا الەۋمەتتىك جەلىلەردە كەڭىنەن تالقىلانىپ, كوپشىلىك تاراپىنان جىلى پىكىرلەر ايتىلىپ جاتىر.
