ۇلتتىق ۋنيۆەرسيتەت عىلىمي «ءدىنتانۋ» جۋرنالىن جارىققا شىعارادى

ءال-فارابي اتىنداعى قازاق ۇلتتىق ۋنيۆەرسيتەتى, فيلوسوفيا جانە ساياساتتانۋ فاكۋلتەتى, ءدىنتانۋ جانە مادەنيەتتانۋ كافەدراسىنىڭ باستاماسىمەن «ءدىنتانۋ» سالاسى بويىنشا عىلىمي جۋرنال جارىققا شىقپاق. قازۇۋ حابارشىسىنىڭ «ءدىنتانۋ» سەرياسى – قازاقستاندا العاش رەت ءدىنتانۋدى عىلىمي زەرتتەۋ جانە اكادەميالىق وقىتۋ نىسانى رەتىندە زەرتتەۋگە باعىتتالعان عىلىمي-تەوريالىق جۋرنال بولىپ تابىلادى. جۋرنالدا ءدىنتانۋدىڭ بارلىق باعىتتارى قامتىلىپ, وزەكتى ماسەلەلەرى تالقىلانىپ, ىرگەلى جانە قولدانبالى زەرتتەۋلەر ناتيجەسى جاريالانادى دەپ جوس­پارلانىپ وتىر. سونىمەن قوسا, ءدىنتانۋ سالاسىنداعى جوعارى بىلىكتى مامانداردى دايارلاۋ ءۇشىن ارناۋلى مامانداندىرىلعان جۋرنالدىڭ بولۋى, قازىرگى جوعارى ءبىلىم بەرۋدىڭ زاماناۋي سۇرانىستارىنا جاۋاپ بەرەدى. باسىلىمنىڭ رەداكتسيالىق القاسىنىڭ قۇرامى قازاقستان, ۇلىبريتانيا, كانادا, تۇركيا, رەسەي ءدىنتانۋشى عالىمدارىنان جيناقتالعان. مازمۇندىق تۇرعىدان العاندا, جاريالانىمداردى باسپاعا قابىلداپ, ىرىكتەۋدىڭ باستى ولشەمى عىلىميلىق جانە زايىرلىلىق بولماق. قازۇۋ حابارشىسى «ءدىنتانۋ» سەرياسىنىڭ رەداكتسيالىق القاسى ءدىن ماسەلەلەرىنە قىزىعۋشىلىق تانىتقان عالىمدار, وقىتۋشىلار, مەملەكەتتىك جانە قوعامدىق ۇيىمداردىڭ ماماندارىن, دوكتورانتتار مەن ماگيسترانتتاردى بىرلەسكەن قىزمەتكە شاقىرىپ وتىر. باسىلىمنىڭ عىلىمي رەداكتورى – فيلوسوفيا عىلىمدارىنىڭ دوكتورى, ءدىنتانۋ جانە مادەنيەتتانۋ كافەدراسىنىڭ پروفەسسورى ن.بايتەنوۆا. ايناش ەسالي, «ەگەمەن قازاقستان». الماتى.