فوتو: اشىق دەرەككوز
تجد مالىمەتىنشە, بيىل استانادا بالالاردىڭ تەرەزەدەن قۇلاۋىنا بايلانىستى 5 وقيعا تىركەلگەن. ونىڭ ەكەۋى وكىنىشكە قاراي قايعىلى جاعدايمەن اياقتالعان. ال وتكەن جىلى 58 جاعداي تىركەلىپ, 14 بالا كوز جۇمعان. قاۋىپتىڭ قاتەرىن سەيىلتۋ ماقساتىندا اكتسيا اياسىندا قالا بويىنشا مىڭعا جۋىق تەرەزە بلوكيراتورى ورناتۋ جوسپارلانعان. وسى ماقساتتا ماماندار ەڭ الدىمەن الەۋمەتتىك وسال توپتاعى جانە كوپبالالى وتباسىلارعا باسىمدىق بەرىپ, الدىن الا جاسالعان ءتىزىم بويىنشا ۇيلەردى ارالادى. تۇرعىنداردىڭ كەلىسىمىمەن قاۋىپسىزدىك قۇرىلعىلارى تەگىن ورناتىلىپ, ءتۇسىندىرۋ جۇمىستارى جۇرگىزدى.
استانادا كوپقاباتتى ءۇيدىڭ تەرەزەسىنەن قۇلاعان بالا قازا تاپتى
مامانداردىڭ ايتۋىنشا, مۇنداي وقيعالاردىڭ كوپشىلىگى بالالاردىڭ موسكيت تورىنا سۇيەنۋىنەن بولادى. الايدا تورلار بالانىڭ سالماعىن كوتەرە المايدى.
«سوندىقتان اتا-انالارعا تەرەزەلەرگە ارنايى بلوكيراتورلار ورناتۋ, تەرەزە ماڭىنا جيھاز قويماۋ, بالالاردى قاراۋسىز قالدىرماۋ ۇسىنىلادى. قولدانىلىپ جاتقان بلوكيراتورلار تەرەزەنىڭ تولىق اشىلۋىنا جول بەرمەي, تەك شاعىن ساڭىلاۋ قالدىرادى», دەدى استانا قالاسى توتەنشە جاعدايلار دەپارتامەنتى توتەنشە جاعدايلاردىڭ الدىن الۋ باسقارماسىنىڭ اعا ينجەنەرى ءالي ارعىنباەۆ.
پروفيلاكتيكالىق ءىس-شارا اياسىندا توتەنشەلىكتەر اباي كوشەسى, 63-ءۇي تۇرعىندارىنىڭ پاتەرىنە دە ارنايى تەرەزە قورعانىش قۇرىلعىلارىن ورناتتى. استانالىق تۇرعىن جۇپارگۇل سىۆانوۆا ايتۋىنشا, ولاردىڭ ءوزىنىڭ 21 نەمەرەسى بار, ونىڭ بەسەۋى وسى شاڭىراقتا تۇرادى. كەشكى ۋاقىتتا تاعى ەكى نەمەرەسى كەلىپ تۇرادى. سوندىقتان بالالاردىڭ قاۋىپسىزدىگى – وتباسى ءۇشىن اسا ماڭىزدى ماسەلە.
«بۇرىن بالالار تەرەزەگە جاقىنداعان سايىن قاتتى قورقىپ وتىراتىن ەدىك. ۇيىمىزدە نەمەرەلەر كوپ بولعاندىقتان ولاردىڭ قاۋىپسىزدىگى ءبىز ءۇشىن ەڭ ماڭىزدى ماسەلە. بۇگىن ارنايى كەلىپ, تەرەزەگە قورعانىش قۇرىلعىسىن ورناتىپ بەرگەن ماماندارعا ۇلكەن العىسىمدى بىلدىرەمىن», دەدى ەلوردالىق تۇرعىن جۇپارگۇل سىۆانوۆا.
بۇعان دەيىن بالالار تەرەزەگە جاقىنداعان سايىن الاڭداپ وتىراتىنىن جەتكىزگەن 8-قاباتتاعى تۇرعىن ايجان مۇساجانوۆا دا قاۋىپسىزدىك قۇرىلعىسى ورناتىلعاننان كەيىن كوڭىلدەرى تىنىشتالعانىن جەتكىزدى.
«مەن سەگىزىنشى قاباتتا تۇرامىن. ۇيدە ءبىر جاسار كىشكەنتاي بالام بار, سوندىقتان ونىڭ قاۋىپسىزدىگى ءبىز ءۇشىن ەڭ ماڭىزدى ماسەلە. تەرەزە كەز كەلگەن ۋاقىتتا اشىلىپ كەتۋى مۇمكىن, سول سەبەپتى مۇنداي قورعانىس قۇرالدارىنىڭ ورناتىلۋى وتە قاجەت دەپ ويلايمىن. قازىرگى تاڭدا بالالاردىڭ تەرەزەدەن قۇلاپ كەتۋىنە قاتىستى ءتۇرلى جاعدايلاردى كۇندەلىكتى ينتەرنەتتەن كورىپ ءجۇرمىز. سوندىقتان وسىنداي الدىن الۋ شارالارىنىڭ قولعا الىنعانى وتە ماڭىزدى», دەدى ايجان مۇساجانوۆا.
توتەنشە جاعدايلار دەپارتامەنتى قاۋىپسىزدىككە باعىتتالعان مۇنداي پروفيلاكتيكالىق شارالار الداعى ۋاقىتتا دا جالعاساتىنىن مالىمدەدى.
نۇربولات امانبەك
