سۋرەتتى تۇسىرگەن – ەرلان ومار, «EQ»
كورمە ادام جانىنداعى ساۋلە, ىشكى تازارۋ مەن رۋحاني تەرەڭدىك تاقىرىبىن ارقاۋ ەتەدى. سۋرەتشىلەر اتالعان ۇعىمداردى ءتۇرلى كوركەمدىك مانەرى, ءوز شەبەرلىگى مەن بەينەلەۋ تاسىلدەرى ارقىلى كورسەتكەن. شىعارماشىلىق ۇستانىمدارى بولەك بولسا دا ەكسپوزيتسيا تۇتاستاي العاندا جان تىنىشتىعى, ءۇمىت, رۋحاني تىرەك جانە ادام سەزىمىنىڭ تەرەڭ بولمىسى جايىنداعى ورتاق كوركەم ويدى ۇندەيدى.
مادەني ءىس-شارانىڭ قاتىسۋشىلارى مەن قوناقتارىنا قازاقستان رەسپۋبليكاسى پرەمەر-ءمينيسترىنىڭ ورىنباسارى – مادەنيەت جانە اقپارات ءمينيسترى ايدا بالاەۆانىڭ قۇتتىقتاۋ حاتى وقىلدى. ۇكىمەت باسشىسىنىڭ ورىنباسارى قۇتتىقتاۋىندا مۇنداي جوبالاردىڭ مادەني بايلانىستاردى نىعايتىپ, حالىقتار اراسىنداعى رۋحاني جاقىندىقتى تەرەڭدەتە تۇسۋدەگى ەرەكشە ماڭىزىن اتاپ ءوتتى.
«بۇل كورمە – زاماناۋي بەينەلەۋ ونەرىنىڭ تاڭداۋلى تۋىندىلارىن توعىستىرعان, شىعارماشىلىق ىزدەنىس پەن رۋحاني ساباقتاستىقتى ايشىقتايتىن تاعىلىمدى مادەني وقيعا دەپ بىلەمىن. كورمەگە ەلىمىزدىڭ, سونداي-اق قىرعىز رەسپۋبليكاسىنىڭ بەلگىلى قىلقالام شەبەرلەرى قاتىسىپ جاتىر. «نۇر شاشۋ» كورمەسى – سۋرەتشىلەردىڭ شىعارماشىلىق جەتىستىكتەرىن تانىتاتىن الاڭ عانا ەمەس, سونىمەن بىرگە مادەنيەتتەر توعىسىنىڭ, ونەر ارقىلى رۋحاني ۇندەسۋدىڭ جارقىن كورىنىسى», دەلىنگەن قۇتتىقتاۋ حاتىندا.
كورمەگە قاتىسۋشى قىلقالام شەبەرلەرىنىڭ ءبارى دەرلىك كەسكىندەمە جانرىندا ەڭبەك ەتەدى. سوندا دا ءار سۋرەتشى ورتاق تاقىرىپتى وزىندىك تانىم-تۇيسىگىمەن, وزىنە ءتان ستيلدىك ەرەكشەلىگىمەن اشۋعا تىرىسقان. ەكسپوزيتسيادا پورترەت پەن پەيزاج, ابستراكتسيا ەلەمەنتتەرى مەن ىشكى ۇيلەسىمگە قۇرىلعان كوركەم ىزدەنىستەر تابيعي ساباقتاستىق تاپقان.
كورمە 11 مامىرعا دەيىن جالعاسادى.
