«كوز قورقاق, قول باتىر» دەگەن, جاقسىلىق اعا و باستا ارداگەرلەر ءانسامبلىن قۇراتىن كەزدە «بۇل ءىستىڭ سوڭى قالاي بولار ەكەن؟» دەپ ەپتەپ جۇرەكسىنگەن ەكەن. قانشا دەگەنمەن نەمەرە-شوبەرەلەرىنىڭ قىلىعىنا تويماي, بەينەتىنىڭ زەينەتىن كورىپ وتىرعان اقساقالداردىڭ ەندىگى جەردە قوعامدىق جۇمىسقا قۇلقى بولا ما؟ قۇرمەتتى دەمالىستاعى قاريا ءوزىن ۇلكەن ورتادان الىس ۇستاپ, جانى تىنىشتىقتى قالايتىنى بەلگىلى عوي.
ايتسە دە, ەڭبەكپەن ەسەيىپ, بار كۇش-جىگەرىن ەلى ءۇشىن جۇمساعان ارداگەرلەر ەشقاشان دا قوعامنان, ورتادان الىستاپ كەتپەيدى ەكەن. قارتتىق دەگەن ەندى قولىڭنان ەشتەڭە كەلمەيدى دەگەن ءسوز ەمەس. قايتا ءار ىسكە بايىپپەن قاراپ, ومىرلىك تاجىريبەڭدى, كورگەن-تۇيگەنىڭدى كەيىنگىگە ۇيرەتەتىن, جاستارعا قولداۋ كورسەتىپ, ىسىمەن دە, سوزىمەن دە ۇلگى بولاتىن شاق ەمەس پە؟ وسىنى ۇعىنعان ارداگەرلەر جاقسىلىق اعانىڭ ۇسىنىسىن بىردەن قولداي كەتىپتى. ءسويتىپ, تاراز قالاسىندا ارداگەرلەر ءانسامبلى قۇرىلدى. ودان بەرى دە ءۇش جىلدان استام ۋاقىت ءوتىپتى.
– ءبىزدىڭ ۇيىمدا 3 مىڭ 700 ارداگەر مەن زەينەتكەر مۇشە بولىپ تىركەلگەن, – دەيدى تاراز قالالىق ارداگەرلەر ۇيىمى №10 اۋماقتىق وكرۋگىنىڭ توراعاسى جاقسىلىق دوساەۆ. – ونىڭ ىشىندە 104 جاسقا كەلگەن ءبىر اجەمىز جانە 7 سوعىس ارداگەرى بار. وتكەن جىلى ءبىزدىڭ ارداگەرلەر ءانسامبلى قالا بويىنشا وتكەن بايقاۋدا ءبىرىنشى ورىنعا يە بولدى. 45 ونەر ۇجىمى قاتىسقان وبلىستىق بايقاۋدا جۇلدەلى ءۇشىنشى ورىننان كورىندىك. ال ءساۋىر ايىنىڭ ورتاسىندا استانادا وتكەن «قايران, ەرلەر – قاھارمان ارداگەرلەر!» اتتى رەسپۋبليكالىق بايقاۋعا جامبىل وبلىسىنىڭ اتىنان قاتىسىپ, ەكىنشى ورىنعا يە بولدىق. انسامبلدە 15 ارداگەر ونەر كورسەتەدى. ارينە, ول ارداگەرلەردىڭ كوبىسى زەينەتكەرلىككە دەيىن قۇرىلىسشى, تەمىرجولشى, باسقا دا ماماندىقتار بويىنشا ەڭبەك ەتكەن. ەڭ جاسى ۇلكەنى جاقىندا 80-گە تولدى. ولارعا ونەر سالاسىندا تالاي جىل ەڭبەك ەتكەن سەيسەنبى بەيسەۋوۆ جەتەكشىلىك ەتۋدە. سونداي-اق, سەرىك سابىربەكوۆ, جاڭبىرباي جولماعامبەتوۆ, قوراباي ەسداۋلەتوۆ, تۇرار بەردىقوجاەۆ, بەكجان ىلدەنباەۆ سياقتى تەرمەشى-انشىلەرىمىز بار. شۇكىرشىلىك, ەلدىڭ جوعارى باعاسىن الدىق, ارداگەرلەردىڭ ابىرويى ارتتى. سول ابىرويدى ودان سايىن بيىكتەتىپ, نىعايتا تۇسۋگە ءتيىسپىز. اقساقال ايتقان اتالى ءسوز ەشقاشان اياققا باسىلماعان. وسى ايماقتاعى داۋ-داماي, اعايىن اراسىنداعى ۇرىس-كەرىستى سىرتقا شىعارماي, ءوز ورتالارىندا شەشىپ, تۋىستىقتى, بىرلىكتى, ەلدىكتى ناسيحاتتاپ جۇرگەن وسىناۋ ومىرلىك تاجىريبەسى مول, داناگوي ارداگەرلەردىڭ ەل ىشىندە ىقپالى وتە زور ەكەن. ەندەشە, جاستارىمىز وسىنداي ەل اعالارىنا, قازىنالى قاريالارىنا قاراپ, ويىن دا بويىن دا تۇزەسە, نۇر ۇستىنە نۇر بولار ەدى.
ورالحان ءداۋىت, «ەگەمەن قازاقستان».
جامبىل وبلىسى.
