فوتو: اشىق دەرەككوز
ءمينيستردىڭ ايتۋىنشا, اتالعان كەزەڭدە انا مەن بالا دەنساۋلىعىنىڭ نەگىزگى كورسەتكىشتەرى ايتارلىقتاي جاقسارعان. سونداي-اق نارەستە جانە پەريناتالدىق ءولىم دەڭگەيى دە تومەندەگەن. بۇل ناتيجەلەر دەنساۋلىق ساقتاۋ جۇيەسىندەگى رەفورمالار مەن زاماناۋي مەديتسينالىق ستاندارتتاردى ەنگىزۋدىڭ جەمىسى رەتىندە باعالانىپ وتىر.
سونداي-اق اقمارال ءالنازاروۆا كليمات وزگەرىسىنىڭ دەنساۋلىققا اسەرى كۇشەيىپ كەلە جاتقانىن اتاپ ءوتتى. ونىڭ سوزىنشە, بۇل فاكتور دەموگرافيالىق ۇدەرىستەرگە جانە مەديتسينا جۇيەسىنىڭ تۇراقتىلىعىنا ىقپال ەتىپ وتىر. تەمپەراتۋرانىڭ كوتەرىلۋى مەن ەكولوگيالىق وزگەرىستەر ينفەكتسيالىق جانە جۇرەك-قانتامىر اۋرۋلارىنىڭ قاۋپىن ارتتىرىپ, ايەلدەردىڭ رەپرودۋكتيۆتىك دەنساۋلىعىنا كەرى اسەر ەتۋى مۇمكىن.
دينارا زاكيەۆا: جاڭا كونستيتۋتسيادا انا مەن بالاعا ەرەكشە قورعاۋ قاراستىرىلعان
ەلىمىزدە انا مەن بالا دەنساۋلىعىن قورعاۋ باعىتىندا بىرقاتار جوبالار جۇزەگە اسىرىلىپ جاتىر. اتاپ ايتقاندا, «انالار ساۋلىعى» باعدارلاماسى اياسىندا جۇكتى ايەلدەردى ەرتە باقىلاۋعا الۋ كۇشەيتىلگەن. قازىر جۇكتى ايەلدەردىڭ 90%-دان استامى 12 اپتاعا دەيىن ەسەپكە الىنادى.
بۇدان بولەك, ء«بىر كۇندىك كلينيكا» جوباسى ەنگىزىلىپ, تۋا بىتكەن اقاۋلار مەن حروموسومالىق پاتولوگيالار قاۋپىن دەر كەزىندە انىقتاۋعا مۇمكىندىك بەرۋدە. جوبا اياسىندا ايەلدەر قىسقا ۋاقىت ىشىندە تولىق تەكسەرۋدەن ءوتىپ, قاجەتتى كەڭەس الادى.
سونداي-اق ەلىمىزدە جاسوسپىرىمدەردىڭ رەپرودۋكتيۆتىك جانە پسيحيكالىق دەنساۋلىعىنا قاتىستى الدىن الۋ جانە كەڭەس بەرۋ جۇمىستارىن جۇرگىزەتىن جاستار دەنساۋلىق ورتالىقتارى جۇمىس ىستەپ كەلەدى.
