- جەكەلەگەن سا-يىستا يۋليا پۋتينتسەۆا كايلا كروسستى قاپى قالدىرسا, سونيا جيەنباەۆا بيانكا اندرەەسكۋگە جول بەردى. ودان كەيىن جىبەك قۇلامباەۆا مەن اننا دانيلينا جۇبى كروسس پەن اندرەەسكۋدەن ايلاسىن اسىردى. اسا شيەلەنىستى وتكەن شەشۋشى ويىندا يۋ.پۋتينتسەۆا كەزىندە US Open دوداسىندا دارا شىققان الەمنىڭ بۇرىنعى ءۇشىنشى راكەتكاسى اندرەەسكۋدى ۇتتى. 3 ساعات 39 مينۋتقا سوزىلعان كەزدەسۋ 7:6, 3:6, 7:6 ەسەبىمەن اياقتالدى.
- ەلىمىزدىڭ كوركەم گيمناسشىلارى تاشكەنتتە ۇيىمداستىرىلعان الەم كۋبوگىنىڭ توپتىق باسەكەسىندە ەكىنشى ورىندى ەنشىلەدى. قۇرامىندا جاسمين جۇنىسباەۆا, ايدا حاكىمجانوۆا, كريستينا چەپۋلسكايا, ءمادينا مىرزاباي, ايزەرە كەڭەس, ايزەرە نۇرماعامبەتوۆا سىندى ارۋلارى بار كوماندا 51,25 ۇپاي جينادى. جەرلەستەرىمىز قىتايدان (55,90 ۇپاي) عانا قالىپ قويدى. ءۇشىنشى ورىندى بەلارۋس (51,10) يەلەدى.
- كيپردەگى «ۇمىتكەرلەر ءتۋرنيرىنىڭ» 11-تۋرىندا ءبيبىسارا اساۋباەۆا قىتايلىق تان چجدۋنيمەن تەڭ وينادى. كەلەسى تۋردا قازاق شاحماتشىسىنىڭ جولى جارىس كەستەسىندە وزىمەن قاتار تۇرعان رەسەيلىك ەكاتەرينا لاگنومەن قيىستى. بۇل باسەكەدە ءبيبىسارا باسىم ءتۇستى. وسى جەڭىسىنىڭ ارقاسىندا 6,5 ۇپاي جيناپ, ءۇشىنشى ورىنعا كوتەرىلدى. كوشباسىنداعى ۇندىستاندىق رامەشبابۋ ۆايشالي مەن قىتايلىق چجۋ تسزينەردىڭ اساۋباەۆادان جارتى ۇپايى ارتىق.
- حورۆاتيانىڭ وسيەك قالاسىندا سپورتتىق گيمناستيكادان الەم كۋبوگى اياقتالدى. «ات» جاتتىعۋىندا زەينوللا ىدىرىسوۆ (14,600) كۇمىس السا, ناريمان قۇربانوۆ (14,000) قولاعا قول سوزدى. باس جۇلدەنى ارمەنيالىق گاملەت مانۋكيان (14,733) ولجالادى. «كەرمە» جاتتىعۋىندا ميلاد كاريمي (14,933) تەك تايپەيلىك تانگ چيا-حۋندى (15,233) العا سالىپ, ەكىنشى ورىنعا يە بولدى.
- ۆولەيبولدان ايەلدەر اراسىنداعى ۇلتتىق ليگا ويىندارى مارەگە جەتتى. استانادا وتكەن فينالدىق ماتچتا تالدىقورعاننىڭ «جەتىسۋى» مەن پەتروپاۆلدىڭ «قۋانىشى» كەزدەستى. شەشۋشى باسەكە 3:1 (25:13, 25:21, 21:25, 25:21) ەسەبىمەن العاشقىلاردىڭ پايداسىنا شەشىلدى. ءسويتىپ, «جەتىسۋ» ونىنشى رەت ەل چەمپيونى اتاندى. قولا مەدالدى تۇركىستاننىڭ «تۇرانى» يەلەندى.
- الماتىدا ارالاس جەكپە-جەكتەن IBA Nomad 14 ءتۋرنيرى ءوتتى. باستى باسەكەدە جۇمان جۇمابەكوۆ برازيليالىق ۆاندەرلەي روسانى ءۇشىنشى راۋندتا نوكاۋتقا جىبەردى. كوپشىلىكتىڭ قىزىعۋشىلىعىن تۋدىرعان تاعى ءبىر ايقاس ارمان ءاشىموۆ پەن تاجىكستاندىق ديلشود نوركۋزيەۆ اراسىندا ءوربىدى. قانداسىمىزعا پامير تاۋى ەتەگىنەن كەلگەن سپورتشىنى ۇرىپ جىعۋعا ءبىر راۋند جەتكىلىكتى بولدى. كەزىندە UFC-دە كۇش سىناسقان جالعاس جۇماعۇلوۆ تا قىرعىز قايرات نۇرباي ۇلىمەن بولعان باسەكەنىڭ تاعدىرىن ۇزىلىسكە جەتكىزبەي شەشتى.
- فۋتبولدان ەل چەمپيوناتىنىڭ بەسىنشى تۋرى مىناداي ناتيجەمەن اياقتالدى: «اتىراۋ» – «قايسار» 2:0, «جەتىسۋ» – «ەلىماي» 0:1, «توبىل» – «قايرات» 1:1, «استانا» – «ورداباسى» 1:1, «وقجەتپەس» – «ەرتىس» 2:1, «التاي» – « ۇلىتاۋ» 1:2, «قىزىلجار» – «جەڭىس» 4:0, «اقتوبە» – «كاسپي» 1:0. قازىر جارىس كەستەسىندە ءۇش كوماندا – «قايرات», «ەلىماي», «وقجەتپەس» كوش باستاپ تۇر. ولاردىڭ ارقايسىسىندا 11 ۇپايدان بار.
