ءىس-شاراعا پرەمەر-ءمينيستردىڭ ورىنباسارى – مادەنيەت جانە اقپارات ءمينيسترى ايدا بالاەۆا, رەسەي فەدەراتسياسى مادەنيەت ءمينيسترىنىڭ ورىنباسارى اندرەي مالىشەۆ, سونداي-اق ەكى ەلدىڭ مۋزەي, تەاتر, ءبىلىم بەرۋ, كينو جانە كونتسەرتتىك ۇيىمدار سالاسىنداعى كاسىبي قاۋىمداستىق وكىلدەرى قاتىستى.
ايدا بالاەۆا قازاقستان مەن رەسەي اراسىنداعى مادەني بايلانىستاردىڭ ستراتەگيالىق ماڭىزىن اتاپ ءوتتى. ونىڭ ايتۋىنشا, تاراپتار بىرلەسكەن كورمەلەر ۇيىمداستىرۋ, كينوفەستيۆالدەر وتكىزۋ, شىعارماشىلىق ۇجىمداردىڭ گاسترولدىك ساپارلارىن دامىتۋ باعىتىندا جۇيەلى جۇمىس جۇرگىزىپ كەلەدى. سونىمەن قاتار مادەني-گۋمانيتارلىق سالادا جاڭا ءوزارا ءىس-قيمىل تەتىكتەرى قاراستىرىلىپ جاتىر.
«كەزدەسۋلەرىمىزدىڭ ءداستۇرلى سيپات الۋى وتە ماڭىزدى. وتكەن جىلى دا وسىنداي دوڭگەلەك ۇستەلدە باس قوسىپ, ىنتىماقتاستىقتىڭ كەلەشەگىن تالقىلاعان ەدىك. بۇگىندە مادەنيەت سالاسىنىڭ بارلىق باعىتىندا ناقتى ناتيجەلەر بار. بۇل مۋزەي جانە ارحيۆ ىسىنەن باستاپ, تەاترلار مەن كونتسەرتتىك ۇيىمدار اراسىنداعى بايلانىستارعا دەيىنگى كەڭ اۋقىمدى قامتيدى. وسىنداي ديالوگتار ناقتى ناتيجەلەر بەرىپ, مادەني-گۋمانيتارلىق بايلانىستاردى ودان ءارى نىعايتۋعا جول اشىپ وتىر. بۇگىنگى كەزدەسۋ دە جاڭا باستامالارعا جانە بىرلەسكەن جوبالاردى كەڭەيتۋگە مۇمكىندىك بەرەدى», دەدى ايدا بالاەۆا.
رەسەي مادەنيەت ءمينيسترىنىڭ ورىنباسارى اندرەي مالىشەۆ تە ەكىجاقتى ىنتىماقتاستىقتىڭ جوعارى دەڭگەيىن اتاپ ءوتتى.
«قازاقستانمەن مادەنيەت جانە ونەر سالاسىنداعى ارىپتەستىككە ەرەكشە ءمان بەرەمىز. قازاقستان تاراپىنان رەسەيلىك مادەنيەت قايراتكەرلەرىنە ءاردايىم جىلى قابىلداۋ كورسەتىلەدى. بۇل ورتاق مادەني كەڭىستىك پەن رۋحاني قۇندىلىقتاردىڭ ساباقتاستىعىن دالەلدەيدى. رەسەيدە وتكەن قازاقستان مادەنيەتى كۇندەرى دە ۇلكەن مادەني وقيعاعا اينالدى. ەندىگى مىندەت – الداعى جىلدارداعى ىنتىماقتاستىقتى ناقتى مازمۇنمەن تولىقتىرۋ», دەدى ول.
دوڭگەلەك ۇستەل بارىسىندا مۋزەي ىسىنە ەرەكشە نازار اۋدارىلدى. قازاقستان رەسپۋبليكاسىنىڭ ۇلتتىق مۋزەيى مەن ءى پەتر اتىنداعى انتروپولوگيا جانە ەتنوگرافيا مۋزەيى قازاق ەتنوگرافيالىق ماتەريالدارىنىڭ كاتالوگىن بىرلەسىپ ازىرلەۋ جونىندە كەلىسىمگە كەلدى. سونىمەن قاتار مەملەكەتتىك ەرميتاجبەن بىرلەسىپ, 2027 جىلدىڭ كۇزىنە جوسپارلانعان جاڭا ارحەولوگيالىق كورمەلەر مەن ءوزارا ەكسپوزيتسيالار دايىنداۋ جۇمىستارى جۇرگىزىلىپ جاتىر.
بيىل كۇزدە ءابىلحان قاستەەۆ اتىنداعى ۇلتتىق ونەر مۋزەيىندە مەملەكەتتىك ترەتياكوۆ گالەرەياسى قورىنان الىنعان تۋىندىلار ۇسىنىلاتىن «حح ۆەك رۋسسكوگو يسكۋسستۆا ۆ 30 شەدەۆراح» اتتى كورمە اشىلادى.
رەستاۆراتسيا سالاسىنداعى ىنتىماقتاستىق تا جاڭا دەڭگەيگە كوتەرىلىپ جاتىر. قازاقستان تاراپى مامانداردىڭ رەسەي رەستاۆراتسيالىق ورتالىقتارىندا تاعىلىمدامادان ءوتۋ باعدارلامالارىن جالعاستىرۋعا دايىن ەكەنىن ءبىلدىردى. سونداي-اق شەكارالاس ايماقتارداعى مۋزەيلەرمەن كاتالوگتاۋ جانە ارحيۆ ءىسى بويىنشا بىرلەسكەن جوبالار تەرەڭدەتىلمەك.
كينويندۋستريا سالاسىندا فەستيۆالدىك كورسەتىلىمدەرمەن قاتار بىرلەسكەن فيلمدەر تۇسىرۋگە باسىمدىق بەرىلىپ جاتىر. «روسكينو» ۇيىمى ورتاق پراكتيكالىق جوبالاردى ىسكە اسىرۋعا قىزىعۋشىلىق تانىتتى. «قازاقفيلم» ۇلتتىق كينوستۋدياسى دا «ۆرەميا» كوركەم ءفيلمى بويىنشا جۇمىستى جالعاستىرۋعا دايىن ەكەنىن راستادى. تۇسىرىلىمدەر قازاقستان مەن رەسەي اۋماعىندا وتەدى دەپ جوسپارلانعان. سونىمەن بىرگە رەسەي مەملەكەتتىك كينوقورىندا ساقتالعان قازاق كينو مۇراسىن تسيفرلاندىرۋ جۇمىستارى جۇرگىزىلىپ جاتىر.
كەزدەسۋدە جاس كومپوزيتورلار اراسىنداعى تاجىريبە الماسۋ, دجاز ونەرىن دامىتۋ, كونتسەرتتىك الاڭدار ارقىلى ىنتىماقتاستىقتى كۇشەيتۋ ماسەلەلەرى دە تالقىلاندى. حورەوگرافيا سالاسىن دامىتۋعا ەرەكشە كوڭىل ءبولىنىپ, بىرلەسكەن ءبىلىم بەرۋ باعدارلامالارى, تاعىلىمدامالار, شەبەرلىك ساباقتارى جانە قوس ديپلومدى وقىتۋ جۇيەسىن ەنگىزۋ مۇمكىندىگى قاراستىرىلدى.
تەاتر, كينو جانە ديالوگ: استانادا رەسەيدىڭ مادەنيەت كۇندەرى وتەدى
جيىن سوڭىندا ايدا بالاەۆا ايتىلعان بارلىق ۇسىنىستار الداعى بىرلەسكەن جۇمىستىڭ نەگىزىنە اينالاتىنىن اتاپ ءوتتى. ول 2027-2028 جىلدارعا ارنالعان ءوزارا ءىس-قيمىل جوسپارى تاراپتاردىڭ ناقتى باستامالارىمەن تولىقتىرىلاتىنىنا سەنىم ءبىلدىردى.
كەزدەسۋ قورىتىندىسى بويىنشا قازاقستان رەسپۋبليكاسىنىڭ ۇلتتىق مۋزەيى مەن رەسەي فەدەراتسياسىنىڭ رەسەي ەتنوگرافيالىق مۋزەيى اراسىندا ىنتىماقتاستىق تۋرالى مەموراندۋمعا قول قويىلدى. قۇجات تاقىرىپتىق كاتالوگتاردى بىرلەسىپ ازىرلەۋدى, عىلىمي-ادىستەمەلىك باعىتتاردى دامىتۋدى, سونداي-اق سۋرەتشىلەر, رەستاۆراتورلار جانە مۋزەي سالاسىنىڭ ماماندارى اراسىنداعى بايلانىستاردى نىعايتۋدى كوزدەيدى.
