ساپار بارىسىندا پرەمەر-ءمينيستردىڭ ورىنباسارى شىمكەنت تسيتادەلىنە بارىپ, مۋزەي ەكسپوزيتسيالارىن ارالادى جانە تاريحي-مادەني مۇرانى ساقتاۋدىڭ ماڭىزىن اتاپ ءوتتى. سونداي-اق ەتنواۋىلدا بولىپ, مۇنداي نىسانداردى ارحايكاعا بوي الدىرماي, زاماناۋي, كرەاتيۆتى ءارى يننوۆاتسيالىق فورماتتا دامىتۋ قاجەتتىگىن ايتتى.
قالالىق مادەنيەت, گاسترونوميا جانە كرەاتيۆتى يندۋستريا سالالارىنداعى بىرقاتار جوبا تانىستىرىلدى. اربات جاياۋ جۇرگىنشىلەر اللەياسىنىڭ الەۋەتىمەن تانىسۋ بارىسىندا ايدا بالاەۆا وسى اۋماقتا بوس جۇمىس ورىندارى جونىندەگى وزەكتى اقپارات پەن جاستارعا ارنالعان ماۋسىمدىق كاسىپتىك باعدار بەرۋ ماتەريالدارى ۇسىنىلاتىن جۇمىسپەن قامتۋ ورتالىعىن ورنالاستىرۋ مۇمكىندىگىن قاراستىرۋدى ۇسىندى.
سونىمەن قاتار كرەاتيۆتى ورتانى دامىتۋعا, جاس تالانتتاردى قولداۋعا جانە مادەني مۇرا مەن يننوۆاتسيالىق تاسىلدەر ۇندەسكەن زاماناۋي قالالىق ينفراقۇرىلىمدى قالىپتاستىرۋعا ەرەكشە نازار اۋدارىلدى.
