وبلىس ورتالىعىنداعى قازاقستان رەسپۋبليكاسىنىڭ تۇڭعىش پرەزيدەنتى ن.نازارباەۆ اتىنداعى ورتالىق مادەنيەت جانە دەمالىس ساياباعىندا وبلىستىق حالىق شىعارماشىلىعى ءۇيى وبلىستىق مادەنيەت, مۇراعاتتار جانە قۇجاتتاما باسقارماسىنىڭ قولداۋىمەن ۇلى جەڭىستىڭ 70 جىلدىعىنا ارنالعان «شىرقا, سىرناي, اۋەلەپ!» اتتى وبلىستىق سىرنايشىلار فەستيۆالىن وتكىزدى. مۋزىكالىق ءىس-شارانىڭ ماقساتى – وسكەلەڭ ۇرپاققا سۇراپىل سوعىستاعى مايدانگەردىڭ ەرلىگى مەن باتىلدىعىن جەتكىزۋ, ولاردىڭ ءومىرىنىڭ قۇرمەتكە لايىق ەكەندىگىن جاستارعا ناسيحاتتاۋ جانە ەلىمىزدىڭ تاريحىن ءبىلىپ, تانۋعا بەيىمدەۋ بولىپ تابىلادى.
فەستيۆالدىڭ اشىلۋ سالتاناتىندا وبلىستىق مادەنيەت, مۇراعاتتار جانە قۇجاتتاما باسقارماسى باسشىسىنىڭ ورىنباسارى قىدىرعالي ەرمۇقان ءسوز سويلەپ, ونەرپازدارعا شىعارماشىلىق شابىت, ونەر جولىندا تابىس تىلەدى. ونەر مەرەكەسىنە جاس ەرەكشەلىكتەرى 10 – 65 ارالىعىنداعى وبلىستىڭ العا, مارتوك, تەمىر, قوبدا, ايتەكە بي, ىرعىز اۋداندارىنان جانە اقتوبە قالاسىنان 25-تەن استام سىرنايشىلار قاتىستى. ولاردىڭ اراسىندا وڭىرگە بەلگىلى ونەرپاز مۇقان ساتىباەۆ, اقتوبە فەرروقورىتپا زاۋىتىنىڭ جۇمىسشىسى ياكۋب ابىلاەۆ, اقتوبە قالاسىنىڭ №3 بالالار مۋزىكا مەكتەبىنىڭ وقۋشىلارى اسلان ادىلكەرەەۆ, الەنا ولەينيك, ەگور مارتىنيۋك, بەلگىلى كومپوزيتور باقتىعالي جۇمالين, گۋمانيتارلىق كوللەدجىنىڭ ستۋدەنتتەرى ەرداۋلەت ءتاجىباي جانە المات راشيد, مارتوك اۋدانى قاراتوعاي ورتا مەكتەبىنەن دانا كۋلچاروۆا جانە باسقالارى بار. «شىرقا, سىرناي, اۋەلەپ!» وبلىستىق سىرنايشىلار فەستيۆالىندە قالالىق مۋزىكا مەكتەپتەرىنىڭ, ورتا ارناۋلى وقۋ ورىندارىنىڭ ستۋدەنتتەرى مەن كاسىبي جانە اۋەسقوي مۋزىكانتتار ءوز ونەرلەرىن ورتاعا سالدى. ورتالىق مادەنيەت جانە دەمالىس ساياباعىنىڭ ساحناسىنان سوعىس جىلدارىنداعى اندەرمەن قاتار اسكەري جانە پاتريوتتىق تاقىرىپتاعى شىعارمالار شىرقالدى. فەستيۆال بارىسىندا تاريحقا تاعزىم, رۋح پەن جىگەر بەرەتىن, ەرلىكتى ۇلىقتايتىن, تۋعان ولكەگە دەگەن سەزىمدەرگە تولى, حالىق ءسۇيىپ تىڭدايتىن «انا تۋرالى باللادا», «كاتيۋشا», «سيني پلاتوچەك» اندەرىمەن قاتار ل.حاميدي, ا.جۇبانوۆ, ش.قالداياقوۆتىڭ شىعارمالارى ورىندالدى. مەرەكەلىك باعدارلامادا جەكە ورىنداۋشىلارمەن قاتار اقتوبە قالالىق «گەولوگ» مادەنيەت ءۇيىنىڭ «اسىل اجەلەر» حالىقتىق ءانسامبلى, العا اۋداندىق بالالار ونەر مەكتەبىنىڭ ورىس حالىق اسپاپتار ءانسامبلى جانە باسقالارى ونەر كورسەتتى. سىرنايشىلار فەستيۆالى كورەرمەندەرگە كوتەرىڭكى كوڭىل-كۇي سىيلادى. فەستيۆالعا قاتىسۋشى ونەرپازدار ارنايى ديپلومدارمەن جانە باعالى سىيلىقتارمەن ماراپاتتالدى.
ساتىبالدى ءساۋىرباي, «ەگەمەن قازاقستان».
اقتوبە وبلىسى.
