بۇل جوبا جادىگەرلەردى تەك كورۋ عانا ەمەس, ولاردى قولمەن ۇستاپ سەزىنۋ جانە زاماناۋي تەحنولوگيالار ارقىلى تانۋدىڭ جاڭا مۇمكىندىكتەرىن اشتى.
قورداي اۋدانىنداعى كەنەن ازىرباەۆ اتىنداعى ادەبي-مەموريالدىق مۋزەيى بازاسىندا وتكەن شارا «قولىڭمەن ۇستاپ, جۇرەكپەن سەزىن!» تانىمدىق بۇرىشىن تولىقتىرا ءتۇستى. ايگىلى حالىق اقىنى, جىراۋ, قازاقستاننىڭ ەڭبەك سىڭىرگەن ونەر قايراتكەرى كەنەن ازىرباەۆتىڭ ءومىرى مەن شىعارماشىلىعىنا ارنالعان جادىگەرلەر كوپشىلىك نازارىنا ۇسىنىلدى. زاعيپ وقىرماندار كەنەن اتانىڭ تۇرمىستا پايدالانعان جەكە زاتتارى مەن كيىمدەرىن قولدارىمەن ۇستاپ تانىستى. كورۋ قابىلەتى تومەن ازاماتتار ءۇشىن 26 جادىگەرگە ارنايى QR-كودتار ورناتىلدى. سمارتفون كومەگىمەن جادىگەرلەر تۋرالى تولىق اقپارات الۋ تەتىگى مازمۇندىق تۇرعىدان جەتىلدىرىلدى.
شۋ اۋداندىق تاريحي-ولكەتانۋ مۋزەيى مەن ارنايى كىتاپحانا بىرلەسىپ, «جانارسىز دا جارىق الەم» اتتى شارا ۇيىمداستىردى. «تيفلومۋزەي» جوباسى اياسىندا مۇندا 20 QR-كود ورناتىلىپ, كەلۋشىلەرگە تاريحي ەكسپوناتتاردىڭ مازمۇنى تسيفرلىق فورماتتا قولجەتىمدى بولدى. كەروسين شامى, شوق ۇتىك, كۇبى, قوبىز, پيونەر بارابانى, رۋبەل مەن جۇگەن سەكىلدى ۇلتتىق قۇندىلىعى جوعارى بۇيىمداردىڭ تاريحى جان-جاقتى تانىستىرىلدى.
ەكى شارانىڭ دا باستى مۇددەسى – ەرەكشە قاجەتتىلىگى بار ازاماتتاردىڭ مۋزەي ەكسپوزيتسيالارىنا ەركىن قول جەتكىزۋىنە جاعداي جاساۋ جانە ەستۋ, سەزىنۋ ارقىلى تانىمدىق كوكجيەگىن كەڭەيتۋ. شارا اياسىندا كىتاپحانا قورىنا جاڭادان كەلىپ تۇسكەن ادەبيەتتەردەن «كىتاپ – تاريح ايناسى, شەجىرە – ۇرپاق مۇراسى» اتتى كىتاپ كورمەسى جاسالىپ, بيبليوگرافيالىق شولۋ ۇسىنىلدى.
جيىن سوڭىندا كىتاپحانا وقىرماندارى مەن مۋزەي قوناقتارى العان اسەرلەرىمەن ءبولىسىپ, مادەنيەتتى تسيفرلاندىرۋ مەن ينكليۋزيۆتى ورتا قالىپتاستىرۋعا ۇلەس قوسىپ جۇرگەن ۇيىمداستىرۋشىلارعا ريزاشىلىعىن ءبىلدىردى.
